الأمثال 6
6
تحذير من السفاهة
1يا ولدي إدا كفلت أحد، و إدا عطيت وعد لواحد غريب؛ 2تصير تورطت في كلام قلته بلسانك، و تشربكت بكلام طلع من شفايفك. 3فعليك يا ولدي تسوي چدي وتحمي روحك، لأنك صرت تحت رحمة صاحبك: روح و إتدلل له. 4و ترجاه. ولا تخلي النوم يغلبك، ولا النعسة تقرب من جفونك، 5نجي نفسك زي الغزال من إيد الصياد و زي العصفور من مسكة القنّاص.
6روح للنملة يالكسول، و طالع عدل في كيف تدبر أمورها و خلك حكيم، 7مع إنها ماعندها لا رئيس ولا مدير أو حاكم، 8لكنها تجمع أكلها في الصَيّف، و تخزن أكلها في موسم الحصاد. 9إلى متى تبقى خامل يا الكسول؟ متى بتقوم من نومتك؟ 10لأن شوية نوم و شوية تسدح و تبطح، و كل شوي لاف أياديك و خامد، 11تخلي الفقر يهجم عليك زي الحرامي في الطريق، و الحاجة تطب عليك زي الجندي المُسلّح إلاجاي يغزيك.
12الرجال إلا بس شغلته يغتاب، رجال لئيم يسعى للفِتنة و النميمة و الچدب 13و يغمز بعيونه، و يأشر برجوله، و يكشف عن نوايا قلبه بحَركات أصابعه. 14يتفنن في الشر بقلّبه الغشّاش، و دايماً يتسبب في العداوات. 15عشان چدي البلاوي تحل عليه دايما، و فجأة يتدمر و يصير مستحيل يتشافى.
16ستة أشياء يبغضها الرب، و سبعة مكروهة عنده: 17العيون المتكبرة، و اللسان الچداب، و الإيد إلا تسفك دم بريء. 18و القلب إلا يتآمر بالشرّ، و لرجول إلا تسرع بصاحبها لفعل الإثم، 19و شاهد الزور إلا ينطق بالچدب، و الرجال إلا يزرع العداوات بين الإخوة.
تحذير من الزنا
20يا ولدي إحّفظ وصايا أبوك ولا تنسى تعاليم أمك. 21دايما إرّبطهم على قلبك، و علّقهم قلادة على رقبتك، 22عشان يدلوك الطريق كلما مشيت، و يرعوك وقت نومك، و يكلموك وقت إلا تصحى. 23لأن الوصيّة شمعة و الشريعة نور، و التحدير عشان التأديب و هو طريق الحياة، 24و هي إلا تحميك من المرة الفاسقة و من لسان العاهرة المعسول. 25لا تشتهي جمالها في قلبك ولا تخليها تتحكم في عقلك بعيونها. 26لأن بسِبّة المرة العاهرة يصير الرجال فقير ما عنده قرص خبز ياكله، و الزانية المتزوجة تتصيّد النَفس الكريمة. 27چى يقدر الواحد يخلي النار تشب في حضنه و ما تحترق ثيابه؟ 28لو يقدر الواحد يمشي على الجمر و ما تنچوي رجوله؟ 29هدا إلا يصير في كل من يزني بمَرَة ما هي مرته؛ أكيد بيحلّ عليه العِقاب. 30و حتّى الناس ما تحتقر الحرامي لما يبوق عشان يشبع بطنه لأنه جوعان، 31لكن إدا صادوه متلبس بالجريمة يخلوه يعوض ويرجع إلا باقه سبع مرّات، حتى لو كلفه هالشي كل ما يملكه. 32لكن الزاني فهو بدون عقل و تفكير صحيح، و كل من يزني يدمر روحه، 33لأنه ينضرب و يندلّ، و عاره ما بينمحى للأبد. 34لأن الغيرة تفجر غضب الرجال و لما ينوي ينتقم ما بيرحم. 35و ما يقبل الفِدّية، و ما يرضى بالرشوة حتى لو كانت مبلغ كبير.
المحددات الحالية:
الأمثال 6: QNAV
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Qatifi New Arabic Version © 2024 Strategic Resource Group