मूल़ 30
30
राहेल, लिओ एकी-दुजैओ मांण
1राहेल करा ती ऐहा गल्ला लै ज़ीद-मिश कि लिए हुऐ शोहरू-माठै, अर तैहा बोलअ याकबा लै, “ज़ै तूह मुल्है शोहरू-माठै निं दैए हणैं, मुंह मरनअ हेरे।”
2याकबै बोलअ रोश्शै राहेला लै इहअ, “मुल्है किल्है लाआ तूह एतो दोश हुंह कै बिधाता आसा?”
3राहेलै बोलअ याकबा लै, “इधी आसा भाल़ मेरी दासी बिल्हा, ऐहा करै दै मुल्है शोहरू, ऐहा दैणअ मुंह आपणैं ज़ान्हूं सेटा सूंणैं, तेखअ ज़ुंण शोहरू होए सह हणअ मेरअ।”
4तेखअ दैनी राहेलै आपणीं दासी बिल्हा याकबा लै अर सह रहअ तैहा संघै। 5इहअ करै हुअ याकबो बिल्हा का एक शोहरू।
6राहेलै डाहअ तेऊ शोहरू नाअं इहअ बोली दान, “बिधाता शूणीं मेरी अरज़, तेऊ किअ मेरअ नसाफ।”
7ज़ांऊं दासी बिल्हा अर याकबा का दुजअ शोहरू हुअ ता 8राहेलै बोलअ, “हुंह झाठुई-बच़ोठुई आपणीं बैहणी संघै खास्सी खिरी हुई ऐबै मेरी ज़ीत!” इहअ करै डाहअ तैहा तेऊ शोहरूओ नाअं नप्ताली#30:8 नप्ताली मतलब मेरअ झ़गल़अ।
9ज़ांऊं लिआ ज़ाणअ कि मेरै निं ऐबै आजू किछ़ै हणअ आथी, तैहा दैनी आपणीं दासी ज़िल्पा याकबा लै बैही। 10लिए दासी ज़िल्पा अर याकबो हुअ एक शोहरू।
11लिआ बोलअ इहअ, “हुंह आसा सच्च़ी भागा आल़ी।” संघा डाहअ तैहा तेऊ शोहरूओ नाअं गाद।
12तेखअ हुअ याकबो ज़िल्पा दासी का दुजअ शोहरू।
13लिआ बोलअ इहअ, “हुंह आसा ऐबै खास्सी खुश, सोभी बेटल़ी बोल़णअ मुल्है इहअ कि अह भाल़ केही भागा आल़ी आसा।” तैहा डाहअ तेऊ नाअं आशेर।
14कणक लऊंणे ऋता भेटै रूबेना गुआंकल़ी#30:14 गुआंकल़ी एता लै बोला झ़ूरीओ फल़ बी, एते बारै बोला इहअ बी कि एता खाई एछा मर्धा खास्सअ जोश, संघा हआ बेटल़ी सुंदी फल़ अर तेऊ निंयैं तिंयां आपणीं ईजा लिआ सेटा। तेता भाल़ी बोलअ राहेलै लिआ लै, “ज़ुंण तेरै शोहरू ईंयां गुआंकल़ी आणी, एता का दै मुल्है बी धख ज़िहै।”
15लिआ दैनअ तैहा लै ज़बाब, “मेरअ लाल़अ निंईं करै बी निं तूह अज़ी रज्ज़ी ऐ? ऐबै कै तंऐं मेरै शोहरू आणी दी गुआंकल़ी बी लाई निंईं।” तेखअ बोलअ राहेलै तैहा लै, “च़ल्ल इना गुआंकल़ीए बदल़ै सुत्तणअ याकब आझ़ राची ताह संघै।”
16सान्हां ज़ांऊं याकब घअरा लै फिरी आअ, लिआ बोलअ तेऊ लै, “आझ़ राची लागणअ ताह मुंह ई संघै सुत्तणअ किल्हैकि मंऐं लअ तूह आपणैं शोहरू आणी दी गुआंकल़ी करै।” तेखअ सुत्तअ तैहा राची याकब तैहा ई संघै।
17बिधाता शूणीं लिए अरज़ अर सह हुई पांज़ूई बारी सुंदी संघा हुअ याकबो पांज़ूअ शोहरू।
18लिआ बोलअ ज़ोरै-ज़ोरै इहअ, “मंऐं दैनी आपणीं दासी याकबा लै अर तैही दैनअ मुल्है बिधाता तेतो पुआज़अ।” तैहा डाहअ तेऊ शोहरू नाअं इस्साकार#30:18 इस्साकार मतलब भैंट।
19तेखअ हुअ याकब अर लिआ का एक होर शोहरू, 20तेखअ बोलअ लिआ इहअ, “बिधाता दैनअ मुल्है सोभी का बधिया दान, मेरै छ़ऊऐ शोहरू बाद रहणअ मेरअ मर्ध मुंह ई संघै।” तैहा डाहअ तेऊ नाअं ज़बलून#30:20 ज़बलून मतलब इज़त/अदर।
21तेखअ हुई लिआ का एक शोहरी अर तैहा डाहअ तैहा नाअं दीना।
22-23खिरी शूणीं बिधाता राहेले प्राथणां अर तेसो बी हुअ शोहरू। तेखअ लागी राहेल इहअ बोल्दी, “बिधाता किअ मुल्है पल़अ द फिटक दूर। 24परमेशर बिधाता हेरनअ मुल्है होर शोहरू दैई।” तैहा डाहअ तेऊ शोहरू नाअं युसुफ#30:24 युसुफ मतलब मुल्है दैनअ एक होर।
याकबो आपणैं मामा संघै सुल्हअ
25राहेला का ज़ांऊं युसुफ हुअ, तेखअ बोलअ याकबै आपणैं माम लाबाना लै, “ऐबै दै मुंह डेऊणैं, हुंह च़ाल्लअ आपणैं घअरा लै। 26मेरी बेटल़ी-माठै, ज़सरी तैणीं मंऐं एतरी साला च़ाकरी किई तिन्नां बी दै मुंह संघै एछणैं। ताखा आसा आप्पै थोघ भाल़ कि मंऐं किअ तेरअ खुल्है दिलै काम।”
27लाबानै बोलअ तेऊ लै, “ज़ै ताखा मुल्है झींण आसा, तै दै तूह इधी रहणैं, किल्हैकि एतरी साला हेरअ मंऐं भुझ़ी कि ताह पिछ़ू दैनी बिधाता मुल्है खास्सी बर्गत।”
28तेखअ बोलअ तेऊ भिई इहअ, “तूह बोल खुशी-खुशी कि ताह किज़ै लोल़ी, सह हेरनअ मुंह ताल्है दैई।”
29याकबै दैनअ तेऊ लै ज़बाब, “ताखा आसा आप्पै थोघ कि मंऐं तेरअ किहअ-किहअ काम निं किअ अर तेरै डागै-चैणैं मंऐं किहै-किहै धाचै।
30“मेरै ताह सेटा एछणैं का आजी निं ताखा खास्सअ किछ़ै आथी त। ज़ुंण बी मंऐं किअ तेता करै दैनी बिधाता ताल्है खास्सी बर्गत। पर ऐबै हुअ मुंह आपणअ घअर-बार भाल़णअ।”
31लाबानै बोलअ तेता लै इहअ, “तै हुंह ताल्है किज़ै दैंऊं मेरै भाणज़ा?”
याकबै बोलअ तेखअ इहअ, “मेरी निं ताखा किछ़ै मांग आथी, सिधी एक गल्ल आसा, हुंह रहूं आजू बी तेरी भेडा-बाकरीए हेल़्ही फुआल लागी।
32“तेरी भेडा-बाकरीए हेल़्ही जैंदरा का करूं हुंह आझ़ सोभै काल़ै गाभू-छ़ेल्हू, अर सोभै झिटबझिट्टी गाभी-छ़ेल़्ही ज़ुदी। तिन्नां दैऐ तूह मुल्है मेरी च़ाकरी करने किम्मत।
33“आजू पोर्ही बी जाणअ ताखा थोघ लागी कि हुंह मानदार आसा कि नांईं। धर्म अर मानदारीए हणीं एही शाजत कि ज़ेभै तूह मेरी भेडा-बाकरी मांझ़ै भाल़अ बी एछे, तेभै ज़ै ताखा तिन्नां मांझ़ै कोई चैणअ काल़अ या झिटबझिट्टअ नांईं शुझिए, तेखअ जाणअ थोघ लागी कि अह आसा तेरी च़ोरी पाई दी।”
34तेखअ बोलअ लाबानै, “ज़िहअ तंऐं बोलअ, हाम्हां करनअ तिहअ ई।”
35तैहा ई धैल़ी किऐ लाबानै झिटबझिट्टै अर शेतै काल़ै-शेतै चटाका आल़ै गाभू-छ़ेल्हू अर भेडा-बाकरी ज़ुदै संघा डाहै तिंयां आपणैं शोहरू का सभाल़ी।
36संघा डाही तिन्नां भेडा-बाकरीए हेल़्ही याकबा का एतरी दूर कि तिधी पुजणा लै लागा तै ज़ांघा हांढी चअन धैल़ै। याकब रहअ लाबाने बाकी भेडा बाकरी फुआल लागी।
37तेखअ आणी याकबै सपेदै, बदाम अर चनारे बूटे हरी शाण्हटी चोल़ी संघा पाई तेते शल़ेफल़ै च़लोऊई करै एही धारी कि तिन्नां शाण्हटीए शोठी दी लागी शेती धारी शुझदी।
38तिंयां शाण्हटी डाही तेऊ चैणें पाणीं झुटणें च़राठी सेटा खल़ी करी। ज़ांऊं भेडा-बाकरीए हेल़्ह पाणीं झुटदी आई, तेभै हुई तिंयां गाभणीं।
39तिन्नां शाण्हटी सम्हनै गाभणीं हुई दी भेडा-बाकरीए हेल़्ही दी हुऐ आजू धारीदार झिटबझिट्टै चैणैं।
40तेखअ किई याकब बाकरी मांझ़ा का भेडा ज़ुदी संघा डाही धारी आल़ी झिटबझिट्टी लाबाने भेडा बाकरी का आर पार सम्हनै ज़ुदी। इहअ करै बणाईं तेऊ भेडा-बाकरीए आप्पू लै ज़ुदी हेल़्ह।
41ज़ेभै-ज़ेभै मोट्टी भेडा-बाकरीए हेल़्ह पाणीं झुटदी एछा ती, तेभै-तेभै डाहा त याकब तिन्नां शाण्हटीए शोठी च़राठी सेटा खल़ी करी ताकि तिंयां तेता भाल़ी गाभणीं होए।
42पर ज़ेभै दुबल़ी भेडा-बाकरीए हेल़्ह पाणीं झुटदी बारी गाभणीं हआ ती, तेभै निं सह तिन्नां शाण्हटी तिधी डाहंदअ त। इहअ करै हुई दुबल़ी-दुबल़ी भेडा लाबाने अर मोट्टी-मोट्टी भेडा याकबे।
43इहअ ई करै हुअ याकब खास्सअ सेठ। तेऊए हुई खास्सी भेडा-बाकरी, दास-दासी, गाधै अर ऊँटे हेल़्ही।
Currently Selected:
मूल़ 30: OSJ
ማድመቅ
ኮፒ
አወዳድር
ያጋሩ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
This work is licensed under Creative Commons Attribution-ShareAlike 4.0 License.
