लुआह 31
31
बिधाता छ़ांटै बसलेल अर ओलाब
(लुआह 35:30—36:1)
1तेखअ बोलअ बिधाता मोसा लै इहअ, 2“पबित्र खिम्भा बणाणां लै कारीगीर छ़ांटअ मंऐं यहूदा गोत्रा का ऊरीओ शोहरू बसलेल, ज़ुंण हूरो पोचअ आसा, 3-5तेऊ दी पाई मंऐं बिधाता आपणीं आत्मां, तेऊ लै दैनी मंऐं समझ़ अर सह बणाअं मंऐं इहअ सज़ाण कारीगीर ज़ुंण सुन्नैं, च़ंदी, कांस्सअ, किम्मती पात्थर अर काठा दी खेल़्तर पाई कारीगीरी सका करी।
6“दान गोत्रा का छ़ांटअ मंऐं बसलेला संघै कामां करना लै आहीसामको शोहरू ओलाब। होर बी ज़ुंण इना दूईए मज़त करे, तिन्नां लै बी दैनी मंऐं एही अक्ल कि तिंयां आसा इहै सज़ाण ज़ुंण तेऊ कामां तिहअ ई करे ज़िहअ-ज़िहअ काम करना लै मंऐं ताल्है हुकम किअ।
7-11“मेल़-ज़ोल़े खिम्भा अर तेतो सारअ काम, करारो मणशू अर पापे प्राश्त करनैओ ढक्कण, पलग अर तेता प्रैंदो सारअ समान, च़ोखै सुन्नेंओ सदीअ अर तेते होर च़िज़ा, धूप बेदी, हूम बल़ी करने बेदी अर तेथ कामैं एछणैं आल़ी सारी च़िज़ा, कांस्सैओ कल़ाह अर तेतो बठैल़णू, हारण अर तेऊए शोहरू लै प्रोहते झिकल़ै, अभिषेक अर संस्कार करना लै तेल अर पबित्र ज़ैगा लै खुशबूदार धूप।”
बशैघे धैल़ीओ बधान
12-13बिधाता बोलअ तेखअ मोसा लै इहअ, “मोसा, इज़राईली का बोल कि बिधाता बोलअ इहअ, ‘बशैघे धैल़ी आसा मेरी। ऐबै आसा तम्हां लै मेरअ इहअ हुकम कि बशैघै धैल़ीओ बधान करै तम्हैं अर आजू थारी आद-लुआद पोस्ती दर पोस्ती पूरअ। एता करै लागणअ तम्हां का थोघ कि मंऐं थारै बिधाता आसा तम्हैं आप्पू लै छ़ांटै दै।
14-15“‘बशैघे धैल़ी डाहै तम्हैं मुंह बिधाता लै पबित्र, होरी कामां करना लै आसा तम्हां लै हर हबतै छ़ह धैल़ी, पर सातुई धैल़ी आसा मेरी, ऐहा धैल़ी करै तम्हैं कबल्लअ बशैघ। ज़ै कुंण बशैघे पबित्र धैल़ी काम-काज़ करे, सह निं तेखअ मेरअ आपणअ रहणअ अर सह करनअ तेऊए आपणैं लोगा मांझ़ा का दूर।#लुआ. 20:8-11; 23:12; 34:21; 35:2; लेब. 23:3; बधा. 5:12-14 16बशैघे धैल़ीए अह करार लोल़ी इज़राईलीए पोस्ती दर पोस्ती एही ई पूरी किई। 17अह धैल़ी हणीं मुंह बिधाता अर इज़राईली दुही लै एक नछ़ैण कि मंऐं बणाअं सारअ भ्रमंड छ़हा धैल़ै भितरी अर सातुई धैल़ी बशैघ करी किअ मंऐं आपणअ शाह हल़कअ।’” #लुआ. 20:11
18सीनाई धारा प्रैंदै ज़ांऊं बिधाता मोसा संघै गल्ला करी मुक्कअ, तेऊ दैनी मोसा लै दूई पात्थरे शिला, तेथ त बिधाता आपणैं हाथा करै आपणअ सारअ बधान लिखअ द।
Currently Selected:
लुआह 31: OSJ
ማድመቅ
ኮፒ
አወዳድር
ያጋሩ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
This work is licensed under Creative Commons Attribution-ShareAlike 4.0 License.
