रोमि 13
13
राज पाकालाइको आधिन
1झाराङ खामाल राज पाकालाइको आधिनता ह्याको। हाइदोनु परमेस्वरसो लोका खाबारामाकोसिङ बो हिदिङ खाबारा मान्थु। कालाउ जेदोङ राज पाकालाइ हि, इङको परमेस्वरसोङ साल्का। 2इदोइभाअ्सिङ जाइ राज पाकालाइको खिलापता हानिखे वा परमेस्वरसो साल्कालाइको खिलाप पाखे। कालाउ जाइजाइ खिलाप पाखे, एम्बालाइ दार भोग्यावा। 3हाइदोनु जाइजाइ रेम्का काम पाखे ओबालाइ राजपाकालाइसो थिलि मागोयाङ। कालाउ जाइजाइ आखेका काम पाखे ओबालाइ राजपाकालाइदोफा थिलि गोयाङ। हाइ नेलाइ राज पाकालाइको थिकासो छुटकारा जेङलि भोसुखेना? एन्सा पानु रेम्का काम पासु, कालाउ राज पाकालाइ नेलाइहेङ बाखिनावा। 4हाइदोनु राज पाकालाइ परमेस्वरको कामत्यागेलाइ रो वा एम्बालाइहेङ नेलाइको भालाइको भाअ्सिङ दोङ खाटाइका। एदि नेलाइ आखेका काम पासुखेना पानु राजपाकालाइदोफा थिसु रो एम्बालाइहेङ दार पिका खाबारा हि। हाइदोनु राज पाकालाइ ते आखेका काम पाकालाइहेङ दार पिका परमेस्वरको कामत्या। 5इदोइभाअ्सिङ परमेस्वरको दारसो बान्चिलिको भाअ्सिङ खिनिङ माको, कालाउ आकिलको भाअ्सिङ बुङ नेलाइ राज पाकालाइको आधिनता हिलिगोइस्वाना।
6नेलाइ तिरो तिरिलिचाहिँ ठिकोङ। हाइदोनु सारकार ताइको काम पोङघापालाउ परमेस्वरको भाअ्सिङ काम पातेङ हिखे।#मत्ति २२:२१; मरकुस १२:१७; लुका २०:२५ 7नेलाइ तिरिलिगोइका काथा झाराङहेङ तिरिसु: तिरो तिरिलि गोइकाहेङ तिरो, दस्तुर तिरिलि गोइकाहेङ दस्तुर, मान पालिगोइकाहेङ मान रो इजत पालिगोइकाहेङ इजत पासु।
मायाता लागितेङहिसु
8नेलाइ एअ्मि भेनेङहेङ दिनाङ माया पालिगोइका जिमा माकोसिङ हिदिङ रिन माफुसु। जाइ ताइ साअ् भेरपाकोहेङ माया पाखे, इङको परमेस्वरको न्यामहेङ पोङघापाका हिखे। 9का इदोइ नेलाइहेङ हाइपालि दोअ्दोङखा? हाइदोनु न्यामता इस्का लेखिका हि, “कासबिरि मापासु, मासेअ्सु, माखुसु, मादिअ्सु।” इदोइ हुकुमगेलाइ रो बो हुकुमगेलाइ “नेलाइ ताइको साअ् भेरपाकोहेङ ताइमिहेङ भाइपाङ माया पासु”#दामालाअ्का २०:१३-१७; न्याम ५:१७-२१; लेबि १९:१८ दोअ्का इदोइ एलोङ हुकुमता दोङ पोङघाखे। 10माया हासुहेङ बुङ हान्ति मापाखे। इदोइभाअ्सिङ माया पालि दोङ न्यामहेङ पोङघापालि।
11काङको दोअ्लि भोका इदोङ, हिसिका पहर लोदोङखे इङको नेलाइदोङ गिसुखेना। एला निन्धासो ल्होका पहर लोका हि हाइदोनु लाम्फा केलाइ खान्धुर पाका पहरखान्तेङ बुङ एला केलाइको छुटकारा झन भेरपा लोका हि। 12न्हिसिङ दोलि तोम्होइ रो एला फाइसालाम्का जेङलि तोम्काहि। इदोइभाअ्सिङ कितिकितिकाता पाका आखेका काम पालि लाअ्ताइने। कालाउ कितिकितिकादोफा फेअ्सुलि फाइसालाम्का पल्टनभाइपाङ त्यार ज्याइने। 13केलाइ दिनाको फाइसालाम्का भाइपाङ इमानि जेङतेङ काम पाइने। केलाइ न्हिसिङ भाइपाङ मोजमजा पाका, गोरा आम्तेङ म्हाका, कासबिरि पाका, छारा, झागारा रो दाहा पाका कामगेलाइ पालि लाअ्ताइने। 14भुरुङ इङको बादालाता प्रभु इसु ख्रिस्टभाइपाङ जेनाइने। कालाउ ताइको पापको आनिबानि रो इछा पोङघापाका काथाता मालाग्याइने।
المحددات الحالية:
रोमि 13: DHIM
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Nepal Bible Society and Wycliffe Bible Translators, Inc.
