मूल़ 22
22
आपणअ पैरअ शोहरू कर्बान करनअ
1थोल़ी साला बाद हुअ इहअ कि बिधाता सोठी आबरामा परखणें गल्ल।
तेऊ बोलअ, “आबराम!”
आबरामै बोलअ, “बोल मालक, किज़ै हुकम आसा!”#इब्रा. 11:17-19
2बिधाता बोलअ आबरामा लै, “आपणैं कल्है शोहरू इसहाका ज़हा लै तूह खास्सी झ़ूरी करा, एऊ निंऊं आप्पू संघा मोरिया देशा लै। तिधी खोज़ूं हुंह ताखा एक धार, संघा करै तूह एऊ शोहरू मुल्है हूम बल़ी।”#2 इति. 3:1
3दुजै धैल़ै दोत्ती उझ़ुअ आबराम दोत्थी। संघा लादी गाधै प्रैंदै बल़ीदान हूम बल़ी करने झ़ुका, दूई दास अर इसहाक निंयं आप्पू संघा। तेखअ लागै तेथ बाखा लै हांढदै ज़िधा लै बिधाता बोलअ त।
4हांढदी-हांढदी ज़ांऊं तिन्नां चअन धैल़ै हुऐ, तेखअ भाल़ी आबरामै सह ज़ैगा दूरा का।
5आबरामै बोलअ आपणैं दासा का, “तम्हैं करा इधी इना गाधै सेटा बशैघ, हुंह अर इसहाक एछमैं बिधाता पूज़ी, तेखअ एछणैं हाम्हैं इधी लै फिरी।”
6तेखअ लादी आबरामै हूम बल़ी करने झ़ुका इसहाका दी अर आपणैं हाथै ढाकी आग अर छ़ूरी। तेखअ लागै तिंयां दुहै संघा-संघा हांढदै।
7-8इसहाक लागअ इहअ बोल्दअ, “बाबा, हाम्हां का आग बी आसा अर झ़ुका बी आसा, हूम बल़ी करना लै मिम्मूं किधी आसा?”
आबरामै दैनअ ज़बाब, “मेरै बेटैआ, मिम्मूंओ इंतज़ाम करनअ बिधाता आप्पै।”
संघा रहै तिंयां दुहै हांढदै लागी।
9तेखअ पुजै तिंयां ठीक तैहा ज़ैगा ज़ुंण बिधाता आबरामा का खोज़ी ती। तिधी पुजी बणाईं आबरामै एक बेदी, संघा डाही तेथ प्रैंदै झ़ुका। तेखअ बान्हअ आपणअ शोहरू इसहाक संघा पाअ सह बेदी दी तिन्नां झ़ुका प्रैंदै। #याक. 2:21
10तेखअ च़की आबरामै इसहाका बल़ी करना लै छ़ूरी। 11पर बिधाते एकी दूतै पाई उझै का हाक्का, “आबराम! आबराम!”
आबरामै बोलअ, “किज़ै हुकम मेरै मालक?”
12तेऊ स्वर्ग दूतै बोलअ, “एऊ शोहरू निं मारी, ऐबै गअ मुखा थोघ लागी कि तूह झ़ूरा बिधाता लै खास्सअ, किल्हैकि तेऊए तैणीं निं तूह आपणैं शोहरू बल़ीदान करना लै बी पिछ़ू हटअ।”
13आबरामै भाल़अ उझै बाखा अर तेऊ का शुझुअ एक गाभू, तेऊ गाभूए शींग थिऐ झ़ाकल़ै शाचै दै। आबरामै आणअ सह गाभू ढाकी संघा किअ आपणैं शोहरूए ज़ैगा सह हूम बल़ी।
14आबरामै डाहअ तैहा ज़ैगा नाअं “बिधाता हेरनअ इंतज़ाम करी।” तैही बोला लोग आझ़ तैणीं बी, “बिधाते धारा जाणअ इंतज़ाम हई।”
15तेखअ बोलअ बिधाते दूतै आबरामा लै स्वर्गा का दुजी बारी, 16बिधाता बोला इहअ, “तूह निं मेरी तैणीं आपणैं कल्है शोहरू बल़ीदान करनै का बी पिछ़ू हटअ। तैही खाऐ मंऐं आपणैं सोह कि#लूक. 1:73,74 17एता पिछ़ू दैणीं मुंह ताल्है बर्गत, तेरी आद-लुआद बढेरनीं मुंह सरगे तारै अर समुंदरे रेता ज़िहै खास्सै ज़हा कुंण गणी निं सकदअ। ज़हा नगरी तिन्नें दुशमण होए बस्सै दै, तिंयां सोभै ज़ैगा गिम्मणी तिन्नां आपणैं दुशमणा हारी करै पठी आप्पू लै। #इब्रा. 6:13,14; 11:12
18“पृथूईए सोभी देशे लोगा भेटणीं तेरै खिंबा करै मुखा बर्गत, किल्हैकि ज़िहअ मंऐं बोलअ, तंऐं किअ तिहअ ई।”#शधा. 3:25
19तेखअ आअ आबराम आपणैं तिन्नां दासा सेटा लै फिरी। तिधा का डेऊऐ तिंयां सोभै बेर्शेबा लै, संघा लागै तिधी रहंदै।
नाहोरो खिंब
20-23आबरामे भाई नाहोरै त मिल्का संघै बैह किअ द। तेखअ खोज़अ कुंणी आबरामा का इहअ कि तिन्नें गऐ आठ शोहरू हई।
सोभी का ज़ेठै शोहरू नाअं आसा ऊज़, तेऊ का कान्हैं नाअं आसा बूज़।
तेखअ हुअ कमूएल ज़ुंण अरामो बाब आसा। तिन्नां बाद हुऐ पांज़ होर शोहरू तिन्नां नाअं आसा: केसद, हाज़ो, पिल्दाश, ज़िदलाप अर बतूएल ज़ुंण रिबको बाब आसा।
24नाहोरे थिई एक होर बेटल़ी बी डाही दी, तैहा नाअं थिअ रूमा, तेसे हुऐ च़ार शोहरू, तेबा, गाम, तहाश अर माकाहा।
Currently Selected:
मूल़ 22: OSJ
ማድመቅ
ኮፒ
አወዳድር
ያጋሩ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
This work is licensed under Creative Commons Attribution-ShareAlike 4.0 License.
