Lik 24
24
Naɗawti Iisa min aacco giimi ku mattenta
(Elloŋ Matiye 28.1-10, Mark 16.1-8, Yaaya 20.1-10)
1Gaa meene ta ahatti, gu daati arimɗe ƴekker ka gu kaatiɗe mooniti Iisa, o gu golommiya siwinco ku maa gu amasse ma itir. 2Maa gu sarɗe, guu deeɗiya gassa gur̰bu kee ma obokkica moone gaa tepelpilenta min biiti. 3Guu un̰n̰iɗe aatti mooniti, guu alɗiya gassa ɗa ziiti Miltine kee Iisa. 4Guta ƴa gu gaari kooko kakawwiyoogu missa kayyeeco gu alɗo ibina ɗa latta maa gu leeɗo, gaa kaytiŋ ka gu miɗi seera pa ommiyyoo. Miɗi kotti pa esekke kaɗiŋgee purta o gu ɓelaa ta wic wic. 5Mileŋ gi ɓayaw icciyooca pa gu zonneero, guu miɗi ku seera kotti beneyyiyyoo goo: «Ayme ku deyeɗɗiya gata ma geewa aacco giimi ku mattenta? 6Gata aaye ɗa payya iŋee mooniti, naɗe min muuti. Mooyoŋga beneyti maa ga beneyyitoŋ wikinne maa ga alɗo missa kiɗa ta Galilee maa gaa: 7“Aŋka ga Runti Gimi gu biriyyooga oko picco giimi ma leewa zunubgee. Guu paapiyya kuruwayi ga maatiɗo, gaa asiɗo naɗa oko meene ma daa ta subba.”» 8Ay kaaka pe, gu daati kotti mooyiyya beneyti Iisa kee maa ga beneyye. 9Guu yookiɗe min mooniti. Guu kaatiɗe gu deeɗiy jeppa gaari kooko paracco ma deero oko n̰amaakeetee Iisa ku orro o kaƴi o oko giimi paracco ma jobokka kulla Iisa. 10Daati kotti pa ay Mariyam ta Magdala o Zaan o Mariyam yaati Zak, o gicco daare kulla ma katee ma guta, gu deeɗiyoogu jeppa gaari kooko oko n̰amaakeetee Iisa. 11Guu n̰amaakee soopa leeɗiki beneyco kaaka beneyyi gonek ka. Ay ɗakko appe gu alɗiki amanna ɗa beneyco kaaka. 12Gaa ma kaaka aɗe soopa ga Piyer waciɗe, gaa gaɗɗiɗe ga kaatiɗe mooniti Iisa. Gaa daaliɗe ga ƴugilɗe ku maa ga elliɗo samaane, gaa elliɗe kapanne kayti ka. Gaa ajjibiɗe oko gaari kooko ma deero. Gaa yookiɗe giiri.
Iisa ma jobookeetee ku seera botol ka Emayus
(Elloŋ Mark 16.12-13)
13Gaa meene taata saa, gu seera min oko jobookeetee katawɗo darre maa gu kolaa goo Emayus. Beenanne Emayus o geegar ka Zerizalem pa, deewa latta ka orro o kaƴi kilometir. 14Guta pa, beneyya aacco ma gaari paracco ma deero oko meeni kotti. 15Gaa wikinne maa gu beneyɗo o gu melaa ma gaari kotti, ga Iisa saa ma kayaati asiyyo saripco, gaa marriɗe ma guta. 16Guu elelɗiya, gaa lekkiɗo soopa maatiki aɗe ma toɗokkiyo ku maa gu alɗiya ibina ɗa.
17Gaa Iisa inniɗiy gaa: «Ay ini me gaarta ma melewkitoŋ o ku tan̰aa?» Guu warriɗe zorontiyenta. 18Gaa kaƴi min aacco maa gu semeetee goo Kileyopas tiiliyyee gaa: «Ay kii kaycum ka pe ɗeɗe min oko turi ma asee Zerizalem ma geewiy ɗa gaari ma deero oko meeni kooko?» 19Gaa Iisa inniɗiy gaa: «Gaari ŋawwa?» Guta pa tiiliyee goo: «Gaari ma deyyee oko Iisa ka geegar ka Nazaret. Gata ma ay nabiinice tatta ma liyaawitee ku ajjibiti o ma beneyyiŋgeetee unti Mellayi o unco giimo. 20Guu taattuweetine koo ku soƴoowee ku saɗikaŋgeyyo o taattuweetine daare biriyyooga picco taattuweeco Roomennigeyyo gu caaɗiyyee parlane, guu deeɗiya ma paapo kuruwayi. 21Nii pa ocokke nii e ga ay gata appe maa ga Mella n̰akamme ku maa ga keeta giimi ku Isirayel gassiɗiy kayyeetine min picco giimi ma aŋkine ɗa. Gaa keeke appe haŋka paratti, gi teete alɗo meene ma daa ta subba min maa gu gaari kooko asiɗe. 22Lekka daati minnaw min aattini ma beneyyini ma gaari ku ajjibiti ta kaw. Guta arme ƴekker ka gu kaatiɗe mooniti. 23Guu alɗiya gassa ɗa ziiti, guu yookiɗe gu asinni beneyya goo: “Malaykatnigee oomini, guu beneyyinni goo ga Iisa geewa!” 24Guu minnaw min aattini kaatiɗe kulla mooniti. Guu gassiyya paratti aleŋ maa gu daati beneyye, gata soopa gu elliyya ɗa.»
25Gaa Iisa beneyyiyyoo gaa: «Ɓay, kuŋ ay giimi maa gu kayyeetoŋ ecekka ɗa gaari! Galbigeetoŋ suura amanniti oko beneyyiŋgee paracco maa gu nabiinigee beneyye 26maa goo: Aŋka ga Masi, gata maa ga Mella aparre, diigiyɗo aleŋ teete appe, gaa Mella biriyyeeca ka pe darjanti.» 27Gaa Iisa passiliyyoogu beneyyiŋgee ma aaye Kitamniti Mellayi paracco ma beneyye ma gaartee. Gata pa diile ma Kitamniti Muusa namma ya kutubgee koo ku nabiinigeyyo paracco.
28Guu sarɗe katta darre maa gu katawɗo, gaa Iisa leeɗe aleŋ kuu ga aŋka missa ƴiilo omma. 29Guta pa kuddiyyee goo ga nuntu ma guta asan gi paato kaate, katta galaawi. Gaa oyyiɗe gu un̰n̰iɗe girco, gaa deeɗe nunta ma guta. 30Gaa nuntiɗe tiyaawi ma guta, gaa icciyya mappa, ga leeɗiyee barkinti oko Mellayi, gaa erriyya ga biriyyooga. 31Gaa oko wikinne kaaka saa, gu iɗiico iyyiyyo karaŋ gu ibiniyya. Gaa masiliyyo min unco. 32Guu beneyɗo aacco goo: «Maa ga beneyɗeŋ butuuli o maa ga garkayɗiyeŋ ma beneyyiŋgee ku Kitamniti Mellayi, ke aawe parhane maani galbigeeteŋ!»
33Gaa oko wikinne kaaka saa, gu waciɗe serco gu yookiɗe Zerizalem. Guu sarɗe geegarri were maa gu n̰amaakee ku orro o kaƴi temeɗɗe o jobookeetee daare kulla aayiyo. 34Guu n̰amaakee ma gicco jobookee daare beneyyiyyoo oko jobookee ku seera goo: «Ay seene saa pe, ga Miltine kee Iisa naɗe min muuti. Gata oomiyee oko Simo!» 35Guu jobookee ku seera koo beneyyiyyoogu gaari ma deyyo butuuli goo: «Ni ibiniya Iisa wikinne maa ga erriyya mappa.»
Iisa okommayo oko jobookeetee
(Elloŋ Matiye 28.16-20, Mark 16.14-18, Yaaya 20.19-23)
36 Jobookee ku seera koo beneyya missa, gaa Iisa ma kayaati saa pe oomiyyoo ga waraɗɗe ɗaɗɗakkico, gaa salammiɗiy gaa: «Gi aapiya dee ma kuŋ!» 37Guu jobookeetee ga ɓayaw galiyyoo asan gu moyaa goo walaŋ ga maa gu ella ay kir̰mu. 38Gaa Iisa beneyyiyyoo gaa: «Ayme ku rawrawɗe goŋŋa? Ayme ku bamaɗɗica seera seera galbigeetoŋ kuu walaŋ ga naa ɗa? 39Elloŋgu pittaw o asintaw. Ay naata aɗe! Eesino, o ku ellino! Kir̰mu lekka ɗa zii o assu. A naa pa, ku ellinoo paaɗe kadar na lekka zii o assi!» 40Ma beneyti kaaka pa, ga gaariyoogu pittee o asintee. 41Guu jobookeetee parhinɗe ta tirta o gu ajjibe namma gu alɗe amanna ɗa missa. Gaa inniɗiy gaa: «Ku lekka aɗɗe iŋeekite maatiki ka aymiti?»
42Guu biriyyee nussanti buusi rootta ka biyyenta. 43Gaa icciyya ga aymiyya unco. 44Gaa beneyyiyyoo gaa: «Maa na alɗo missa ma kuŋ, na beneyyitoŋgu gaari paracco ku kitipiyenta ma gaartaw aattí Kitamniti Muusa, o aacco kutubgeeco nabiinigeyyo, o aattí Kitamne ta Soomnigeyyo, keeke pa aŋka ga asiɗo ma butulti.» 45Gaa iyyiyyoogu kayyeeco ku maa gu ibinɗiy beneyyiŋgee ku Kitamniti Mellayi. 46-47Gaa beneyyiyyoo gaa: «Masi, gata maa ga Mella aparre, akka diigiya. Guu deeɗiya, gaa oko meene ma daa ta subba pa, ga asiɗo naɗa min muuti, o ga aŋka gi kabarre ta meeliti gaari ku miɗɗa o ta saamiyti zunubgeyyo gu taasicca ma semeetee oko ballee paracco ku kiɗaati. Taaso pa, gu delaa ƴa omma ma geegar ka Zerizalem. Keeke pa paratti, ay maa gu garkayya Kitamniti Mellayi. 48Kunta pa elliy o ku giyyiy gaari kooko. Ay kaaka appe ku deeɗiy tasawwo oko giimo. 49Naa pa n̰akammatoŋga maa ga Tattu beneyye gaa ga beraatoŋga. Kuŋ soopa, nuntoŋ iŋee aɗe aatti geegar ka Zerizalem namma ya wikinne maa ku gassicca gudirane ma asaa min uwwa.»
Iisa kalappa samaani
(Elloŋ Mark 16.19-20, Lubaakico 1.9-11)
50Gaa Iisa oomikko jobookeetee renta min geegarri, katta darre ta Beetani. Gaa iŋaa, ga cipilɗiy pittee gaa baarikiɗiy. 51Gaa wikinne maa ga baarakɗiy kaaka, ga cappiyoo, gaa Mella cipiliyya samaani. 52Guta pa logiya, guu yookiɗe aatti Zerizalem ma parhane yaata. 53Maa gu yookiɗe, guu nowoɗɗo diiman dooranti girti Mellayi gu logoɗɗiya.
Currently Selected:
Lik 24: mmy
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.