रोमि 5
5
सान्ति रो सुकाका
1इदोइभाअ्सिङ परमेस्वर केलाइहेङ केलाइको खान्धुरसो दोङ धरमाति ठार्हाइहि। कालाउ केलाइको प्रभु ख्रिस्ट दोङ परमेस्वरदोफा केलाइहेङ आरोङ मिलिपाहि। 2वा केलाइहेङ केलाइको खान्धुरसो परमेस्वरको निगाहाता चुमाका हि। कालाउ केलाइ इङकोङ निगाहाता सिन्हुका हिन्हाहि। हाइदोनु केलाइ बुङ परमेस्वरको प्राताप जातिङकोङ निनाङ दोअ्तेङ आस पातेङ हेन्जाङ लेङचाका हिन्हाहि। 3इङकोझोको खिनिङ माको, तु:ता बुङ केलाइ लेङचान्हाखे। हाइदोनु तु:होइ तु: सहिका सरबङ पिखे दोअ्तेङ केलाइ गिन्हाखे। 4तु: सहिका सरबङहोइ केलाइहेङ बोल्याका बान्हाइखे। केलाइको एल्का आनिबानिहोइ दोङ आस निङन्हाखे। 5केलाइ इदोइ आसता निरास माजेनाङ। हाइदोनु परमेस्वर पुनित हाङसा पिका हि रो पुनित हाङसासो परमेस्वरको माया केलाइको कोन्धाङता ताअ्पिका हि।
6केलाइ ताइमिङ छुटकाराको भाअ्सिङ हाइदोङ पालि मादोलाउ ख्रिस्ट ताइमिङ दोङ केलाइ पापिको भाअ्सिङ उचित पहरता सिहि। 7धरमाति द्याङको भाअ्सिङ सिलि भोका द्याङ निङलि ते मुस्किल हि। हेन्जाङ एल्का द्याङको भाअ्सिङ आधिमि द्याङ सिलि आट बुङ पालि द्वावा। 8कालाउबुङ परमेस्वर वाको माया केलाइहेङ एसापा तिङपाहि, केलाइ पापि हिलाउ केलाइको भाअ्सिङ ख्रिस्ट सिहि।
9केलाइ ख्रिस्टको हितिसो परमेस्वरको आगाता धरमाति ठार्हाइन्हाहि। जातिङको ख्रिस्ट केलाइहेङ परमेस्वरको चेरसो बान्चिपावा। 10केलाइ परमेस्वरको दुस्मन हिलाउ दोङ वाको चानको सिकासो परमेस्वरदोफा केलाइको मिलाप जेङका हिघाहि। जातिङको एला केलाइ वाकोदोफा मिलाप जेङका हिनाङ ख्रिस्टको जिबनसो बान्चिपावा। 11इदोइ खिनिङ माको, केलाइ प्रभु ख्रिस्टसो परमेस्वरदोफा लेङचान्हाखे। कालाउ इसुको भाअ्सिङ एला केलाइहेङ परमेस्वरदोफा मिलाप पापाका हि।
आदम रो ख्रिस्ट
12पाप लाङ द्याङ आदमसो दुनियाता लोहि रो पापदोफा सिका बुङ लोहि। एसापा झाराङ द्याङगेलाइ सिलिगोइका जेङहि। हाइदोनु झाराङ द्याङगेलाइ पाप पाका हि।#सिरजाइ ३:६ 13परमेस्वर न्याम पिकाखान्तेङ लाम्फादोङ दुनियाता पाप हिघाहि। कालाउ न्याम मान्थुनाङ पापको हिसाब बुङ माजेङहि। 14कालाउ आदमको पालासो मोसाको पालाथिकापा, झाराङ द्याङगेलाइहेङ सिलिदोङ गोइका हिघाहि। आदम परमेस्वरको हुकुम मासाअ्नाङ सिलि गोइहि।
कालाउ आदमको पाका मारेम्का कामको भागिदार झाराङ द्याङ जेङकाभाइपाङ ख्रिस्टको पाका रेम्का कामको भागिदार बुङ झाराङ जेङखे। एसापा दोङ आदम ख्रिस्टको नामुना जेङहि। 15कालाउ परमेस्वरको निगाहाको बरचाहिँ आदमको पाप भाइका माको। हाइदोनु एअ्मि आदमको पाका पापसो हेन्जाङ द्याङगेलाइ सिहि। कालाउ परमेस्वरको निगाहा हेन्जाङ बारका हिघाहि। हेन्जाङ द्याङगेलाइ परमेस्वरसो जिबन दान निङहि। इङको एअ्मि इसु ख्रिस्टको निगाहासो निङका हिघाखे। 16कालाउ परमेस्वर केलाइहेङ पिका बर दोअ्का आदमको पापखान्तेङ भेनेङ हि। इङको एअ्मि आदमको पाका पापसो झाराङ द्याङगेलाइता दार लोहि। कालाउ द्याङगेलाइ हेन्जाङ पाप पालउ बुङ परमेस्वरको एन्साङको बरहोइ धरमाति ठार्हाइन्हाका हि। 17जेसापा एअ्मि आदम पाप पानाङसिङ झाराङ द्याङगेलाइ सिलि गोइहि। कालाउ परेमवस्वर द्याङगेलाइहेङ इस्तुङपातेङ एन्साङ पिका निगाहाको बरहोइ एअ्मि इसु ख्रिस्टसो जिबन लोहि।
18जेसापा एअ्मि आदमको पापहोइ झाराङ द्याङगेलाइ सिकादारको भागि जेङहि। एन्सा दोङ एअ्मि ख्रिस्टको धरमाति कामहोइ झाराङ द्याङ परमेस्वरको आगा धरमाति जेङतेङ जिबन निङहि। 19जेसापा एअ्मि आदम हुकुम मानिकालाइ हेन्जाङ द्याङगेलाइ पाप जेङहि। एन्साङपातेङ एअ्मि ख्रिस्टको हुकुम मानिलाउ हेन्जाङ परमेस्वरको आगाता धरमाति जेङहि।
20द्याङगेलाइ हेथे हेन्जा पाप पाका हि दोअ्का नेलाइ ताइमिङ ग्याको दोअ्तेङ परमेस्वर एम्बालाइहेङ मोसाको न्याम पिहि। कालाउ द्याङगेलाइको पाप बार्हेलाउ बुङ इङको खान्तेङ हेन्जा परमेस्वर निगाहा पाहि। 21जेसापा पापसो सिका लोहि, एन्साङपातेङ परमेस्वरको निगाहासो द्याङगेलाइहेङ धरमाति बान्हाइहि। कालाउ प्रभु इसु ख्रिस्टसो हेअ्लाउ मामुअ्का जिबन लोहि।
المحددات الحالية:
रोमि 5: DHIM
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Nepal Bible Society and Wycliffe Bible Translators, Inc.
