مَرقُس 14
14
عیسا اؤلدورمَکی‌نینگ نقشه‌سی
1پِسَخ و خَمیر مایاسیز چؤره‌ک عیدینه ایکّی گؤن قالمیشدی. باش کاهِن‌لَر کی مَعبد عالِم‌لَری ایدیلار و تورات معلّم‌لَری بیر یول گزیرلَردی تا بی سَس عیسایی توتالّار و اؤنو اؤلومه وئرَلَّر. 2آما دئییرلَردی: «بو ایشی عید گؤن‌لَرینده گؤرمه‌یه‌سیک، تا ائدمئیه کی خَلخ شلوغ سالالّار.»
عیسا تَدهینی بِیت‌عَنْیا کَندینده
3عیسا بِیت‌عَنْیا کَندینده، بیر شَمعون آدلی کیشی‌نینگ ائوینده کی ایلَرتر جُذاملی ایمیش، سُفره قیراقیندا اوتورموشدو. ائله بو موقعده بیر آرواد کی بیر مَرمَر دَرفده بیر گران قیمت خالص سونبول عَطری گتیرمیشدی عیسا یانینا گلدی. آرواد او دَرفینگ بوینونی قیردی آچدی و عَطری عیسا باشینا تؤکدو. 4اؤرداکی‌لارینگ بیر پاراسی غُصّالاندیلار و اؤز آرالاریندا دئدیلَر: «نه ایچی بو عَطر بئله حراما چیخدی؟ 5اولوردو بو عَطر کی اَرزشی، بیر فَحله‌نینگ اون آیی‌نینگ دستمزدیندان دا آرتیق دیر ساتیلا و پیلی یوخسول‌لارا وئریله.» اوللار او آروادا چوخ گپ چالدیلار. 6آما عیسا اوللارا دئدی: «بو آرواددا ایشینز اولماسین. نه ایچی بئلَسینی اینجیدیرینز؟ او بیر قَشنگ ایش منیم ایچی گؤرموش. 7یوخسول آداملار همیشه بئلَینز اینن دیرلَر و هر وخت کی سئیَینز اوللارا کؤمَک ائده بیلَرَینز. آما من همیشه ایچی بئلَینز اینن ده‌ییلم. 8بو آرواد اَلیندن گلَنی ائدی؛ او بو عَطری منیم بَدنیم اوستونه تؤکمَک اینَن، منی تاپشیریلماک ایچی آماده ائدمیش. 9گرچَکینی سیزه دئییرم، تارئ پادشاه‌لیگی‌نینگ خوش خَبری، بوتون دنیانینگ هر یئرینده اعلام اولسا، بو آرواد گؤردوگو ایش دئییلَر و یادا سالینار.»
یَهودا عیسایی اَله وئریر
10اوندا یَهودا اَسخَریوط کی او اون ایکّی شاگردینگ بیرسی ایدی، گئتدی باش کاهِن‌لَر یانینا تا عیسایی اوللار اَلینه تَسلیم ائده. 11اوللار دا بونو ائشیدَنده، چوخ خوشحال اولدولار و یَهودایا پیل وَعده‌سی وئردیلَر. یَهودا دا بیر فُرصت قولونجوندایدی تا عیسایی اَله وئره.
پِسَخ شامی شاگردلَر اینن
12خَمیر مایاسیز چؤره‌ک عیدی‌نینگ بیرینجی گؤنونده کی پِسَخ قوزّوسو او گؤنده قُربانلوق اولیردی، شاگردلَر عیسادان خبر آلدیلار: «گؤینونگ سئیر گئدَک هارایی بئلینگ ایچی آماده ائدَک تا پِسَخ شامینی یئیَنگ؟» 13عیسا شاگردلَری‌نینگ ایکّی‌سینی یوللادی و بئللَرینه دئدی: «گئدینز شَهره؛ بیر کیشی کی بیر سو کیزه‌سی آپاریر، سیزینگ اینَن قَرشیلَشَر. اؤنونگ قولونجوندان گئدینز 14و او گئتدیگی ائوینگ اَیه‌سینه دئیینز: ”اُستاد دئییر: ’اُتاق ائل هاردا دیر تا من شاگردلَریم اینَن، پِسَخ شامینی اؤردا یئیَم؟‘“ 15او بیر بویوک، پوشان اولونمیش و آماده اُتاقی کی بالاخانه‌دا دیر سیزه گؤرسَدَر. پِسَخ شامینی اؤردا بئلَمیز ایچی آماده ائدینز.» 16او ایکّی شاگرد گئتدیلَر شَهره و واری زادی ائله او طور کی عیسا دئمیشدی، گؤردولَر و پِسَخ شامینی آماده ائدیلَر.
17آغشام چاغی عیسا، اون ایکّی شاگردی اینن گلدی. 18اوندا کی اوللار سُفره قیراقیندا ایدیلار و خورَکی یئییرلَردی، عیسا دئدی: «گرچَکینی سیزه دئییرم، سیزینگ بیرینز کی بو سُفره قیراقیندا منیم اینن خورَکی یئییر، منی اَله وئره‌ر.» 19شاگردلَر چوخ پریشان اولدولار و بیر بیر، عیسادان خبر آلدیلار: «من کی ده‌ییلم؟» 20عیسا اوللارا دئدی: «سیز اون ایکّی نفرینگ بیرسی دیر، سیزینگ بیرینز کی تیکه‌سینی منیم اینن پایلا ایچینه باتیریر. 21انسان اوغلو او زادا ساری گئدیر کی مُقدّس یازیلی‌لاردا اؤنونگ باره‌سینده ایلَری ایلَری دئییلمیش. آما وای او آدام حالینا کی انسان اوغلونو اَله وئریر. اؤنونگ ایچی یئی‌تَر ایدی کی هئچ دوغولمایایدی.»
22اوللار خورَکی یئیَنده، عیسا چؤره‌کی گؤتوردو و شُکر ائدمَکدَن سورا اؤنو تیکه‌له‌دی، وئردی اوللارا و دئدی: «توتینز؛ بو منیم بَدنیم دیر.» 23اوندان سورا پایلا‌یی گؤتوردو و شُکر ائدمَکدَن سورا، اوللارا وئردی و اوللارینگ واریسی او پایلادان ایچدیلَر. 24و بئللَرینه دئدی: «بو منیم قانیم دیر، کی اؤنونگ اینن بو تازّا عَهدی تَصدیق ائدیرم. منیم قانیم تؤکولیر تا چوخ آداملارینگ گُناه‌لاری باغیشلانا. 25گرچَکینی سیزه دئییرم، من اوزوم سویوندان داها ایچمَم، او گؤنَنچاز کی تارئ پادشاه‌لیگیندا، اؤنونگ تازّاسینی ایچم.»
26اوللار حَمد و ثنا ییری ییرله‌یندَن سورا، زیتون داغینا ساری گئتدیلَر.
پِطرُسینگ حاشا ائدمَکی پیشگولیگی
27عیسا اؤز شاگردلَرینه دئدی: «سیزینگ وارینز منی تَک قؤیاراینز، چونکی مُقدّس یازیلی‌لاردا یازیلمیش:
”چوبانی وورارام،
و قویون‌لار، داغیلارلار.“
28آما من دئرّیلَندَن سورا، سیزدَن ایلَری جَلیل ولایتینه گئده‌رَم.» 29پِطرُس عیسایا دئدی: «اگر واری‌کَس سنی تَک قؤیسا دا، من سنی تَک قؤیمام.» 30عیسا اؤنا دئدی: «گرچَکینی سنه دئییرم، ائله بوگئجه، بوندان ایلَری کی خوروس ایکّی دفعه بونگ وئره، سَن منی اؤچ دفعه حاشا ائده‌رَینگ.» 31آما پِطرُس اِصرار اینن دئدی: «اگر لازم اولسا کی سَنینگ اینَن اؤلَم ده، سَنی حاشا ائدمَم!» شاگردلَرینگ واریسی ده ائله بونو دئدیلَر.
عیسا جِتْسیمانی باغیندا دُعا ائدیر
32عیسا اینان شاگردلَری بیر جِتْسیمانی آدلی یئره گئدیلَر. اؤردا عیسا شاگردلَرینه دئدی: «من دُعا ائدنده، سیز ائله بوردا اوتورینز.» 33عیسا، پِطرُس و یَعقوب و یوحَنّایی دا اؤزو اینَن آپاردی. عیسا چوخ بی قرار و پریشان اولدو. 34بئللرینه دئدی: «جانیم اؤلوم حَدّینَنچاز غَملی دیر. بوردا قالینز و اویاق تورینز.» 35اوندا عیسا بیر آز ایلَرتره گئتدی، یئره دؤشدو و دُعا ائدی کی اگر اولمالی دیر بو عذاب ساعتی اؤنونگ باشیندان اولا. 36او بئله دئدی: «ای اَبّا، ای بووآ، سن واری ایش گؤره بیلیرَینگ. بو عذاب پایلاسینی مندن ایراق ائد. آما گئنه ده، مَنیم سئدیگیم اولماسین، سَنینگ سئدیگینگ اولسون.» 37اوندان سورا عیسا، شاگردلَری یانینا گئری گلدی و اوللاری یاتیلی گؤردو. پِطرُسا دئدی: «شَمعون، یاتمیشانگ؟ باشارمئیردینگ بیر ساعات اویاق قالانگ؟ 38اویاق قالینز و دُعا ائدینز تا امتحانا چَکیلمه‌یَینز. گرچَکدَن کی روح مُشتاق دیر، آما جسمده قوّت یوخ.» 39عیسا گئنه گئتدی و ائله او دُعایی ائدی. 40و گئنه گئری گلدی و اوللاری یاتیلی گؤردو، بو سَبریه کی اوللارینگ گؤزلَرینی اوخو باسمیشدی. شاگردلَرینگ گپی گلمه‌دی. 41عیسا اؤچونجو دفعه ایچی، شاگردلَر یانینا گلدی و اوللارا دئدی: «سیز حَلی اوخودایاینز و استراحت ائدیرَینز؟ داها بَس دیر! قرار وئریلَن ساعات ائتیشمیش. انسان اوغلو گُناهکارلار اَلینه تَسلیم اولونیر. 42تورینز آیاقی گئدَک! باخینز، منی اَله وئرَن گلیر!»
عیسانینگ توتولماگی
43عیسا حَلی دانیشیردی کی بیردن یَهودا کی او اون ایکّی شاگردینگ بیرسی ایدی، بیر جمعیت اینَن کی یانلاریندا قیلیج و چُماق وارلاری ایدی و باش کاهِن‌لَر و تورات معلّم‌لَری و شیخ‌لَر طَرفیندَن ایدیلَر، گلدی. 44عیسایی اَله وئرَن یَهودا، اوللارا بیر نیشانا وئرمیشدی و دئمیشدی کی: «هَر کَسی کی ماچ ائدیم، ائله او آدام دیر، اؤنو توتینز و بئلَسینی گؤزلیه گؤزلیه آپارینز.» 45یَهودا ائتیشنده مُستقیم گلدی عیسا یانینا و دئدی: «اُستاد!» و عیسایی ماچ ائدی. 46اوندا او آداملار تؤکولدولَر عیسا باشینا و بئلَسینی توتدولار. 47آما اؤردا توران‌لارینگ بیرسی قیلیجینی ائنگ بویوک کاهِنینگ نوکرینه ساری چَکدی. قیلیج او نوکرینگ قولاقینا ده‌ییدی و قولاقی کَسیلدی. 48عیسا اوللارا دئدی: «بئیه مَن گدیگ باغلایانام کی قیلیج و چُماق اینان گلمیشَینز تا مَنی توتاینز؟ 49من هر گؤن سیزینگ اینن مَعبدده اوتوریردیم و تَعلیم وئریردیم و منی توتمادینز. آما بو ایش‌لَر اولوناسی تا مُقدّس یازیلی‌لار یئرینه ائتیشه.» 50اوندا شاگردلَرینگ واریسی عیسایی ویل ائدیلَر و قاچدیلار.
51عیسانینگ قولونجوندان بیر جاهال کیشی یولا دؤشدو. او آدام فقط بیر کتان پارچا اؤزونه دولاموشدو. عیسایی توتانلار، اَل ائدیلَر اؤنو ده توتدولار، 52آما او، دالینداکی کتان پارچایی ویل ائدی و لیت قَچدی.
عیسا، ائنگ بویوک کاهِن و یهود شوراسی‌نینگ حُضوروندا
53عیسایی ائنگ بویوک کاهِن یانینا آپاردیلار. بوتون باش کاهِن‌لَر، شیخ‌لَر و تورات معلّم‌لَری اؤردا ییغیلمیشلَردی. 54پِطرُس ایراقدان، عیسانینگ قولونجوندان گلمیشدی. ائنگ بویوک کاهِنینگ کاخی حیاطینا ائتیشنده، اؤردا ناتّورلار اینان اوت یانیندا اوتوردو تا اؤزونو ایسیته. 55ایندی باش کاهِن‌لَر و بوتون شورا، عیسا ضدّینه، شهادت قولونجونا گزیرلَردی تا عیسایی اؤلومه وئرَلَّر. آما هئچ ماهان بولمادیلار. 56چوخ آداملار عیسا ضدّینه یالان شهادت‌لَر وئریرلَردی آما اوللارینگ شهادت‌لَری بیر بیر اینَن جور گلمئیردی. 57اوندا بیر پارا توردولار آیاقی و یالاندان عیسا ضدّینه بئله شهادت وئردیلر و دئدیلَر کی: 58«بیز ائشیتدیک کی بو کیشی دئییردی، ”بو مَعبدی کی بَشر اَلی اینن دؤزه‌لمیش یومورارام و اؤچ گؤنه بیر آیری مَعبد دؤزه‌درم کی بَشر اَلینه دؤزه‌لمه‌میش.“» 59آما حتّی اوللارینگ بو شهادتی دا بیر بیر اینَن جور گلمه‌دی. 60اوندا ائنگ بویوک کاهِن توردو اورتایا و عیسایا دئدی: «هئچ جواب یوخونگ کی وئرَینگ؟ بو نه‌دیر کی بو آداملار سَنینگ ضدّینه شهادت وئریرلَر؟» 61آما عیسا بی سَس قالدی و اؤنا جواب وئرمه‌دی. ائنگ بویوک کاهِن گئنه بئلَسیندَن خبر آلدی دئدی: «سن وَعده وئریلَن مَسیح، مُتَبارک تارئ‌نینگ اوغلویانگ؟» 62عیسا دئدی: «وارام، و انسان اوغلونو گؤرَرَینز کی قُدرتلی تارئ‌نینگ ساغ اَلینده اوتورموش و گؤیونگ بولوت‌لاری اینن گلیر.» 63اوندا ائنگ بویوک کاهِن اؤز یَقه‌سینی ایرتدی و دئدی: «داها آیری شاهدلَره نه احتیاج واریمیز؟ 64اؤنونگ کُفرینی ائشیتدینز. تَصمیمینز نه‌دیر؟» اوللارینگ واریسی عیسایی محکوم ائدیلَر و دئدیلَر حَقّی دیر کی اؤله. 65اوندا اوللارینگ بیر پاراسی عیسایا تیفیردیلَر؛ عیسانینگ گؤزلَرینی باغلادیلار و اؤنو وورا-وورا، بئلَسینه دئییرلَردی: «نَبوّت ائد! سنی ووران کیم دیر؟» ناتّورلار ده عیسایی توتدولار و ووردولار.
پِطرُسینگ حاشا ائدمَکی
66ائله بو موقعده پِطرُس، حلی آشاغدا حیاط ایچینده ایدی. ائنگ بویوک کاهِنینگ بیر جاهال کنیزلَریندن گلدی 67و پِطرُسی گؤردو کی اوت یانیندا اؤزونو ایسیتیردی. او آرواد اؤنا باخدی و دئدی: «سن ده ناصِره‌لی عیسا اینان ایدینگ!» 68آما پِطرُس حاشا ائدی و دئدی: «نه بیلیرَم و نه ده آنگلاییرام کی سن نه دئییرَینگ!» بونو دئدی و دروازه‌یه ساری گئتدی. ائله بو موقع خوروس بونگ وئردی. 69پِطرُس دروازه یانیندا ایدی کی ائله او جاهال کنیز گئنه بئلَسینی گؤردو و اؤردا تورانلارا دئدی: «بو کیشی اوللارینگ بیرسی دیر.» 70آما پِطرُس گئنه ده حاشا ائدی. بیر آز وختدن سورا، اؤردا تورانلار گئنه پِطرُسا دئدیلر: «هئچ شَک یوخ کی سن دا اوللارینگ بیرسی‌‌یَنگ. بو سَبریه کی سن دا جَلیل ولایتی‌نینگ آدامی‌یَنگ.» 71آما پِطرُس اؤزونه لَعنت وئردی و آند ایچدی کی: «من بو سیز دئدیگی کیشی‌یی تانیمئیرام!» 72کی بیردَن خوروس ایکّینجی دفعه ایچی بونگ وئردی. اوندا پِطرُس عیسانینگ سؤزونو یادا گتیردی کی بئلَسینه دئمیشدی: «بوندان ایلَری کی خوروس ایکّی دفعه بونگ وئره، سَن منی اؤچ دفعه حاشا ائده‌رَینگ.» پِطرُسینگ اؤره‌کی داشدی و آغلادی.
@ 2024 Korpu Company
