साल्तेङ दिङगिल्का 23
23
1पावल कचहरिको चारबितिङ खान्तेङ दोअ्हि, “दादाओनेगेलाइ, नानिको दिनाथिकापा परमेस्वरको आगाता का सुदो मनपातेङ बान्चितेङ हिघा।” 2पावलको इदोइ काथा दोअ्का हिङतेङ झाराङखान्तेङ बारका धामि हननिया पावल भेरपाङ जाअ्का द्याङगेलाइहेङ वाको नुइता चाउर्हिलि हुकुम पिहि। 3कालाउ पावल हननियाहेङ दोअ्हि, “ओइ कपटि! नासेहेङ बुङ परमेस्वर चाउर्हियावा। ना न्याम आन्सार काङको न्याय पालि हितेङ बुङ हाइपालि न्याम मिचितेङ कासेहेङ चाउर्हिलि हुकुम पिखेना?”#मत्ति २३:२७,२८ 4पावलको भेरपाङ हिकालाइ दोअ्हि, “हाइ ना परमेस्वरको ठार्हाइका झाराङखान्तेङ बारका धामिहेङ बुङ चेरखेना?” 5पावल दोअ्हि, “दादाओनेगेलाइ, वादोङ झाराङखान्तेङ बारका धामि हि दोअ्का कासेहेङ था मान्थुघाहि। ताइको द्याङगेलाइहेङ खाबारा पाका हाकिमको खिलापता मारेम्का काथा धुइलिमाएल दोअ्का धरमकिताबता लेखिका इङको काथा का गिखा।”#दामालाअ्का २२:२८
6बाराकचहरिता सदुकि रो फरिसि मन्डलिको द्याङगेलाइ योम्का हि दोअ्का काथा गितेङ पावल बारका गालापातेङ दोअ्हि, “दादाओनेगेलाइ, का फरिसिको चान फरिसि दोङ हिघा। सिका द्याङ आरोङ सिन्हुताङ दोअ्का आस ताअ्नाङसिङ इता काङको मुदा चलिदोङखे।”#साल्तेङ दिङगिल्का २६:५; फिलिप्पि ३:५
7पावलको दोअ्का इदोइ काथासो सदुकि रो फरिसिगेलाइ मामिलिसुतेङ न्हे हुलता खेङन्हाहि 8हाइदोनु सदुकिगेलाइ द्याङ सिकान्हुअ्सो आरोङ सिन्हुतावा दोअ्का काथाता खान्धुर मापाघाखे कालाउ स्वरगदुत रो हाङसागेलाइ मामामान्थु दोअ्घाखे। कालाउबुङ फरिसिगेलाइ चाहिँ इदोइ सुम काथाता खान्धुर पाघाखे।#मत्ति २२:२३; मरकुस १२:१८; लुका २०:२७ 9इन्ता बारका गालाबाजि जेङहि रो फरिसि मन्डलिको आधे धरम मास्टरगेलाइ जाअ्तेङ एसा दोअ्तेङ बिरोध पालि तेङहि, “इदोइ द्याङता केलाइ हाइदोङ दुस मातिङन्हाखे। इदोइ द्याङदोफा हिदिङ हाङसा माकुनु स्वरगदुतको धुइका दोङ हिनु हाइ जेङहि कुनु!”
10एम्बालाइको झागारा हेन्जाङ बार्हेतेङ हानिहि। झागाराता पावलहेङ याङतेङ सेअ्ताङ बे दोअ्तेङ रोमि पलटनको हाकिम थिहि कालाउ पावलहेङ कचहरिसो ओल्हिपातेङ ब्यारेकलिअ्ता चुमपुसु दोअ्तेङ पलटनगेलाइहेङ हुकुम पिहि।
11इङकोङ न्हिसिङता प्रभु पावलको भेरपाङ देखाल पितेङ दोअ्हि, “साहासपा, माथि! इता यरुसलेमता काङको दासि पिकाभाइपाङ ना रोमता बुङ पिलिगोयाना।”
पावलहेङ सेअ्लि भोका
12जुम्निदिना र्हिमाङ यहुदिगेलाइ जोम्तेङ पावलहेङ सेअ्लि साल्हा पाहि कालाउ एम्बालाइ एसा दोअ्तेङ केरा चाहि, “पावलहेङ मासेअ्पाधाउ केलाइ हाइदोङ माचाङ रो चि बुङ माआमाङ।” 13एसापा सेअ्ताङ दोअ्तेङ केरा चाकालाइ न्हेकुरि खान्तेङ हेन्जा हिघाखे। 14इङकोन्हुअ्सो एम्बालाइ मुल धामिगेलाइ रो यहुदि आगुवागेलाइकोता हानितेङ दोअ्हि, “केलाइ पावलहेङ मासेअ्पाधाउ हाइदोङ माचाङ दोअ्तेङ केरा चाका हिन्हाहि। 15एला नेलाइ रोमि पलटनको हाकिमहेङ ‘बाराकचहरिसो पावलदोफा बो काथागेलाइ बुङ हिअ्लि गोइका हि’ दोअ्तेङ पावलहेङ ब्यारेकसो दिङगिल्पिसु। कालाउ बाराकचहरिता लोकाताङ पालाउ केलाइ वासेहेङ दामाताङ सेअ्ताङ।”
16कालाउ इङको यहुदिगेलाइ पावलहेङ ढुकितेङ सेअ्लि भोका काथा वाको भागेना गिहि। वा ब्यारेकता हानितेङ मामाइहेङ हिङपाहि। 17कालाउ पावल ओदोङघरि एअ्मि काप्तानहेङ काइतेङ दोअ्हि, “इदोइ वाजानको रोमि पलटनको हाकिमदोफा बिम्ति चार्हाइलिगोइका हि आङ, यासेहेङ वाकोता सिरपु।” 18काप्तान पावलको भागेनाहेङ रोमि पलटनको हाकिमकोता चुमातेङ दोअ्हि, “काइदि पावल कासेहेङ काइतेङ इदोइ वाजानको बिम्ति चार्हाइलिगोइका हि दोअ्नाङसिङ यासेहेङ नाङकोता चुमापिका हिघा।”
19रोमि पलटनको हाकिम इङको वाजानको खुर चा:तेङ आसा ओसो चुमपुतेङ हिअ्हि, “हाइ दोअ्लिगोइका हि? दोअ्।” 20वाजान दोअ्हि, “जुम्नि यहुदिगेलाइ पावलहेङ बाराकचहरिता बो काथा हिअ्लि चुमपुलि निनाको दोअ्तेङ नाङकोता बिम्ति पालि लोलि भोघाखे। 21कालाउ ना एम्बालाइको काथा माहिङ! हाइपानु एम्बालाइता न्हेकुरि खान्तेङ बुङ हेन्जा यहुदिगेलाइ पावलहेङ मासेअ्सा हाइदोङ माचाङ रो चि बुङ माआमाङ दोअ्तेङ केरा चाका हि। एम्बालाइ एलाङ वासेहेङ सेअ्लि ढुकितेङ हि रो नाङको हुकुमको आसता र्हुम्तेङ हि।”
22इस्का काथा हिङतेङ रोमि पलटनको हाकिम जामालहेङ दोअ्तेङ दिङगिल्हि, “इदोइ काथा ना कासेहेङ दोअ्घा दोअ्तेङ हासुहेङ माहिङपा।”
पावलहेङ बारका हाकिम फेलिक्सकोता दिङगिल्का
23इङकोन्हुअ्सो रोमि पलटनको हाकिम न्हेमि काप्तानगेलाइहेङ काइतेङ दोअ्हि, “काइसरिया हानिलि न्हेसाइ पलटन, सुमकुरितेमि ओह्याँधोल्का रो न्हेसाइ खापर चुमका पलटनगेलाइ त्यार पासु। एम्बालाइ दिलिमा कुह्वा बजे दोङ हानिलि साजेलि गोयाङ। 24पावलको धोल्का ओह्याँ बुङ ठिक पासु रो वासेहेङ रेम्फा गोर्हाइतेङ बाराहाकिम फेलिक्सकोता चुमपुसु।” 25इदोइ दोअ्कान्हुअ्सो इङको रोमि पलटनको हाकिम बाराहाकिम फेलिक्सहेङ एलोङ चिथि लेखिहि:
26“माननिय बाराहाकिम फेलिक्स, का क्लाउडियस लुसियस नासेहेङ सेउपाखा! 27पावल दोअ्का इदोइ द्याङहेङ यहुदिगेलाइ सेअ्लि दोअ्तेङ रिम्हि, कालाउबुङ याचाहिँ रोमि नागरिक हिघाहि। इदोइ काथा गितेङ का ताइमिङ पलटन चुमपुतेङ यासेहेङ बान्चिपाघा। 28या हाइ बिराइका हि दोअ्तेङ गिलि का यहुदिगेलाइको कचहरिता बुङ चुमतेङ हानिघा। 29कालाउबुङ या सिलिगोइका दार माकुनु थुनिलिगोइका हाइदोङ आपाराध का मानिङघा। वाको दुसचाहिँ एम्बालाइकोङ न्यामको बारेता हिघाहि। 30यहुदिगेलाइ इदोइ द्याङहेङ सेअ्लि दावा भोदोङखे दोअ्का काथा हिङनाङ यासेहेङ नाङकोता दिङगिलदोङखा। यासेहेङ दुस लागाइका यहुदिगेलाइहेङ बुङ नाङकोता दोङ उजुर पालि दोअ्तेङ हुकुम पिका हिघा।”
31काप्तान रो पलटनगेलाइ रोमि पलटनको हाकिमको हुकुम मानितेङ पावलहेङ चुमतेङ हानिहि। ओबालाइ पावलहेङ इङकोङ न्हिसिङ एन्टिपाट्रिस पुरथिकापा थुकापाहि। 32जुम्निदिना तेका पलटनगेलाइचाहिँ पावलहेङ ओह्याँधोल्का पलटनगेलाइदोफा हानाको दोअ्तेङ जिम्मा पितेङ पलटन यरुसलेम घुरिहि। 33ओह्याँधोल्का पलटनगेलाइ काइसरियाता थुकातेङ पावलहेङ बाराहाकिमकोता रोमि पलटनको हाकिमको चिथिसुदाङ जिमा पिहि। 34इङको चिथि पर्हिलिदोतेङ बाराहाकिम पावलहेङ हिअ्हि, “ना हिदोइ माउजाको हिन्हा?” पावल दोअ्हि, “का किलिकियाको हिघा।” 35कालाउ बाराहाकिम दोअ्हि, “एन्सानु नाङको उजुर पाकालाइ इता थुकालिलोकान्हुअ्सो खिनिङ नाङको काथा हिनाङका।” इङकोन्हुअ्सो बाराहाकिम पावलहेङ पहरा पितेङ हेरोदको महलता ताअ्लि दोअ्तेङ हुकुम पिहि।
المحددات الحالية:
साल्तेङ दिङगिल्का 23: DHIM
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Nepal Bible Society and Wycliffe Bible Translators, Inc.
