Éxodo 17
17
Isabenö Jo̧ inawatjö ojwiyo döobö weina jawa
1Ja̧danö, Israel jojodöma Dios weaja̧ a̧ja̧kwö Sin mejetjö labebajadö abiabö 'yi̧jadötö. Refidim niji ichibö jobe isa̧do̧ debatö otidijadötö tjejubiyadanö , jobetjö tjabobö. Ja̧danö, jemima ojwiyo kököobetjö̧ jobadö tjowoböma jwiijetö. 2Ojwiyo kököiawö̧ wene juna̧lijadötö Moiséskwö. Jo̧kwaobetjö̧ labinö abeba̧lijadötö Moisésnö, Aarónnö, Ojwiyo dowo iyaduwi, jö̧ba̧lö. Jejenö jö̧tja̧lökwe:
—¿Tajawedö wene kwujuna̧daduwa ötjökwöma? ¿Tajawedö Isabenö Jo̧nö kwomukwataduwobeda, ökwödönö pjaatobö ö̧jojobö, ö̧jö̧köjöbö̧, jö̧ba̧lö?— atadijetö Moisésma Israel jojodönöma. 3Jo̧kwaijayonö Israel jojodöma ojwiyo nöinö o̧tilö̧jawö̧ ina jwöbeba̧lijadötö Moisésnö:
—¿Tajawedö Egiptotjö lakebinada ökwödönöma? Ojwiyo o̧titjö wodobö ¿ökwödönöbi di̧tji̧munöbi da̧jwi̧mu̧ pa̧ka̧yö̧nöbi öbibö kwichejebinaji̧ baikwö?— 4jwötjeba̧liökwe Isabenö Jo̧nö budekwö abebijetö Moisésma:
—¿Dakwö chatadakwajö jobadönöma? Ida̧ökö ötjönö inawiyanö ikwawö lotjobö tjomukwata— 5aebiökwe:
—Jobadötjö ju'wedönö, la'aka luwedönö öbibö 'ya̧wi jojodö tja̧bönö mö'ösa'o jo̧bekwö. Kwotokwa'o do̧ba̧lö kwi̧'yo, Nilo ojwe wame i̧sebö kwaköbina'oma. 6Ö'wiyakwawa̧lö̧jönö a̧ja̧kwitjö. Ökwö kwö̧jemi badeibö chö̧jakwo̧sa, mö'ösa'o la'akanö, inawa nöawanö. Jawa, chö̧jawama kwaköbo kwotokwa'onö. Kwaköbemi ojwiyo döakobe jawatjö, jojodö tjowobö— webijetö Isabenö Jo̧ma Moisésnöma. Ja̧danö, mö'ösa'o la'aka ichibö Moisésma, jo̧bakwö ichajadö tjeda̧lonö Isabenö Jo̧ weaja̧danö inawa kwabijetö. Kwaemi ojwiyo döijetö jawatjö. 7Ja̧danö, Moisésma jemima midijetö #17:7 Masah, jö̧ba̧löma, ökwödönö pjaatojobö, pjaatokojobö dedo, jö̧ba̧lö, wanekwachobe. Masah, jö̧ba̧lö, Israel jojodöma Isabenö Jo̧nö, ökwödökwö pjaatobö ö̧jojobö, ö̧jö̧kojobö, jö̧ba̧lö, tjomukwatajobetjö̧. Ja̧danö, ju'wi imibi midijetö jemima, #17:7 Meriba, jö̧ba̧löma, jwöeba̧lakwawa, jö̧ba̧lö wanekwachobeMeriba, jö̧ba̧lö, Israel jojodöma jwötjeba̧lobetjö̧.
Dios Israel jojodönö Amalec jojodönö tjujuluwobö pjaatina jawa
8Ikenama ju'wedö, Amalek jojodöma Refidim nijinö ichö ölakwabikwawijadötö Israel jojodönö. 9Tjichibiökwe Moisésma Josué mikwo̧nö, ölakwabikwawa waisadö tjuluwo̧nö webijetö:
—Omudawö kwujuno ölakwabikwawa waisadönö itekwayi Amalec jojodö tjö̧jobekwö 'ya̧nö, jobadönö ölakwabikwawö tjubulabikwawakwedö dö̧jibinö pjabatö. Ölakwabikwawö kwubulabiduwonö ötjöma mö'ösa'o wa̧pekwa'onö chö̧jakwo̧sa, chotokwa'o do̧ba̧lö kabeba̧lö, Dios ötjönö do̧ba̧lö kwi'yo, jö̧ba̧lö weina'oma— webijetö Moisésma Josuénöma.
10Ja̧danö, Josuéma Moisés weaja̧danö a̧ja̧kwijetö. 'Böawa waisadökwö 'yi̧jetö Amalec jojodönö ölakwabikwawö. Jobadöma ölakwabikwawö tjubulabikwawonö Moisés, Aarón, Hur mikwo̧ mö'ösa'o nöchajadö wa̧pekwa'onö ji̧jadötö, wajuwanö tjedobö tjubulabikwawobekwö. 11Ja̧danö, Moisésma öjabiya kaebemi Israel jojodöma juluwachibijadötö Amalec jojodönö. Jo̧kwaijayonö, öjabiya nijakwö jaenama Amalec jojodöda juluwachibijadötö Israel jojodönöma. 12Ja̧danö, Moisésma öjabiya lekwe kaeba̧lobetjö̧ me'dawachibö öjabiyama nijakwö jabijetö. Jo̧kwaobetjö̧ Aarón, Hur, inawa nöawa pjolatö junijadötö Moisés jawanö ö̧bamatobö. Ikenama Moisés jawanö ö̧bonö Aarónkwöma Hurkwöma Moisés ipjeakwenanö ja̧nö kabeba̧lijadötö Moisés öjabiyama. Jejenöobetjö̧ lekwe ja̧wo̧ meajenanö kabatö kabeba̧lijadötö Moisés öjabiyama. 13Jejenö Josuéma, iteda weawö̧ ölakwabikwawa waisadöma bulabikwawanö jwiinö juluwijadötö Amalec jojodönö.
14Ikenama, Isabenö Jo̧ma jö̧ba̧lijetö Moisésnö:
—Ölakwabikwawö kwujuluwaduwajabema kwiweyudo kwomukwataduwobö. Ja̧danö, ja̧ kwiwȩyudi̧kwö bi̧ya yöbawö chujuni̧bi wȩyudi: Ju'wi möle Amalec jojodönö okobe deinö söbebö lotakwo̧sa, bakwo̧bi junibökönö. Moisés, weyu̧di yökawo Josuénö, jo̧bama a̧ja̧kwobö— jö̧ba̧lijetö Isabenö Jo̧ma Moisésnö. 15Ikenama Moisésma juwö iyawemi otidijetö. Jemima midijetö, Isabenö Jo̧ma döpjojodönö dujuluwobö pjabato̧, jö̧ba̧lö. 16Ja̧danö, yöba̧lijetö Moisésma:
—Isabenö Jo̧ ujulunö döpöjojodönö dujuluwakwedösa. Ba̧kwȩlö̧jatebö, ökwödönöbi, ökwötjö tupadanö jojodönöbi pjaatakwo̧ Isabenö Jo̧ma, Amalec jojodönö dujuluwobö— yöba̧lijetö Moisésma.
المحددات الحالية:
Éxodo 17: WPC
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©2021, All Rights Reserved
