जकर्या 3
3
माहा प्रोहत ज़ैहसू
1तेखअ हुअ बिधातो स्वर्ग दूत मुंह जकर्या सेटा धैनै प्रगट, तेऊ रहैऊअ मुखा माहा प्रोहत ज़ैहसू। ज़ैहसू त बिधाते स्वर्ग दूता सम्हनै खल़्हुअ द। ज़ैहसूए दैहणीं बाखा त राख्स खल़्हुअ द कि सह ज़ैहसू लै दोश लाए।
2स्वर्ग दूतै बोलअ राख्सा लै, “तूह रह च़ुप्पी! बिधाता ज़ुंणीं एरुशलेम आप्पू बस्सणा लै आसा छ़ांटी दी, तेऊ लोल़ी तूह आप्पै नैरअ। अह मणछ आसा आगी जैंदरा का काढी दी ज़ल़दी लोई ज़िहअ।” 3ज़ैहसू त तिधी दूता आजू खल़्हुअ द, तेऊ तै चऐ आल़ै बान्हैं दै। 4स्वर्ग दूतै बोलअ ज़ुंण तेऊ नेल़ होर तै खल़्हुऐ दै, “ज़ैहसूए इना चऐ आल़ै झिकल़ै खोल्हा पोर्ही।” तेखअ बोलअ स्वर्ग दूतै ज़ैहसू लै, “मंऐं किऐ तेरै पाप दूर, ऐबै दैणैं मुंह ताल्है नऊंऐं झिकल़ै बान्हणां लै।”
5मंऐं बोलअ उझै इहअ, “माहा प्रोहते मुंडै बान्हां धोअ द एक साफअ बी।” तिन्नैं दासै बान्हअ ज़ैहसूए मुंडै एक धोअ द साफअ बी, तिन्नैं झिकल़ै बी बन्हैऊंऐं। बिधातो स्वर्ग दूत त तिधी खल़्हुअ द। 6तेखअ बोलअ स्वर्ग दूतै ज़ैहसू लै कि 7बिधाता ज़हा का सारअ बल आसा, सह बोला इहअ, “ज़ै तूह मेरअ बधान मने, ज़ै तूह तिन्नां कामां पूरै करै ज़ुंण मंऐं ताखा आसा सभाल़ै दै, तै सभाल़णीं मुंह ताखा मेरै भबन अर मेरी ताटीए ज़िम्मैंबारी। मुंह शुणनी तेरी सोभै अरज़ी तेही ई ज़ेही हुंह मुंह सेटा रहणैं आल़ै स्वर्ग दूते शूणां।
8“ज़ैहसूआ, तूह माहा प्रोहत, ताह संघै ज़ुंण होर तेरै साथी प्रोहत आसा बेठै दै, तम्हैं शूणां मेरी गल्ला धैन दैई। तम्हैं आसा एते नछ़ैण कि आजू हणअ भलअ। मुंह करनअ आपणअ दास खल़अ ज़ुंण बूटा का लागी दी टिरा ज़िहअ हणअ। 9मंऐं लाअ ज़ैहसू सम्हनै एक किम्मती पात्थर डाही, तेते आसा सात मोहरै। तेथ खेल़णैं मुंह आपणैं बैण, अर ऐहा ज़ैगे पाप करनै मुंह एकी धैल़ी भितरी दूर। 10ज़ेभै सह धैल़ी एछे, तेभै शादणैं तम्हां हरेकी आपणैं संघी-साथी खुशी मनाऊंदै दाखे बागा दी अर फेडूए बूटा हेठै।”
Currently Selected:
जकर्या 3: OSJ
ማድመቅ
ኮፒ
አወዳድር
ያጋሩ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
This work is licensed under Creative Commons Attribution-ShareAlike 4.0 License.