awEfeso 3
3
Murummwa a amalapo
1Mwaha wa yeeyo, miyo Pawulo kiri ootthukiwa a Kristu Yeesu niwoko na woosivelani nyuwo amalapo. 2Vekhaihai nyuwo mohiiwa yuulummwaka ya ikuru miyo kivahiwaaka mwaha wa nyuwo niwoko na mahala a Muluku. 3Eyo tiiyo ntikhinelo kisuwelihiwaaka moothupululani, ntoko koolepenlaakani woowaakuveya. 4Vano, mwaasomaka, munoowera wiiwexexa osuwelawaka wa ntikhinelo na Kristu. 5Nna khaasuwelihiwe atthu a ikhapira sikina. Mene vano, noosuweliheriwa ni Munepa arummwa ootteela ni maprofeeti a Muluku. 6Ntikhinelo ti nna: niwoko na masu ooreeraxa, amalapo anoowera waakhela yoohiyeriwa* vamoha ni aYixrayeli. Amalapo aritho mipatta sa erutthweene yeeyo, ni mwa Kristu Yeesu aakhalano yoororomelihiweene yeeyo ntoko aYixrayeli. 7Koothatuwa murumeiyi a masu ooreeraxa ala niwoko na mahala a Muluku kivahiwaaka, ni owera wa ikurusawe. 8Kiri mweeraru kireene ooyevaxa variyari wa ootteela, koovahiwa mahala ala oowaalaleera amalapo mihakhu soohaalikeleya sa Kristu, 9ni waathalihera ootheene mutekwaaya wa ntikhinelo nna, mwa nenno okhuma khalayi naahiipithihiwa mwa Muluku, mwa Yoowo opanke itthu sootheene. 10Yootthuneya ya mahala ala yaari weera ni ekhavihero ya ikerexa, miruku siri soopwahaxa sa Muluku sisuwelihiwe vaanaano vaava wa owera ni ikuru siri wiirimu, 11ntoko soovaanelasawe sa khalayi Owo okwanihenre mwa Kristu Yeesu, Apwiyaahu. 12Niwoko na omuroromelawahu Kristu, ninoowera omwaattamela Muluku ni murima woolipa ni oneethi. 13Tivawo, kinoovekelani weera muhiporore niwoko na sohaawasaka wa nyuwo, niwoko iyo siri ovuwawanyu.
Pawulo onaavekelela ootteela
14Tivawo kinnakokhorela ohoolo wa Atiithi, 15mwa Yaawo emusi yootheene eri wiirimu ni vathi enimwaakhela Nsinanaya. 16Kimvekela weera mwaha wa mihakhu soovuwaxa, Awo anoolipihani ni ikuru niwoko na Munepa onkhala mmirimanimwanyu, 17weera Kristu akhale mmurimanimwanyu niwoko na nroromelo. Kimvekelatho weera nyuwo, mureene oothipeliwa ni oolipihiwa moosivelani, 18muwere wiiwexexa vamoha ni ootteela ootheene mweekhuveeloni, mweerakameloni, orakamawaya ni wiixerawaya wa osivela iwo. 19Aani, kimvekela weera musuwele osivela wa Kristu ompwahaxa osuwela wootheene, weera nyuwo musareiye ni ekwanihero yootheene ya Muluku. 20Wa Yoowo ongwera opaka woopwahaxa yeeyo yootheene hiyo nimvekelaahu, naari nnuupuwelaahu mwaha wa ikurusaya sinnivarela muteko mwa hiyo, 21wa Yoowo okhale ovuwa woohimala wa ekhapira ti ekhapira mukerexani ni mwa Kristu Yeesu.
Currently Selected:
awEfeso 3: VMK2021
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Makhua Shirima Bible © Christelike Lektuurmaatskappy NPC, 2021.