Woo bɛ ŋa 27
27
À waa bɔò Pɔlu Romu
1Waati iyi à dasi idɔ a bɔò Pɔlu ilɛi Itali do akɔi inyi ŋɔi à so Pɔlu do inɛi piisɔ̃ɔ gɔ ŋa à daa inɛ ngboi sooge gɔ iyi à ya kpe Zuliusi si awɔ. Nŋu mɔ wa jɛ inɛ ngbo si inɔ wuai soogei Romu ŋa iyi à ya kpe ti ilaalu Ogusitu. 2Ŋɔi awa fei à lɔ akɔi inyii Adamiti gɔ iyi wa bɔ ikpa ilɛi Azii, nɔ à nɛ. Nɔ inɛi Masedɔni gɔ iyi í naa hai Tɛsalonika í wa inɔ nwa à ya kpoo Aritaaki. 3Iju kumáɛ nɔ à to Sidɔ̃ɔ. Ŋɔi Zuliusi í cea Pɔlu jiida í jɔ̀ í koo í yɛ kpaasiɛ ŋa ku ba a muaa mii iyi í bi. 4Iyi à nɛ hai bɛ ŋɔi fufu nla gɔ wa ko wa wa, nŋui í jɔ̀ à too do icei gũngũm gɔ iyi à ya kpe Kitimu. 5Ŋɔi à kua inyi dũdũu ikpa ilɛi Silisi do Panfili nɔ à to wa Mira si ilɛi Lisi. 6Ilu bɛi, inɛ ngboi soogeu í yɛ akɔi inyii Alesandii gɔ iyi wa bɔ ikpa ilɛi Itali nɔ í dasi wa bɛ.
7Iyi à nɛ, à ce ajɔ nkpɔ nkpɔ kpɛlɛ kpɛlɛ à waa koo do wahala nla nla. Nɔ à to kɔkɔi ilu gɔ iyi à ya kpe Sinidi. Si bɛi fufu nlau wa ganji wa waju ku bɔ, à yàa à bɔ ikpa gũngũm gɔ iyi à ya kpe Kɛrɛti. Iyi à waa koo, à tooi do ikpa icei gũngũm nɔu kɔkɔi ilɛi Samɔneei domi fufuu kù la do ikpa bɛ. 8Nɔ à lɔ bɛ do kookaai nla nla nɔ à to bi ku leekĩi akɔi inyi iyi à ya kpe Kusĩa kɔkɔi Lasee.
9Waati sisɔi í lɔ hee inɛ ŋa à dĩ anu à tã, nɔ waju ku bɔ nwa í jɛ do mbiisi nla nla domi waatiu í ya gaabu do akɔi inyi. Na ŋɔi í jɔ̀ Pɔlu í sɔ̃ ŋa í ni, 10iŋɛ kpaasim ŋa, ǹ yɛ ilu ku bɔ nwau á gaabu, á nɛ mbiisi do muse. Aso nwa ŋa do akɔi inyiu takaɛ fei aa ce nfe, nɔ baa awa taka nwa à wa andɛi iku. 11Amma inɛ ngboi sooge ŋau wa gbɔ idei woo mu akɔu do inɛ iyi í nɛ akɔu takaɛ í re ti Pɔlu. 12Wee kù sĩa a leekĩ bi ku leekĩi akɔi inyi ŋau sukui kpaa. Ŋɔi í jɔ̀ inɛ nkpɔ nŋa í dasi idɔ í ni ka mɔsi waju ka to Fenisi tengi bii bi ku leekĩi akɔi inyii gũngũm dii Kɛrɛtiu í wa. Bi ku leekĩi akɔi inyiu do ikpa nunui alɛ cingaa do cingaai wa cɔ. Bɛi à bi a wa sukui fufuu.
Fufu nla gɔ í dede si tenku
13Ŋɔi fufu fɛrɛ fɛrɛ gɔ í dede hai ikpa awɔ cangai kpãai inunu wa. Ŋɔi inɛ ŋau à tamaa bɛi isɛɛnɛi aŋau á cei si bɛi aŋa à bi. Ŋɔi à fa mii ku leekĩ akɔu wa hai inɔ inyi à bɔ waju nɔ à waa too kɔkɔi gũngũm dii Kɛrɛtiu. 14Amma iyi í ce sãa fufu nla gɔ iyi à ya kpe Erakilɔ̃ɔ í dede do gbugbã hai geetei gũngũm nɔu wa. 15Ŋɔi í tale akɔu wa hee à mɔngɔ ku jɔ̀ akɔu ku nɛ dee dee nɔ à jɔ̀ɔɛ í nɛò wa bii í bi. 16Nɔ à koo à lɔ kɔkɔi gũngũm keeke gɔ bɛ iyi à ya kpe Koda. Gũngũm nɔui í jɔ̀ fufuu í tia. Do nŋu fei ka bɛi ka so akɔi inyi keeke iyi í jɛ ti faabau ka dasi inɔ akɔi inyi nlau à wahala ntɔ ntɔ. 17Iyi à dasi à tã ŋɔi woo ce icɛ si inɔi akɔi inyi ŋau à dĩ akɔi inyi nlau do ikũ ŋa à kaakoɛ. Nɔ à fũ ikũi acɔɛ à jɔ̀ fufuu í bɔò ŋa bii í bi si na iyi í jɔ̀ à waa ce njo a maa na a dasi sãai Libii. 18Iju kumáɛ si bɛi fufuu wa cã wa do gbugbã ŋɔi à lɔsi asoi akɔi inyiu ku wà ku sɔsi inɔ inyi. 19Iju kumáɛ má à wasi nyaui akɔi inyiu takaɛ ku wà ku sɔsi inɔ inyiu do awɔi aŋa taka nŋa. 20Ajɔ nkpɔ nkpɔi à ce inunu kù fita hee má jɛ leleaɔ̃ ŋa nɔ fufu nlau wa ce, a kù tamaa mà aa ka fita si.
21Hai ku kpɛ a kù jɛ. Ŋɔi Pɔlu í dede í leekĩ si anini nŋa í ni, iŋɛ fei, bii ì jɛ idem ŋa wo a kaa ka nɛ hai Kɛrɛti nɔ a kaa ka yɛ mbiisi do museu ihɛ̃. 22Amma nsɛi ǹ wa n tɔɔ ŋɛ, i jɔ̀ laakai nŋɛ ku sũ domi kãma nŋɛ gɔ kaa ce nfe bii kù jɛ akɔi inyiu nŋu akã. 23Ǹ mà bɛɛbɛi si na iyi í jɔ̀ Ilaaɔ̃, nŋu iyi ǹ jɛ tɛɛ, ǹ wa n ceaa icɛu, amalekaɛ í naa sim idũ ana 24í ni, Pɔlu, maà ce njo. Kù nɛ bɛi aa ce iyi i kù leekĩ si wajui ilaalu nlai Romu. Nɔ wee inɛ ŋa iyi iŋɛò ŋa ì wa inɔ akɔu fei, Ilaaɔ̃ í yɔɔda nŋai a baɛ ku wɛɛ. 25Na nŋu, iŋɛ fei, i fũ ara nŋɛ, domi ǹ wa n naanɛ idei Ilaaɔ̃u. Bɛi í sɔ̃m nɔu bɛɛbɛi á ce. 26Amma akɔi inyiu á cuku kɔkɔi gũngũm gɔ ku lɛgɛ.
27Si idũi ajɔ maatɛ̃ɛsiaɛ ŋɔi fufu nla gɔ wa tale wa si antaii tenku bii à wa iyi à ya kpe Mediteraneeu. Ŋɔi zakai idũ lajau woo ce icɛi akɔi inyi ŋau à tamaa bɛi à maai ilɛi. 28Ŋɔi à dasi mii gɔ inɔ inyi à wã kujĩi isaɛ nɔ à ba í to agbãawɔ kitaò fɛɛwa do mɛɛ. Iyi í kɔ̃ɔsi keeke nɔ à sɔsi má nɔ à ba í ce mɛɛtu ciitaa do mɛɛfa. 29À waa ce njo a maa na a gãmɔ do kuta ŋa, na ŋɔi í ce à sɔsi mii ku leekĩ akɔi inyi ara mɛɛ do anyii akɔu ku ba ku leekĩɛ nɔ à waa degbe iju ku má ńya. 30Ŋɔi woo ce icɛi akɔ ŋau à waa dɛ bɛi aa ce a sa do ile. Na ŋɔi í jɔ̀ à kita akɔi inyi keeke iyi í jɛ ti faabau si inyiu ku ba inɛ ŋa a tamaa bɛi à waa bɔ ku dĩ mii ku leekĩ akɔu si wajuɛi. 31Amma Pɔlu í sɔ̃ sooge ŋau do inɛ ngbo nŋa í ni, bii inɛ ŋau ihɛ̃ a kù wa si inɔ akɔi inyiu, iŋɛ taka nŋɛ i kaa ba faaba ŋa. 32Ŋɔi sooge ŋau à bu ikũi akɔ keekeu nɔ à jɔ̀ í mile si inyiu.
33Si bɛi à waa degbe iju kumáu ŋɔi Pɔlu í tɔɔ aŋa fei a jɛ. Í ni, ajɔ maatɛ̃ɛ wai ihɛ̃ ì waa dɛ kpãai faaba ŋa i kù nɔ i kù jɛ ngɔgɔ ŋa. 34Ǹ wa n tɔɔ ŋɛ i jɛ na faaba nŋɛ. Ntɔ ntɔ ǹ wa n sɔ̃ ŋɛi, baa ntoi irii inɛ akã nŋɛ kaa da ku nyɔ. 35Iyi Pɔlu í fɔ bɛɛbɛ í tã ŋɔi í so pɛ̃ɛ í saabu Ilaaɔ̃ si wajui aŋa fei nɔ í bububuɛ í lɔsi ku jɛ. 36Ŋɔi aŋa fei à fũ ara nŋa à wasi ku jɛ. 37Awa iyi à wa si inɔi akɔi inyiu à wɛɛi amanɛ cĩɔ minji do kitaò fɛɛwa do mɛɛfa (276). 38Iyi aŋa fei à jɛ à yo ŋɔi à wa aso ŋa iyi à gbeu à sɔsi inɔ inyiu ku ba akɔu ku fɛrɛ.
Akɔi inyiu í lɛgɛ
39Iyi iju í má ŋɔi à nyɔ. Woo ce icɛ si akɔi inyi ŋau a kù mà inyau, amma à yɛ waawaa gɔ í nɛ sãa, nɔ à dasi idɔ a bɔò akɔu bɛ bii aa yɔkɔ. 40Ŋɔi à bu ikũ ku leekĩ akɔu à jɔ̀ í mile. Si waati akãu nɔ inɛ gɔ ŋa à fũ ikũ iyi à ya dĩò falafili ŋau. Nɔ à dede acɔu lele ikpa wajui akɔu ku ba fufu ku taleɛ ikpa waawaau. 41Amma à kãsi geetei sãa gɔ do gbugbã nɔ à mɔngɔ ku lɔ. Nɔ wajui akɔu í gũ ilɛ si sãa à mɔngɔ ku wuɛ, nɔ kucãi inyi nlau í tale fitii akɔi inyiu do gbugbã í lɛgɛɛ.
42Ŋɔi sooge ŋau à dasi idɔ aŋa a kpa inɛi piisɔ̃ɔ ŋau fei ku ba a maà na a wà a sa. 43Amma inɛ ngboi sooge ŋau í bi ku faaba Pɔlu. Na ŋɔi í ce í ganji ŋa. Í ni inɛ ŋa iyi à mà àwà a cua a kua ice. 44Nɔ inɛ ŋa iyi à gbe a gũ kpatakui akɔu walakɔ kpalɔɛ ŋau a kuaò ice. Bɛɛbɛi inɛ ŋau fei à kuaò ice baani.
المحددات الحالية:
Woo bɛ ŋa 27: MKL
تمييز النص
شارك
نسخ

هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
2021, SIM International et UEEB