होशे 9
9
इज़राईला लै सज़ा
1इज़राईलीओ! तम्हैं निं होरी देशा ज़ेही खुशी मनाऊंदै लागा। तम्हैं हुऐ थारै परमेशरा का दूर अर तम्हैं निं तेऊ लै शुचै-पाक्कै रहै। तम्हैं बिक्कै कंज़री बेटल़ी ज़िहै बाल देअआ लै! तम्हैं झ़ूरै तेऊ नाज़ा लै ज़ुंणी हर खहल़ै थारी कंज़रैईए किम्मत दैनी। 2पर खहल़ो नाज़ निं थारै लोगा लै पूरअ पल़णअ। ज़ुंण तम्हैं कोफरी दाखो रस झाल़अ, तेता करै बी निं तम्हैं रज्ज़णै। 3तम्हैं निं ऐबै बिधाते देशै रहणैं। एप्रैम! ताह लागणअ मिसर देशे गलामी लै फिरी डेऊणअ। ताह लागणीं अश्शूर देशे छ़ोतली च़िज़ा खाणीं। 4तिन्नां पराऐ देशै निं तम्हां बिधाता लै दाखे रसो अर्घअ दैणअ भेटणअ अर नां बिधाता थारै बल़ीदाना करै खुश हणअ। थारअ भोज़न ज़ुंण बी खाए, तेता करै लागणीं तिन्नां छ़ोत, सह हणअ मरगे धैल़ी रोटी खाणैं ज़िहअ। सह भोज़न हणअ सिधअ पेटे भुख शांत करना लै, पर सह निं बिधाते भबनै छ़ाडणैं जोगी हणअ। 5गलामी दी रहंदी ज़ांऊं मुंह बिधाते अदर करना लै तिह-थैरे धैल़ै एछणैं, तेथ निं तम्हैं किछ़ करनै जोगी हणैं! 6भाल़ा! ज़ांऊं अश्शूर देशे सैना चुटी पल़णअ, तम्हां मांझ़ै जाणैं कई तेऊ बनाशा का बच़ी निखल़ी। तिंयां ढाकणैं मिसर देशे सैना। तिंयां मरनै माफीस नाओंए ज़ैगा अर लोगा डाहणैं तिंयां तिधी दाबी। तिन्नें सुन्नैं-च़ंदीए किम्मती च़िज़ा रहणीं कुंगशी-कार्हलै जैंदरी पल़ी अर तिन्नें घअरै राझ़णैं झ़िंझ़रे कांडै ज़ेते तिंयां मालक थिऐ।
7सज़ा दैणैंओ बगत गअ पुजी, तिंयां धैल़ै गऐ नेल़ एछी ज़ेभै तम्हां थारै पापो बदल़अ भेटणअ। ज़ेभै इहअ हणअ, तेभै जाणअ तम्हां इज़राईली का एतो थोघ लागी ज़ुंण तम्हैं इहअ बोला, “अह गूर आसा ऐडअ, अह बिधातो समाद खोज़णैं आल़अ मणछ आसा बेगरअ।” तम्हैं लोग करा मुल्है खास्सी नफरत किल्हैकि तम्हैं आसा खास्सै पाप किऐ दै।#लूक. 21:22 8बिधाता छ़ाडअ हुंह आपणअ गूर कि हुंह तेऊए परज़ा एप्रैमा लै चतैनगी दैए। पर ज़िधी बी हुंह डेओआ, तम्हैं च़ाहा मुंह ढाकणअ ज़िहअ शकारी आपणैं ज़ज़ाल़ा दी च़ेल्लू ढाका। बिधाते भबनै तोही आसा तम्हैं मुंह बिधाते गूरे दुशमण हुऐ दै। 9तम्हैं आसा पापा दी तिहै ई डुबै दै ज़िहै थारै लोगै गिबा नगरी घोर पाप किऐ तै। बिधाता डाहणैं तिन्नें पाप आद अर तेऊ दैणीं तिन्नां लै तेते सज़ा ज़रूर।#पांच़ 19:1-30
इज़राईलो पाप अर तेतो फल
10बिधाता बोला इहअ, “ज़धू मुंह इज़राईल पैहली बारी भेटअ, सह त रेगीस्तानै दाखे बेला भेटणैं ज़िहअ। ज़धू मंऐं थारै दाद-बाब पैहली बारी भाल़ै, तिंयां तै इहै, ज़िहअ कि मंऐं भाल़ै पैहलकै भ्रहे पाक्कै फेडू। पर ज़ांऊं तिंयां बाल-पोर धारा आऐ, तिधी पुजी लागै तिंयां बाल देअए पूज़ा करदै अर खिरी हुऐ तिंयां झ़ट च़ारै तिन्नां ई देअआ ज़िहै च़िल़्हखरै ज़हा लै तिंयां झ़ूरा तै।#गण. 25:1-5 11एप्रैमे शोभा लुक्कणी ज़िहअ च़ेल्लू डैअ दैई दूर डेओआ। इज़राईले बेटल़ीओ निं आजू किछ़ हणअ-ज़ाणअ। तिंयां निं सुंदी ई हणीं। 12पर ज़ै तिंयां आपणैं शोहरू-शोहरी धाची करै बडै बी करे, तिंयां बी करनै मुंह तिन्नां का दूर कि तिन्नें पठी अत्री होए। ज़ांऊं मुंह इना मणछा छ़ाडी दूर डेऊणअ, सह बगत हणअ इना लै आफ़त।”
13मुखा शुझुअ कि एप्रैम आसा सूर नगरी ज़िहअ शोभली ज़ैगा बस्सअ द। पर ऐबै लागणै एप्रैमा आपणैं शोहरू-शोहरी दुशमणा सेटा मारना लै आणनैं! 14बिधाता, हुंह तेरी परज़ा लै किज़ै मांगूं? इहै ओदर ज़ेता का लुआद ई निं हंदी? कि एही च़ूई ज़ेता का दुध ई निं निखल़णअ!
इज़राईला लै बिधातो नसाफ
15बिधाता बोला इहअ, “तिन्नें कदुष्ट कामां करने शुरूआत हुई गिलगाल नगरी का। तिधी का हुई मुंह बी तिन्नां का नफरत। तिन्नें कदुष्ट काम करनै पिछ़ू ई काढणैं मुंह तिंयां आपणीं ज़ैगा का दूर। ऐबै निं हुंह तिन्नां लै झ़ूरदअ, तिन्नें सोभी सैणैं किअ मुल्है द्रोह। 16एप्रैम आसा इहै बूटा ज़िहअ ज़ेते ज़लैल़ै शुक्की आसा गऐ दै अर ज़ेथ फल़ ई निं लागदै। तिन्नें निं आजू किछ़ हणअ, पर ज़ै तिन्नें बेटल़ी सूए बी, तिन्नें तिंयां बच़ै पाणै मुंह मारी ज़ुंण तिन्नें दिले काल़ज़ै आसा।”
गूरै खोज़अ इज़राईले बारै
17परमेशर ज़सरी च़ाकरी हुंह करा तेऊ निं तिंयां मनणै, किल्हैकि तिन्नैं निं तेऊए इज़त किई। तिंयां रहणैं देशा-देशा जैंदरी ठुल़्दै लागी।
Currently Selected:
होशे 9: OSJ
ማድመቅ
ኮፒ
አወዳድር
ያጋሩ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
This work is licensed under Creative Commons Attribution-ShareAlike 4.0 License.