लुका 4
4
साइतान इसुहेङ जाचिका
(मत्ति ४:१-११; मरकुस १:१२-१३)
1इसु पुनित हाङसासो पोङघातेङ यरदन झोरासो घुरिहि। पुनित हाङसा वासेहेङ उदादाङका थामेभारि चुमपुहि। 2इन्ता साइतान इसुहेङ न्हेकुरि दिनाथिकापा जाच पातेङ पापता फासेपालि भोहि। इङको न्हेकुरि दिनाथिकापा इसु हाइदोङ चानाङ मान्थुघाहि। एन्साजेङलाउ वा हेन्जाङ म्हितुतेङ हिघाहि। 3इङको पहरदोङ साइतान इसुहेङ दोअ्हि, “पाक्का दोङ ना परमेस्वरको चान हिनुते इदोइ उन्ठुइहेङ तोले जेङ दोअ् कालाउ उदोङघरि तोले जेनावा।” 4इसु वासेहेङ दोअ्हि, “परमेस्वरको बचनता इस्का लेखिका हि, द्याङ चाकाआनेमानेसो खिनिङ माबान्चिखे।”#न्याम ८:३
5इङकोन्हुअ्सो साइतान इसुहेङ झाउका आरदाङता चुमपुतेङ एघुरिताङ सुमिङको गोताङ सारभिगेलाइ तिम्पातेङ वासेहेङ दोअ्हि, 6“का नासेहेङ इदोइ गोताङ सारभिको राजा रो इदोइ गोताङ टाका काउरिको मालिक बान्हाइलि द्वाङका। हाइदोनु इदोइ गोताङ थोक काङकोङ खुरता हि रो काङको मन चाकालाइहेङ पिलि द्वाङका। 7कासेहेङ सेउपा रो इदोइ गोताङ थोक नाङकोङ ज्यावा।” 8इसु वासेहेङ दोअ्हि, “परमेस्वरको बचनता इस्का लेखिका हि, ना ताइको परमेस्वरहेङ खिनिङ माने रो वाको खिनिङ सेवा पा।”#न्याम ६:१३
9साइतान इसुहेङ यरुसलेमता चुमपुहि, कालाउ थानको तुपाता थुकापातेङ दोअ्हि, “जातिङको ना परमेस्वरको चान हिनु ना इतासो लेता धासे। 10हाइदोनु धरमकिताबता एसापा लेखिका हि:
नासेहेङ सामार्हाइलि परमेस्वर ताइको स्वरगदुतगेलाइहेङ दिङगिलावा।
11नाङको खोकोइ बुङ उन्ठुइता माबोखेन्हाको दोअ्तेङ एम्बालाइ नासेहेङ खुर खुरताङ खोअ्तावा।”#ले ९१:११-१२
12इसु दोअ्हि, “धरमकिताबता इस्का बुङ लेखिका हि, ना ताइको परमेस्वरहेङ जाच मापा।”#न्याम ६:१६ 13साइतान इसुहेङ नानाउलि जाच पातेङ जाचता फासिपालि भोतेङ आरोङ दावा मानिङपाधाउ लाअ्तेङ हानिहि।
इसु सेवाको काम पालि तेङका
(मत्ति ४:१२-१७; मरकुस १:१४-१५)
14इसु पुनित हाङसाको सरबङता गालिलता घुरिहि। वाको बारेता चारबितिङ चारचाराइलि तेङहि। 15वा कचहरिसाअ्ता बिद्या पिलि तेङलाउ, झाराङ वासेहेङ बाखिनघाखे।
नासरतको द्याङगेलाइ इसुहेङ खान्धुरि मापाहि
(मत्ति १३:५३-५८; मरकुस ६:१-६)
16इसु नासरत पुरता लोहि। जेता वा बाराका हिघाहि। दिनाङ भाइपाङ वा पुनित माइसाका दिना कचहरिसाअ्ता हानिहि रो धरमकिताब पर्हिलि जाअ्हि। 17वासेहेङ यासाइया परमेस्वर पाहासो धुइकाको लेखिका किताब पर्हिलि पिहि। कालाउ किताब हेतेङ वा इस्का लेखिका ओल्हिपातेङ पर्हिहि:
18प्रभु परमेस्वर ताइको हाङसा काङकोर्हुता हुपिका हि,
गरिबगेलाइहेङ रेम्काबानाल हिङपालि वा कासेहेङ आभिसेक पातेङ दिङगिल्का हि।
काइदिगेलाइहेङ लाअ्पालि, कान्हागेलाइहेङ तिङका बान्हाइलि,
आनियाता परिकालाइहेङ ल्होपालि
19रो ताइको द्याङगेलाइहेङ छुटकारा पिका पहर लोहोइ दोअ्तेङ पारचार पालि
प्रभु परमेस्वर कासेहेङ दोङ साल्का हि।#यासाइया ६१:१
20इङकोन्हुअ्सो इसु किताब थुमतेङ एअ्मि सेबकहेङ पिहि रो कालाउ वा योम्हि। इन्ता कचहरिसाअ्ता हिका झाराङ भारभुसाइतेङ वासेहेङदोङ खाङतेङ हिघाहि। 21कालाउ इसु एम्बालाइहेङ दोअ्हि, “धरमकिताबको इदोइ काथा नानि नेलाइ हिङकाहिङकाताङ पोङघाका हि।”
22झाराङ द्याङगेलाइ इसुहेङ बाखिनहि। वाको निगाहासो पोङघाका काथा हिङतेङ एम्बालाइ भारभुसाइतेङ दोअ्हि, “हाइ या योसेफको चान माको?” 23कालाउ इसु दोअ्हि, “एला पाक्का बुङ नेलाइ कासेहेङ ‘ओइ बोइद्या! ना ताइमिहेङ एल्पा’ कालाउ ‘कफरनहुमता पाकाभाइपाङ ताइको देराता बुङ भारभुसाइका काम पा’ दोअ्स्वाना।”
24काथा दोपातेङ वा दोअ्हि, “जातिङको का नेलाइहेङ दोअ्ताङका, हिदोइ बुङ परमेस्वर पाहासो धुइकाहेङ ताइको देरा पुरको द्याङगेलाइ खान्धुर मापावा।#युहन्ना ४:४४ 25भेनेङ एलोङ काथा बुङ का नेलाइहेङ दोअ्ताङका, एलिया परमेस्वर पाहासो धुइकाको पालाता सुम बाअ्सार तु माहिन्हाथिकापा वाइ मालोतेङ बारका आनिकाल जेङका हिघाहि। इङको पहर इस्राएलता हेन्जाङ रान्दिगेलाइ हिघाखे।#१ राजा १७:१ 26सिदोन माउजाता हिका सारपत देराको बिधुइकोता खिनिङ परमेस्वर एलियाहेङ दिङगिल्हि।#१ राजा १७:८-१६ 27एन्साङ एलिसा परमेस्वर पाहासो धुइका हिलाउ इस्राएलता हेन्जाङ रोग्याखोअ्कालाइ हिघाखे। कालाउ एम्बालाइता सिरिया सारभिको नामान दोअ्का द्याङखिनिङ एल्हि आरोङ हासु बुङ माएल्हि।”#२ राजा ५:१-१४
28इदोइ काथा हिङतेङ कचहरिसाअ्को झाराङ द्याङगेलाइ चेरताम्पाहि। 29कालाउ एम्बालाइ जुरु जारापा ल्होतेङ इसुहेङ तान्हितेङ पुरसो बाहार ओल्हिपागिल्हि। एम्बालाइको इदोइ पुर झाउका थामेता हिघाहि। एम्बालाइ वासेहेङ झाउका आरदाङसो थाललि खाङहि। 30कालाउबुङ वा द्याङगेलाइको चेपेरेचेअ्कासो ओल्हितेङ ताइको दामा लाअ्हि।
मासान खोअ्का द्याङ एल्का
(मरकुस १:२१-२८)
31इङकोन्हुअ्सो इसु गालिल माउजाको कफरनहुम दोअ्का पुरता लोहि। माइसाका दिनाता वा द्याङगेलाइहेङ धिरपाघाहि। 32वाको बिद्या हिङतेङ एम्बालाइ भारभुसाइहि हाइदोनु वा एम्बालाइहेङ खाबारासो धिरपाघाहि।#मत्ति ७:२८-२९
33कचहरिसाअ्ता एअ्मि मासान खोअ्का द्याङ हिघाहि। इङको द्याङ र्हिकाइतेङ दोअ्हि, 34“ओइ नासरतको इसु, ना केलाइहेङ हाइपालि भोखेना? हाइ ना केलाइहेङ नास पालि लोका हिना? ना परमेस्वरसो दिङगिल्का पुनित द्याङ हिना दोअ्तेङ का नाल्खा।” 35इदोइ हिङतेङ इसु इङको मासानहेङ हाकाराइतेङ दोअ्हि, “सिकापा हि रो इदोइ द्याङसो ओल्हितेङ हाने!” इङको द्याङहेङ झाराङको आगाता लोम्पातेङ मासान ओल्हितेङ हानिहि। कालाउ वासेहेङ हाइदोङ चोट पटक मालागिहि।
36कालाउ झाराङ द्याङगेलाइ भारभुसाइतेङ काथा पालि तेङहि, “इदोइ द्याङको धुइकाता हिसिका खाबारा हिघाखे। वा दोअ्तेङसाङ मासानगेलाइ बुङ ओल्हितेङ खाअ्तेङ हानिखे।” 37कालाउ कफरनहुम पुरको चारबितिङ इसुको नावाइ चारचाराइ न्हाहि।
इसु हेन्जाङ द्याङगेलाइहेङ एल्पाका
(मत्ति ८:१४-१७; मरकुस १:२९-३४)
38कचहरिसाअ्सो ओल्हितेङ इसु सिमोनको साअ्ता हानिहि। इङको पहर सिमोनको जुबे मेसालोतेङ ल्होलि दोअ्का मान्थुघाखे। साअ्को द्याङगेलाइ “वासेहेङ एल्पापि” दोअ्तेङ इसुहेङ बिम्ति पाहि। 39इसु वाको भेरपाङ हानितेङ मेसाहेङ हाकाराइहि रो ओदोङघरि मेसा एल्हि। कालाउ वा ल्होतेङ ओबालाइको सेवा पालि तेङहि।
40बेला दुबिलि तोम्लाउ द्याङगेलाइ हेन्जा खाल्को बेथा हिका रो रोगाइकालाइहेङ इसुकोता चुमाहि। वा एम्बालाइर्हुता खुर ताअ्तेङ झाराङहेङ एल्पाहि। 41हेन्जाङ द्याङगेलाइसो मासानगेलाइ र्हिकाइतेङ एसा दोअ्तेङ ओल्हिहि, “ना परमेस्वरको चान हिना।” कालाउबुङ इसु इङको मासानगेलाइहेङ सिकापा हिसु दोअ्तेङ नुइधुइलि दोङ मापिहि। हाइदोनु एम्बालाइ वासेहेङ छुटकारा पिका ख्रिस्ट हि दोअ्तेङ नाल्घाखे।
इसुको काम
(मरकुस १:३५-३९)
42र्हिमा झेङतेङसाङ इसु चाकामान्दाका थामेभारि हानिहि। कालाउ द्याङगेलाइ वासेहेङ भोतेङ हानिहि। वासेहेङ निङतेङसाङ एम्बालाइ, “केलाइहेङ लाअ्तेङ मान्हे” दोअ्तेङ रोकिलि बल पाहि। 43इसु एम्बालाइहेङ दोअ्हि, “का स्वरगको सारभिको रेम्काबानाल बो थामेता बुङ हिम्पालिगोयाङ दोअ्तेङ परमेस्वर कासेहेङ इदोइ काम पालि दिङगिल्का हि।” 44कालाउ एसापा वा गोताङ यहुदिया माउजाको कचहरिसाअ्गेलाइता हानितेङ धिरपाहि।
المحددات الحالية:
लुका 4: DHIM
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Nepal Bible Society and Wycliffe Bible Translators, Inc.
