दानिएल 1
1
दानिएल अर तेऊए चअन साथी
1ज़धू यहूदा मुल्खै जेहोकीम राज़अ थिअ, तेऊए राज़ा दी चिऊथी साला छ़ेल़अ बाबेल देशे राज़ै नबूकदनेसरै एरुशलेम नगरी संघै जुध।#2 राज़. 24:1; 2 इति. 36:5-7 2#2 राज़. 20:17,18; 24:10-16; 2 इति. 36:10; ईशा. 39:7,8 बिधाता दैनअ नबूकदनेसर राज़ै यहूदा मुल्खे राज़ै जेहोकीमा कैद करनै संघा निंईं म्हारै मालक बिधाते भबना का कई च़िज़ा होरी कैदी संघै बाबेल देशा लै। तिधी पुजी डाही तेऊ तिंयां च़िज़ा आपणैं देअए देहुरै।#2 इति. 36:7
3नबूकदनेसर राज़ैओ थिअ गुंझी मांझ़ै एक बडअ बज़ीर अर तेऊ नाअं त अशपनाज़, राज़ै किअ तेऊ लै हुकम, “तूह आण इज़राईली कैदी मांझ़ै ज़ुआन यहूदी मणछ ज़ुंण राज़ घरानै अर खास मशूर घरानै का होए। 4तिन्नां मांझ़ै आणै तूह इहै ज़ुंण नरोगै अर हेरनै बित्तै होए, तिंयां समझ़कार अर छ़ल़ैघ होए ताकि हर गल्ला झ़ट च़ारै समझ़े अर शिखल़े। तिंयां लोल़ी मुंह नबूकदनेसर राज़े च़ाकरी करनै जोगी हुऐ ज़ुंण बाबेल देशे भाषा दी गल्ला करी, तेता पहल़ी अर लिखी सका।” 5इहअ बी किअ राज़ै हुकम कि हर धैल़ै दैऐ तिन्नां लै तिहअ ई खाणां-पिणां लै ज़ुंण राज़ दरबारै राज़ै लै हआ बणाअं द। चिई साला तैणीं सखाऊंणी तिन्नां का हर गल्ला अर तेखअ करै तिन्नां राज़े च़ाकरी करना लै पेश। 6ज़ुंण बाबेल देशे राज़े च़ाकरी लै छ़ांटै, तिंयां तै यहूदा गोत्रा का दानिएल, हनानी, मिशेल अर अजर्याह। 7राज़े तेऊ गुंझी मांझ़ै बडै बज़ीरै डाहै तिन्नें नऊंऐं नाअं: दानिएला नाअं डाहअ बेलतेशर, हनानी नाअं डाहअ शदराक, मिशेला नाअं डाहअ मेशक अर अजर्याह नाअं डाहअ तेऊ अबेदनागू।
8पर दानिएलै ती दिलै एही डाही दी कि तेऊ निं राज़ दरबारो भोज़ खाई अर तेऊ नशै आल़ै दाखे रसा झुटी आप्पू छ़ोतलै हणअ ज़ेता राज़अ झुटा। तैही किई तेऊ अशपनाज़ बज़ीरा सेटा अरज़ कि सह तेऊए ऐहा गल्ला लै मज़त करे। 9मालके हुणाकार हुई एही कि अशकनाज़ बज़ीर हुअ दानिएला लै खास्सअ झणैल़ू। 10अशपनाज़ बज़ीर डरा त राज़ै का अर तैही बोलअ तेऊ दानिएला लै, “अह आसा राज़ेए मरज़ी कि तम्हैं एता खाए, ज़ै तूह तेऊ का होरी ज़ुआन मर्धा का दुबल़अ अर रोगी शुझिए, तेऊ पाणअ तूह रोश्शै मारी अर ताह पिछ़ू सका सह मुंह बी मारी पाई।”
11अशपनाज़ गुंझी बज़ीरै त एक भढारी डाहअ द कि सह दानिएल, हनानी, मिशेल अर अजर्याह लै खाणैं-पिणैंओ इंतज़ाम सभाल़े। दानिएलै बोलअ तेऊ लै, 12“मेरी आसा ताखा अरज़ कि तूह परख हाम्हां दसा धैल़ै तैणीं अर एतरै धैल़ै दै तूह हाम्हां लै खाणां लै भाज़ी अर झुटणा लै सिधअ पाणीं। 13तेखअ भाल़ै तूह कि हाम्हैं तिन्नें मकाबलै किहै हणैं ज़ुंण राज़ दरबारो भोज़ खांदै आसा लागै दै।”
14सह भढारी हुअ दानिएल अर तेऊए साथीए गल्ला लै सैहमत संघा रहअ दसा धैल़ी तैणीं तिन्नां ज़ाच़दअ लागी। 15ज़ांऊं दस धैल़ी बिति, तिंयां शुझुऐ तिन्नां होरी का खास्सै मोट्टै-धोटै खुब ज़ुंण राज़ दरबारो खास भोज़ पै खाआ तै। 16तधा पोर्ही लागअ सह भढारी तिन्नां लै तिन्नें मरज़ीए शाग-भाज़ी खाणां लै दैंदअ अर तेखअ निं तेऊ तिन्नां सेटा राज़ दरबारो खास भोज़ अर दाखो रस तिन्नां लै दैनअ।
17परमेशरै दैनी दानिएल, हनानी, मिशेल अर अजर्याह लै खास्सी समझ़-बुध अर तिन्नैं शिखल़ी कई बोली-भाषा पहल़णीं लिखणी। एता का लाऊआ दैनअ दानिएला लै इहअ बरदान कि सह सका त धैनै-सुपनैओ फल बी खोज़ी।#याक. 1:5,17
18राज़ै नबूकदनेसरै त हुकम किअ द कि ज़ांऊं चिई साला तैणीं तिंयां सोभै गल्ला शिखल़ी मुक्के, तेखअ करै तिन्नां तेऊ सेटा पेश। ज़ांऊं चअन साला बिति, अशपनाज़ बज़ीरै निंयैं तिंयां नबूकदनेसर राज़ै सेटा। 19राज़ै किई तिन्नां सोभी संघै गल्ला अर तेऊ गम्मै दानिएल, हनानी, मिशेल अर अजर्याह कि तिंयां तै होरी सोभी ज़ुआन शोहरू का हर गल्ला लै बधिया। तेखअ बणाऐं तिंयां च़ार ज़ण्हैं राज़ेए च़ाकरी करनै आल़ै। 20ज़िहै बी राज़ै सुआल पुछ़ै अर ज़ेऊ बी साबै सह तिन्नां परखणअ च़ाहा त, तिन्नैं च़ऊ ज़ण्हैं दैनअ बडी समझ़-बुध डाही हर ज़बाब। राज़ै भाल़अ कि तिंयां ज़ेतरै देशा प्रैंदै सह राज़ करा, तेथ आसा तिंयां सोभी च़लैई करनै आल़ै अर जोतषी का दस गुणा राम्बल़ै। 21ज़ेभै तैणीं फारस देशे माहा राज़ै कुस्रू बाबेल देशा दी कबज़अ निं किअ, तेभै तैणीं रहअ दानिएल बाबेल देशै राज़ दरबारै च़ाकरी दी।
Currently Selected:
दानिएल 1: OSJ
ማድመቅ
ኮፒ
አወዳድር
ያጋሩ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
This work is licensed under Creative Commons Attribution-ShareAlike 4.0 License.
