साल्तेङ दिङगिल्का 3
3
पत्रुस नेङगाराहेङ एल्पाका
1एअ्नि पत्रुस रो युहन्ना नितिमाको सुम बजेभारि थानता पारथाना पालि हानिदोङघाखे। 2थानलिअ्ता दुलकालाइदोफा र्हेलि जोलोमसोङ एअ्मि नेङगाराहेङ द्याङगेलाइ फुतेङ चुमाघाखे रो दिनाङ थानको रेम्का मिङ हिका फिनुता ताअ्पिघाखे। 3पत्रुस रो युहन्नाहेङ थानलिअ्ता दुल्लि तोम्का तिङतेङ इङको र्हेतेङ। 4एम्बालाइ वासेहेङ रेम्फा खाङतेङ पत्रुस दोअ्हि, “केलाइभारि खाङ!” 5पत्रुस रो युहन्नासो हाइदोङ निङका आस पातेङ इङको एम्बालाइहेङ रेम्फा खाङहि। 6कालाउ पत्रुस दोअ्हि, “सोना रुपा कादोसा मान्थु। कालाउबुङ जेदोङ कादोसा हि, इङकोङ का नासेहेङ प्याङका। नासरतको इसु ख्रिस्टको मिङता ते।” 7एसा दोअ्तेङ पत्रुस इङकोको दाम्पाहा खुर चातेङ इङकोहेङ ल्होपाहि। ओदोङघरि इङकोको खोकोइगेलाइता रो तिर्होगेलाइता बल लोहि। 8कालाउ इङको थिङगापा जाअ्हि रो तेलि तेङहि। इङको तेतेङ रो तोङतेङ परमेस्वरहेङ बाखिन्तेङ एम्बालाइदोफा थानता दुल्हि। 9कालाउ झाराङ द्याङगेलाइ वासेहेङ तेतेङहिका रो परमेस्वरहेङ बाखिन्तेङ हिका तिङहि। 10एम्बालाइ वासेहेङ थानको रेम्का दोअ्का फिनुता र्हेलि योम्तेङ हिका या दोङ दोअ्तेङ नाल्हि। कालाउ इङको हेसापा तेलि दोहि दोअ्तेङ एम्बालाइ झाराङ भारभुसाइहि।
थानता पत्रुसको आरति
11इङको द्याङ पत्रुस रो युहन्नाको न्हअ्न्हुअ् हानिका तिङतेङ झाराङ द्याङगेलाइ भारभुसाइतेङ सोलोमन मिङ हिका धाअ्ता दोसाङ एम्बालाइकोता धाअ्तेङ लोहि। 12इदोइ तिङतेङ पत्रुस द्याङगेलाइहेङ दोअ्हि, “इस्राएलको द्याङगेलाइ, इदोइ काथाता नेलाइ हाइपालि भारभुसाइ सुखेना? केलाइको ताइको सरबङ रो भक्तिसो यासेहेङ तेलि दोका बान्हाइन्हाहि दोअ्तेङ नेलाइ फोम पासुखेना? 13एन्सा माको, केलाइको आजुखाल आब्राहाम, इसहाक रो याकुबको परमेस्वरदोङ ताइको कामत्या इसुहेङ पारतापि बान्हाइहि। जाइहेङ नेलाइ रिम्तेङ पिलातसको खुरता पिसुन्हा। कालाउ पिलातस वासेहेङ लाअ्पिलि भोलाउ बुङ नेलाइ वाकोङ आगाता माकिअ्सुन्हा।#दामालाअ्का ३:१५ 14वा पुनित रो दुस मान्थुका हिघाहि। कालाउबुङ नेलाइ वाको थामेता एअ्मि द्याङ सेअ्काहेङ लाअ्पिलि र्हेसुन्हा।#मत्ति २७:१५-२३; मरकुस १५:६-१४; लुका २३:१३-२३; युहन्ना १९:१२-१५ 15एसापा नेलाइ जिबन पिकाहेङ सेअ्सुन्हा। जाइहेङ परमेस्वर सिकासो सिन्हुपाहि, केलाइ याको दासि हिन्हाहि। 16इसुको मिङता खान्धुर पानाङसिङ वाकोङ मिङहोइ नेलाइ तिङका रो गिका इदोइ द्याङहेङ बोल्याका बान्हाइहि। वासो निङका इङकोङ खान्धुरसो इदोइ द्याङ नेलाइ झाराङको आगाता पुराङ एल्का तिङदोङसुखेना।
17“ओइ काङको दादाओनेगेलाइ, का गिखा, नेलाइ मागिसिङ एन्सा पासुन्हा रो नेलाइको हाकिमगेलाइ बुङ एन्साङ पाहि। 18ख्रिस्ट पिर भोगिलिगोयाङ दोअ्तेङ परमेस्वर झाराङ परमेस्वर पाहासो धुइकाको नुइसो दोअ्का काथा वा एसापा पोङघापाहि। 19इदोइभाअ्सिङ पास्ताइसु रो परमेस्वरकोता घुरिसु रो नेलाइको पाप माअ्ताको। एसापा परमप्रभुसो हाङसाता सान्ति रो सरबङ निङस्वाना। 20परमेस्वर नेलाइको भाअ्सिङ साल्का ख्रिस्ट इसुहेङ दिङगिलप्यावा। 21कालाउबुङ पुनित परमेस्वर पाहासो धुइकालाइ दोअ्का भाइपाङ परमेस्वर गोताङ काथा नावा सिरजाइका पहर मालोपाधाउ इसु स्वरगताङ ह्यावा। 22मोसा बुङ एसा दोअ्का हिघाखेः
‘परमप्रभु परमेस्वर कासेहेङ जाअ्पाकाभाइपाङ नेलाइको दादाओनेसो एअ्मि परमेस्वर पाहासो धुइका जाअ्पावा। वाको दोअ्का गोताङ काथा नेलाइ हिङलि गोइस्वाना।#न्याम १८:१५,१८
23कालाउबुङ वाको काथा माहिङका द्याङगेलाइचाहिँ परमेस्वर पाहासो धुइकालाइसो खेङन्हातेङ मुअ्तावा।’#न्याम १८:१९
24“सामुएल रो वाकोन्हुअ्सोको झाराङ परमेस्वर पाहासो धुइकालाइ बुङ आन्जिनानि जेङका इदोङ काथागेलाइको बारेता दोअ्का हिघाखे। 25नेलाइ इङकोङ परमेस्वर पाहासो धुइकालाइको खाल हिसुन्हा। जेदोङ केरा परमेस्वर नेलाइको आजुखाल आब्राहामदोफा एसा दोअ्तेङ चाहि, नाङको खालसो सुमिङको गोताङ जात्यागेलाइ सहसाम्पा निनावा।#सिरजाइ १२:३; २२:१८; २६:४ 26नेलाइ झाराङहेङ ताइको दुरजनसो घुरिपातेङ नेलाइहेङ सहसाम्पा पिलि दोअ्तेङ परमेस्वर ताइको कामत्याहेङ जाअ्पाहि रो झाराङखान्तेङ लाम्फा नेलाइकोता दिङगिल्हि।”
المحددات الحالية:
साल्तेङ दिङगिल्का 3: DHIM
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Nepal Bible Society and Wycliffe Bible Translators, Inc.
