लुका 10
10
इसु सुमकुरितेन्हे चात्याहेङ दिङगिल्का
1इङकोन्हुअ्सो इसु प्रभु बो सुमकुरिते न्हेमि#१०:१पुरना बाइबलता सुमकुरितेमिँ चात्यागेलाइ दोअ्तेङ बुङ लेखिका हि। द्याङगेलाइहेङ साल्हि। एम्बालाइहेङ न्हेमि न्हेमि पातेङ ताइमि हानिलि तोम्का देरा रो पुरभारि ताइमिखान्तेङ लाम्फा दिङगिलतेङ दोअ्हि, 2“तोल्हेलिगोइका बालि ते हेन्जाङ हि, कालाउ बालि सान्तेका जनगेलाइ आतुइसा खिनिङ हि। एला बालिको मालिकदोफा पारथाना पासु वा ताइको बालिता जनगेलाइ दिङगिलप्याको।#मत्ति ९:३७-३८ 3एला नेलाइ हानिसु, हाइदोनु भेरागेलाइहेङ स्याइलेगेलाइको माझाता दिङगिल्का भाइपाङ का नेलाइहेङ द्याङगेलाइको माझाता दिङगिल्दोङखा।#मत्ति १०:१६ 4नेलाइ हानिलाउ टाका, झोला, जुता हाइदोङ माचुम्सु। कालाउ दामाता द्याङगेलाइदोफा माआवाइसु।
5 “नेलाइ जेदोङ साअ्ता दुलस्वाना झाराङखान्तेङ लाम्फा ‘इदोइ साअ्ता सान्ति ज्याको’ दोअ्तेङ सहसाम्पा पिसु। 6इङको साअ्ता सान्ति निङलि योग्यको द्याङ हिनुते नेलाइको सान्ति इन्ताङ ह्यावा। कालाउ इन्सिका द्याङ मान्थुनु ते नेलाइको सान्ति नेलाइदोफाङ घुरितेङ ल्वावा। 7नेलाइ इङको साअ्ता हिसु कालाउ एम्बालाइ हाइ चालि पिखे इङको चासु। हाइदोनु जनगेलाइ जेला निङलि दोङ गोयाङ। साअ् साअ् बासा हितेङ माहिगिल्सु।#१ कोरिन्थि ९:१४; १ तिमोथि ५:१८
8 “एसाङपातेङ पुरगेलाइता हानिलाउ बुङ इन्ताको द्याङगेलाइ नेलाइहेङ सेउपातेङ चालि पिका आनेमाने चासु। 9कालाउ इन्ता हिका रोगाइकालाइहेङ एल्पासु रो एम्बालाइहेङ ‘स्वरगको सारभि नेलाइ भेरपा लोलि तोम्काहि’ दोअ्तेङ पारचार पासु। 10कालाउ जेदोङ पुरता नेलाइ हानिस्वाना इन्ताको द्याङगेलाइ नेलाइहेङ स्वागत मापानु इङको दामागेलाइता ओल्हितेङ#साल्तेङ दिङगिल्का १३:५१ 11‘केलाइ नेलाइको पुरको धुलासुदाङ नेलाइको खिलापता केलाइको खोकोइसो थिदोङन्हाखे। कालाउ नेलाइ गिसु, स्वरगको सारभि लोलि तोम्काहि’ दोअ्तेङ इङको द्याङगेलाइहेङ हिम्पासु।#मत्ति १०:७-१४; मरकुस ६:८-११; लुका ९:३-५ 12का नेलाइहेङ दोअ्ताङका, परमेस्वरको नियाको दिनाता इङको पुरको द्याङगेलाइको पिरखान्तेङ भुरु पापसो पोङघाका सदोम पुरको द्याङगेलाइको दासा सहिलि दोका जेनावा।#सिरजाइ १९:२४-२८; मत्ति १०:१२; ११:२४
खान्धुर मापाका पुरको द्याङगेलाइ
(मत्ति ११:२०-२७; १३:१६-१७)
13 “खोराजिन रो बेथसेदाको द्याङगेलाइ, नेलाइहेङ धिकार! नेलाइको माझाता पाका भारभुसाइका कामगेलाइ टुरोस रो सिदोन पुरता पाका हिनुते इन्ताको द्याङगेलाइ हेन्जाङ लाम्फादोङ बोराको धाबा लागाइतेङ बुअ्सुरि लाइधावा रो पास्ताइधावा। #
यासाइया २३:१-१८; इजकिएल २६:१; २८:२६; योएल ३:४-८; आमोस १:९-१०; जकरिया ९:२-४ 14नियाको दिनाता नेलाइको तु: खान्तेङ टुरोस रो सिदोनको द्याङगेलाइको तु: थामेलि दोका ज्यावा। 15ओइ कफरनहुमको द्याङगेलाइ, हाइ नेलाइ स्वरगता थुकाङका दोअ्सुखेना? नेलाइते साइतान हिका नरकता दोङ थुकास्वाना।”#यासाइया १४:१३-१५
16इसु चात्यागेलाइहेङ दोअ्हि, “नेलाइको काथा हिङकालाइ काङकोङ काथा हिनावा। नेलाइहेङ मामानिकालाइ कासेहेङ दोङ मामान्यावा। कालाउ कासेहेङ मामानिकालाइ कासेहेङ दिङगिल्का परमेस्वरहेङ दोङ मामान्यावा।”#मत्ति १०:४०; मरकुस ९:३७; लुका ९:४८; युहन्ना १३:२०
सुमकुरितेन्हे चात्यागेलाइ घुरितेङ लोका
17जेलाउ इसुको दिङगिल्का सुमकुरिते न्हेमि चात्यागेलाइ घुरितेङ लोहि कालाउ लेङचातेङ वासेहेङ दोअ्हि, “मास्टर, नाङको मिङको खाबराहोइ मासानगेलाइ बुङ केलाइको आधिनता लोहि।” 18इसु एम्बालाइहेङ दोअ्हि, “का मासानको मालिक साइतानहेङ बिजुलि जोल्काभाइपाङ आकाससो हुल्का तिङघा। 19हिङसु, का नेलाइहेङ पुह्याँ रो बिच्छिहेङ याङतेङ हिगिल्का सरबङ कालाउ दुस्मनको गोताङ सरबङहेङ जितिका खाबारा पिका हिघा। हिदोइ बुङ काथाहोइ नेलाइहेङ नोक्सान मापावा।#ले ९१:१३ 20कालाउ मासानगेलाइ केलाइको आधिनता लोका हि दोअ्तेङ नेलाइ मालेङचासु। भुरुङ ताइको मिङ स्वरगता लेखिका हि दोअ्तेङ लेङचासु।”
21इङकोङ घरि पुनित हाङसासो पोङघातेङ इसु दोअ्हि, “परमेस्वर आबा, स्वरग रो सुमिङको मालिक, का नासेहेङ च्याबास प्याङका। हाइदोनु बुद्धिहिका रो आकिलहिकालाइसो म्होअ्तेङ ताअ्का काथा ना हाइदोङ मागिकालाइहेङ धिरपान्हा! आबा, एसाङ पालि नाङको इछा हिघाहि!
22 “काङको आबा कासेहेङ गोताङ थोक जिम्मा पिका हि। आबाबिना का चानहेङ हासुङ मानाल्खे। एन्साङ चान रो वाको नाल्पाका द्याङगेलाइ बिना बो हासु बुङ आबाहेङ मानाल्खे।” #
युहन्ना ३:३५; १०:१५
23इङकोन्हुअ्सो इसु चात्यागेलाइभारि घुरितेङ एम्बालाइहेङ सिकापा दोअ्हि, “इदोइ गोताङ थोक तिङलि निङका नेलाइ हेथे सहसाम्पा निङका हिसुन्हा! 24का नेलाइहेङ दोअ्खा, हेन्जाङ परमेस्वर पाहासो धुइका रो राजागेलाइ नेलाइको तिङका इदोइ थोकगेलाइ खाङलि रो हिङलि बारका इछा पाका हिघाहि। कालाउ एम्बालाइ खाङलि रो हिङलि बुङ मानिङहि।”
रेम्का सामरि
(मत्ति २२:३४-४०; मरकुस १२:२८-३१)
25एअ्नि एअ्मि धरम मास्टर लोतेङ इसुहेङ आल्पातेङ दोअ्हि, “मास्टर, हेअ्लाउ मामुअ्का जिबन निङलि हाइ पालिगोयाङ?”#मत्ति २२:३५-४०; मरकुस १२:२८-३४ 26इसु वासेहेङ दोअ्हि, “याको बारेता न्याम हाइ दोअ्खे? इन्ता ना हाइ पर्हिका हिन्हा?” 27धरम मास्टर दोअ्हि, “ना परमप्रभु ताइको परमेस्वरहेङ ताइको गोताङ कोन्धाङ, गोताङ हाङसा, गोताङ सरबङ रो गोताङ मनसो माया पा कालाउ ताइ भेरपाकोहेङ ताइमिहेङ भाइपाङ माया पा।”#न्याम ६:५; लेबि १९:१८ 28इसु दोअ्हि, “ना ठिकदोङ दोअ्न्हा। एन्साङ पा कालाउ ना बानच्याना।”#लेबि १८:५ 29इङको धरम मास्टर ताइमिहेङ धरमाति तिम्पालि भाअ्सिङ इसुहेङ दोअ्हि, “एन्सानु काङको साअ्भेरपाको द्याङ हासु कुनु?”
30इसु वासेहेङ दोअ्हि, “एअ्मि द्याङ यरुसलेमसो लेता यरिहो दोअ्का पुरभारि हानिदोङघाहि। दामाता वासेहेङ खुकालाइ रिम्तेङ नाङघाङ पातेङ आधामारापाङ दान्हाइतेङ लाअ्धिहि। 31आसा न्हुअ्सो एअ्मि धामि इङकोङ पाहा लोहि। कालाउ इङको घाइते द्याङहेङ तिङतेङ वा दुरेसोङ भेन्चाकाइतेङ हानिहि। 32एसाङपातेङ लेबि खालको एअ्मि धामि बुङ इङकोङपाहा लोहि। वा बुङ इङको घाइते द्याङहेङ तिङतेङ दुरेसोङ भेन्चाकाइतेङ हानिहि। 33एअ्मि सामरि बुङ इङकोङपाहा लोहि। इङको घाइते द्याङहेङ तिङलाउ वाको मन दायासो पोङघातेङ लोहि।#२ इतिहास २८:१५ 34कालाउ वा भेरपा हानितेङ वाको पेचाराता जाइतुनको चुइति रो आङगुरको निघार लागाइपितेङ चेन्थ्राहोइ जिङपिहि। इङकोन्हुअ्सो वा घाइत्या द्याङहेङ ताइको गाधाता धोल्पातेङ एलोङ आतुइका बासा हिका थामेता चुमपुहि। कालाउ झेङपाङ ताइमिङ वासेहेङ सामर्हाइहि। 35जुम्नि र्हिमाङ हानिका पहरता सामरि बासा हिका थामेको मालिकहेङ रुपाको न्हे टाका पितेङ दोअ्हि, ‘एला का हानाङका, यासेहेङ रेम्फा खाङपि। यासेहेङ ख्याल पालाउ हेथे खारचा जेङखे का घुरितेङ लोलाउ नासेहेङ प्याङका’।”
36इदोइ उदारनको काथा दोअ्कान्हुअ्सो इसु धरम मास्टरहेङ हिअ्हि, “इदोइ सुमिता हासुचाहिँ खुकाको खुरता परिका द्याङहेङ भेरपाको द्याङ भाइपाङ माया पाहि वाला?” 37धरम मास्टर दोअ्हि, “दाया पाका द्याङ!” इसु दोअ्हि, “हाने, ना बुङ एन्साङ पा।”
मारथा रो मरियमदोफा इसु दुसुका
38एअ्नि इसु रो वाको चात्यागेलाइ हानिकाताङ पालाउ एलोङ देराता थुकाहि। इन्ता मारथा मिङ हिका बेबाल ओबालाइहेङ ताइको साअ्ता स्वागत सत्कार पाहि।#युहन्ना ११:१ 39वाको मरियम मिङ हिका एअ्मि ओने हिघाहि। वा प्रभु इसुको खोकोइ भेरपा योम्तेङ वाको बिद्या हिङलि तेङहि। 40कालाउ मारथा साअ्को गोताङ काम ताइमिखिनिङ पालिगोइनाङ वा इसुकोता लोतेङ दोअ्हि, “मास्टर, साअ्को गोताङ कामगेलाइ का खिनिङ पालिगोइखा। कालाउ काङको ओने मरियम हाइदोङ मापाखे। हाइ ना मातिङखेना? वासेहेङ लोतेङ कासेहेङ काम पालि साघाइलि दोअ्पि।” 41प्रभु इसु वासेहेङ दोअ्हि, “ओइ मारथा, ना हेन्जाङ काथाको सुरता रो फिकिर पाखेना। 42कालाउ गोइका थोक एलोङखिनिङ हि, इङको रेम्का काथा मरियम साल्काहि। इङको वाकोसो माघिन्हावा।”
المحددات الحالية:
लुका 10: DHIM
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Nepal Bible Society and Wycliffe Bible Translators, Inc.
