लूका 14
14
येशूये म्हुङ बाट्चनीक काट भर्मीकी गेपाक्च
1कायाक येशू म्हुङ बाट्चनीक निम्तो डुपार फरिसीकुङ काट अगुवौ इमाङ ज्यामा ज्याकी नुङा। होला राछ कुडीक फरिसी भर्मीको चहिँ येशूये हीर मासेछ जाट्ले की डेम चीवा जाट्न न लेया। 2होला होडीक न बेला मीहुट मीखुट्या सोक्च काट भर्मी येशूओ म्याहासाङ ङुम-ङुमन्या। 3होटै येशूये फरिसीको र धर्मगुरुकोलाक गीना, “ही म्हुङ बाट्चनीक रोगीकी गेपाक्च बारेयाङ व्यवस्थै ही डेमने?” 4तर होखुरीक हीर माङाक्ङ ङुवा। होटै होसकै होसे रोगीयो शरीराङ मीहुटै छुवार गेपाका र होसे भर्मीकी इमाङ नुङ्की याहा। 5होटै न्हुइङ येशूये होखुरीककी डेया, “इडीक म्हुङ बाट्चनीक नाखुरीक मध्याङ सुओर मीजाको वा ङ्हेट-भैँसी इनाराङ पर्या डेनाङ नाखुरीकै झ्वाट्टै डोन्की माक्योट्ले र?” 6होटै होखुरीकै हीर जवाफ याखी माह्योका।
7होला राछ पाहुनाकै सेछ-सेछ ङुच ठाउँ भाक्च डाङार होसकै काट उदाहरण याछै होखुरीककी डेया, 8“नाखुरीकै सुओर ब्याहाङ निम्तो डुपार नुङ्नाङ सेछ ठाउँ भाकार माङुनी। हीजैडेनाङ होला नाखुरीक डेनाङ बा-बाड्सो भर्मीकोलाक र निम्तो याहार आर्घाकी ह्योक्च छान्ने। 9होटै होखुरीक टाह्राछ न्हुइङ निम्तो जाट्च भर्मीये राहार नाकोकी इट डेले, इसकोकी ङुच ठाउँ डास्न यान्ही। होटै नाको चहिँ झाङ ङुकी पर्नाङ साप्फी काराम सेकी पर्ले। 10होटबाटै आर्घाच ठावाङ नाको नुङ्नाङ बरु न्हुङ्लाक ङुनी। होटै नाकोकी आर्घाच भर्मीये राहार मान जाट्चै डेले, ‘लौ लाफा, इला ढेनाम सेछ ङुच ठाउँ ले। रान्ही’ डेम मान जाट्चै ङुवाक्ले। 11हीजैडेनाङ लाहा न बाड्को छान्की पाचको पट्ट न मार्जा छान्ने। होटै लहे लाहाकी मार्जा खास्चको चहिँ बाड्को छान्ने।”
12होटै येशूये लाहाकी आर्घाच अगुवाकी र इट डेया, “नाकै ज्याकी आर्घानाङ, लहो भर्मीको, डाजेभाइ, कुटुम्ब र खेरेप लेच धनीकोलाक मट्टै माआर्घानी। होइन डेनाङ होखुरीकै नाकोकी र आर्घाम नाकै जाट्च गुण ल्हेट्न याल्हे। 13बरु नाकै ज्यामा-गामा कास्की आर्घानाङ, गरीब-दु:खी, लुला-लङ्गडा र मीमीक माडाङ्चकोलाक आर्घानी। 14होटै न्हुइङ नाकै आशिष डुप्ले। हीजैडेनाङ होखुरीकखाटा हीर मालेचबाटै नाकै जाट्च गुण नाकोकी ल्हेट्की माह्योक्ले। तर धर्मीको फेरि पुनरुत्थान छान्नाङ नाकै होच्यो इनाम डुप्ले।”
बाड्को भोजौ बारेयाङ उदाहरण
(मत्ती २२:१-१०)
15येशूखाटा ज्याकी ङुचको मध्याङ काट जनै होसकै डेच सेयार डेया, “परमेश्वरौ राज्याङ भोज ज्याकी डीन्छको आशिष डुप्चको हो।” 16येशूये होसकी इट डेया, “सुर काट जना भर्मीये वास्टै भर्मीकोलाक निम्तो याहा र बाड्को भोज तयार जाटा। 17होटै भोज ज्याच बेला छान्च न्हुइङ होचे लहो पाहुनाकोलाक ‘ज्याच बेला छाना रान्ही’ डेम नोकरकी आर्घाकी बीर्न्हका। 18तर होसे पट्ट पाहुनाकै काट न खाल्या बहाना खास्चै सुर राखी मामन्डीया। होटै काटै डेया, ‘ङै च चाम-चाम ह्या लोमे ङोस्की नुङ्की ले, ङाकी माफ जाट्न यान्ही, ङा राखी माह्योक्ले।’ 19अर्कोये चहिँ डेया, ‘ङै बाङा हल ठोर लोमे, ङा ङोस्की नुङ्की पर्ने ङाकी माफ यान्ही’। 20फेरि अर्कोये डेया, ‘ङै चाम-चाम मट्टै ब्याहा जाट्नने होटबाटै ङा राखी माह्योक्ले।’ 21नोकर ल्हेस्न राहार मालिककी पट्ट न कुरा सेटाका। होटै इसे कुरा सेरखीङ इमुङ मालिक साप्फी मीरीस ख्योछै लहो नोकरकी इट डेया, ‘सहरौ लाम र गल्ली-गल्लीयाङ छिटो नुङ्नी। होटै गरीबकोलाक, मीमीक माडाङ्चकोलाक, लुला-लङ्गडाकोलाक आर्घाम इला राक्नी।’”
22 होटै न्हुइङ नोकरै होटन जाटार मालिककी डेया, “हजुर, नाकै डेच लेखा न पट्टकी आर्घाम राका तर अझै ठाउँ खाली न ले।”
23 फेरि मालिकै नोकरकी डेया, “ङौ इम अट न्हेपै डेम सहरौ मुल लामाङ र लाङ्घौ गल्ली-गल्लीयाङ नुङार पट्ट भर्मीकोलाक कर लैडीचै आर्घाम राक्नी।” 24ङा नाखुरीककी डेले, “पहिला निम्तो डुप्चकै सुयेर इसे ङौ भोजकी म्याङ्की माढीन्ले।”
येशूओ चेलाकै दु:ख भोग्डीकी पर्ले
(मत्ती १०:३७-३८)
25कायाक भर्मीकुङ बाड्को हुद्दा येशूखाटा नुङ्ङ न लेया। होसकै होखुरीक पट्टी ल्हेसार डेया, 26“ङाकी डुट्चकै लहो बोइ-मोइ, जहान, मीजाको, डाजेभाइ, डैबहिनी पट्टकोलाक होटै लहे लहो प्राणकी तुच्छ मामन्डीले डेनाङ ङौ चेला छान्की माह्योक्ले। 27लहो क्रूस बुवार ङौ न्हुङ-न्हुङ माह्वाले डेनाङ होसे र ङौ चेला छान्की माह्योक्ले।
28 “नाखुरीक मध्याङ सुयेर धरहरा खास्च मीमन जाटा डेनाङ पैसा ओल्हे की माओल्हे, कुडीक चहडीस्ले डेम पहिला न हिसाब माजाट्ले र? 29इडीक होचे धरहरा खास्की जग बाटा र भ्याटाक्की माह्योका डेनाङ डाङ्च भर्मीकै होसकी काराट्चै इट डेले, 30‘इसे भर्मीये खास्की च ठाला, तर भ्याटाक्की माह्योका!’ 31कुसेर राजै अर्को राजाखाटा पुन्खी नुङ्नाङ ‘दश हजार सेना लार बीस हजार सेना लेचखाटा ङै पुन्खी ह्योक्ले की माह्योक्ले’ डेयार पहिला न माआर्मीट्ले र? 32पुन्खी माह्योक्ले डेनाङ अर्को राजा लोस लेनाङ न होचे लहो राजदूतकोलाक ही जाटार खाट्की ह्योक्ले डेम गीन्की बीर्न्हकाले। 33होटजाट्न न नाखुरीक मध्याङ सुये ङौ लागि पट्ट न ठोक डास्की माह्योक्ले डेनाङ होसे ङौ चेला छान्की माह्योक्ले।
काम मालग्डीस्च छा
(मत्ती ५:१३; मर्कूस ९:५०)
34 “छा सेछ ठोक हो, तर इच्यौ स्वाद ह्वा डेनाङ इसकी फेरि हीये सेसाक्की ह्योक्ले र? 35इसे झौ लागि र सेछ माछान्ने होटै मलौ लागि र काम मालग्डीस्ले। होटै भर्मीकै इसकी लोम्ह याल्हे। सुखाटा सेच मेनेकेप ले, होचे सेख्यो।”
المحددات الحالية:
लूका 14: EMGP
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Mother Tongue Translators Society and Wycliffe Bible Translators, Inc.
