الأمثال 20
20
1الخمر يخلي الواحد مسخرة، و الشراب الا يخليك تسكر يسبب هيصه وإزعاج و الشخص إلا يدمن عليهم مهو حكيم. 2غضب الملك زي زئير الأسد، و إلا يخليه يعصب يجيب الشر لنفسه. 3الواحد عشان يحافظ على شرفه لازم يتجنّب العداوات، و البهيم هو إلا يتورط في الشبقات. 4المتكيسل ما يحرث الأرض في موسمها، و في وقت الحصاد يدوّر على المحاصيل وما يلقاهها. 5نوايا قلب الإنسان زي ماي غزير و العاقِل إلا يصيدها. 6واجد ناس يقولوا إنهم صالحين، بس الأمين وين يتحصل؟ 7المؤمن يتصرف حسب شرفه، و هني لأولاده من بعده. 8لما يجلس الملك على كرسي القضاء ينقي بعيونه البصيرة الخير من الشر. 9من يقدر يقول: أنا نظفت قلبي و تطهرت من خطيتي؟
10الرب يكره و يبغض الموازين و المقاييس المغشوشة. 11حتى الصّبي ينعرف من أخلاقه و تصرفه إدا كان خيِّر أو لا. 12الله هو إلا خلق الأدون المطيعة و العيون إلا تشوف. 13لا تحب كثرة النوم عشان ما تعيش فقير، إقعد من نومك واشتغل عشان تجيب لقمة عيشك. 14يقول المُشتري: جودة هدي البضاعة مو عدلة! و إدا إشّتراها مشى قام يفتخر بها.
15صحيح إن الدهب موجود و اللؤلؤ واجد، لكن الشفايف إلا تنطق بالمَعرفة أندر من الدهب و اللؤلؤ و الجواهر الكريمة. 16إدا أحد وعد إنه يدفع دين أحد غريب، خد رداه كضمان إنه بيدفع. 17طعم الخبز الحرام في بوز الواحد حلو، لكنه بسرعة لما يطوف حلقه ينترس حصى. 18النوايا تتحقق بالمشورة، و إدا بغيت تدخل حرب دور عن النصيحة. 19النمّام يَنّشر الأسرار، فلا تماشي واحد هدار. 20إلا يسب أبوه و أمه يطفي الرب نور حياته في الظلام الأسّوَد.
21ياما مُلك يتورث بسرعة في بدايته، و ما يبقى فيه برَكة في نهايته. 22لا تقول: بجازي إلا أداني بالشرّ. استنى الرب يعطيك العون. 23اللعِب في المقاييس يبغضه الرب، و ميزان الغِش مو زين. 24خطوات الإنسان يوجهها الرب، فكيف يقدر الواحد يفهم طريقه؟ 25فخ للإنسان إن يتسرع في الندر للرب و بعدين ينّدَم على ندره. 26الملك الحَكيم ينقي الشرّانيين، وبعدين يطحنهم بالرحى. 27روح الإنسان هي نور الرب، تفحص عن دواخل داته. 28الرَحّمة و الحق يحفظوا الملك، و بالرّحمة يأمن العرّش. 29فخر الشباب في قوّتهم، و فخر الشياب في شيبهم. 30جروح الضّرب تنقي من الشر، و الجلد يطهر دواخل النَفس.
المحددات الحالية:
الأمثال 20: QNAV
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Qatifi New Arabic Version © 2024 Strategic Resource Group