O ZAKHARIA 8
8
Ma Jou wojaji aha wohi gokookali o Yerusalem
1Ma Jou Duru woko Kuaha wohi döaka o behehongo nënanga ngohino, 2”Ngohi duru tö igo tö riwo o Yerusalem karana Ngohi duru tä dora manyawa, deʼ karana Ahi dora gënanga, Ahi hininga yo hauku o kota gënanga ma haturü-haturü ika. 3Ngohi aha toma idulu o Yerusalemika, Ahi kota itebi-tebini gënanga, deʼ tö gogere genangoka. O Yerusalem aha yanako hokä o kota isosetia deʼ ma Jou Duru woko Kuaha ai Doporono aha yahetongo o Doporono i Tebi-tebini. 4O Yerusalem ma kota ma lapangoka, aha yogogeroli o ete-ete deʼ o el̄e-el̄e duru ya totimonoka hiädono kokiani imä dagi deʼ o tutukunu. 5Hagala o ngekomo o kotaoka aha iomangoli deʼ o ngoha-ngohaka imä gogugule.
6O hali gënanga hapulo-pulono iyakunu idadiua mangale hagala o nyawa yowango-wangoohi o hoana deʼ o bereraino nënanga, ma koi dadiua Ngohino. 7Ngohi aha tä hihalamati Ahi umati hagala o bereraino o ngï önanga yatora-torakoka, 8deʼ taao önanga yolio o wange mahiwaroka deʼ yaiha deʼ wange madumuniha deʼ yaoko, hiädono önanga yogögere o Yerusalemokaoli. Onanga aha yodadi Ahi umati deʼ Ngohi toönanga manga Jou Madutu. Ngohi aha ta pareta önanga deʼ o setia deʼ o adili.”
9Ma Jou wätemo Ai umatika, ”Nia kuata nia hininga! O öraha nënanga ngini ni ihene o demo-demo ö yahö heto-hetongoka o nabi-nabi maöraha o fandasi yogelenga, mangale ihi gokookali Ahi Tau. 10O öraha gënanga koiwahi, koiwa yakunu yahewa o nyawa ekola o aiwani, deʼ koiwa yamao yosanangi, o haturüino manga rüae. Ngohi tahi tubeleoka moi deʼ moi. 11Mä öraha nënanga hagala o nyawa kayo wango-wangoohi o höana deʼ o bereraino nënanga Ta hidiai ima howono deʼ mahira. 12Onanga aha ihi barihi o gihihi deʼ ma dame-dame. Toönanga manga angguru ma utu-utu aha i hohoko, o tonaka aha i hi döaka ma hasili, deʼ o awana aha iuti deʼ ma boboloi. Hagala o barakati gënanga Tahi döaka hagala o nyawaika kayo wango-wangohi o höana deʼ o bereraino nënanga. 13Hei o Yehuda deʼ o Israel manyawa! Maöraha i paha-paha, nako hagala o nyawa maporetino ima tekelolai, önanga yato, ’Tanu o bodito yatotapal̄u o Yehuda deʼ o Israel, ini tapal̄u ngona ö!ʼ Ma Ngohi aha tini hihalamati ngini, hagala o nyawa ma poretino gënanga aha ima ke temo imahi koko önanga, ’Tanu o barakati iuti o Yehuda deʼ o Israeluku, iuti ö ani diriuku!ʼ Hababu gënanga nia kuata nia hininga deʼ uha nihawana!”
14Ma Jou Duru woko Kuaha wotemo, ”Maöraha nia ete deʼ nia tohora yadiai Ngohi tongamo, Ngohi ta putuhu mangale tä hukumu önanga deʼ ma kuata. Ngohi tangaliua Ahi putuhu gënanga, matadiai. 15Mä o öraha nënanga Ngohi tomau tahi barakati o Yerusalem manyawa deʼ Yehuda manyawa. Ho, uha nihawana. 16#Ef. 4:25 Nenanga hagala o pareta kokiani ngini nia diai. Nako ni ade-ade, ni temo ma diai nimahi koka nyawaika. Nihi döaka Juru hakimi maputuhu iadi-adili deʼ iao o dame. 17Uha nihi datoro itö torou nimahi koka nyawaika. Uha nihi demo o koboto ito tiaiua. Ngohi tö dohata o tengelukika deʼ koi adi-adilua ikali nia dö dobuturungu.”
18Ma Jou Duru woko Kuaha wohi döaka o behehongo nënanga ngohino mangale Ai umati, 19o puaha nia dodiai o mede maiata, mamotoa, matumidi deʼ mangimoi magoronaka idadi o rame-rame iomanga o morene deʼ o sanangi mangale o Yehuda manyawa. Nio igo o diai deʼ o dame!”
20Ma Jou Duru woko Kuaha wotemo, ”Maöraha aha iboa o kota mangöe manyawa aha yoboa o Yerusalemika. 21O kota moino manyawa aha yä temo o kota manyawa ma homoaino, ’Niaino ngone höiki hihuba ma Jou Duru woko Kuaha deʼ hogahoko Ai barakati. Ho ma kinïki de de ngomi!ʼ 22Daha manga ngöe o nyawa deʼ manga ngöe o höana deʼ o berera ikua-kuata aha yoboa o Yerusalemika mangale ihi huba Ngohi o Jou Duru to ko Kuaha deʼ yogaholo Ahi barakati. 23Hagala o wangeoka gënanga o nyawa maporetino yangimoi aha yoboa o Yehuda manyawa woma tengoika deʼ yo temo, ’Ngomi ö mio igo miutumu hokä ngini; hababu ngomi mi ihene ma Jou Madutu wi nihi barakati ngini.’ ” Ma Jou Duru woko Kuaha wo temoka.
Currently Selected:
O ZAKHARIA 8: TLB
ማድመቅ
ኮፒ
አወዳድር
ያጋሩ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ LAI 2002