O ROMA 9
9
Ma Jou Madutu de Ai umati yäiri-iriki
1Okia aha ngohi tahetongo nënanga ganga itiai karana ngohi Kristus madutu. Ngohi koto elukua. Tongohi ahihininga madol̄a yatö tuda-tuda ma Jou Madutu ai Womaha, ihihigoungu ngohiö ahidemo nënanga itiai. 2Ngohi duru ahihininga ihuha deʼ tongohi ahihininga ihangihara 3karana tongohi ahi roriadodoto o hoana de o berera moi dede ngohi. Hababu mangale önanga, ngohi mahirete tömodeke ma Jou Madutu wohilolai, deʼ ihihitingaka de o Kristus. 4#Kel. 9:4 Onanga ganga o umati yäiri-irikoka deʼ ma Jou Madutu wahidadi önanga Ai ngoha-ngohaka mahirete, de wohinyata Ai kuaha onangika. Unanga wodiai o jaji dede önanga deʼ wohi döaka onangika o agama matita. Ma Jou Madutu wahingahu onangika sarakia kokiani önanga yopuji deʼ onanga yatarima okali Ai jaji. 5Onanga ganga nangaete de nangatohora manga difauku, madodagi o nyawa o Kristus aiahali toönanga manga hoana de manga bereraino. Mata-mata Unanga iholoi wokurutil̄e. Ma Jou Madutu iwipuji kahi ado-adonika! Amin.
6Ngohi ahidungutua tahetongo ma Jou Madutu aijaji idadi gila-gilaokaua; mä mata-mataua o Israel manyawa ganga o umati ma Jou Madutu wäiri-irikoka. 7#Kej. 21:12 Mata-mataua o Abraham aidifauku ganga ma Jou Madutu aingoha-ngohaka. Hababu ma Jou Madutu wïtemo o Abrahamika, ”Duga-duga o Ishak dika aidifauku aha yähetongo anidifauku.” 8Gënanga mamangarati o Abraham aidifauku yodadi ma Jou Madutu aingoha-ngohaka, ganga duga-duga aidifauku yodädadi karana ma Jou Madutu aijaji; deʼ mata-mataua aidifauku. 9#Kej. 18:10 Hababu ma Jou Madutu aijaji ganga hokä hokonënanga, ”O öraha hitatapuoka, ngohi aha tainoli, deʼ o ngo Sarah aha de ami ngohaka o nauru womatëngo.”
10Deʼ nenangoli: o ngo Ribka amingohaka o nauru yähinoto manga ama kawomatëngo enagënanga o Ishak nangaete de nangatohora. 11Ihira de o ngohaka yähinoto gënanga imakil̄au, ma Jou Madutu wohi tantuoka Ai ngongiriki öraha nanga de hikaika. Ma Jou Madutu aingongiriki gënanga wohigagaoua de okia o nyawa yakunu yadodiai, mä wohigagao de ma Jou Madutu aigogahoko mahirete. Hababu maöraha o ngo Ribka amingohaka o nauru yähinoto gënanga yakunuahi yodiai okianaga moi maoa-oa ekola madodorou, 12#Kej. 25:23 ma Jou Madutu wahetongoka o ngo Ribkaika, ”Mariaka aha wïleleani madödoto.” 13#Mal. 1:2-3 Ma Jou Ai Demo ma Buku magoronaka i tulihi ma Jou Madutu wotemo hokonënanga, ”O Yakub Ngohi tïdora, mä o Esau Ngohi tïdohata.”
14Oraha nanga okia nanga demo mahohonenge? Ma Jou Madutu gënanga woadilua? Maraioka ma Jou Madutu woadili! 15#Kel. 33:19 Hababu ma Jou Madutu wïtemo o Musaika, ”Ngohi aha tohidumutu ahihininga maoa o nyawaika Ngohi tomau tohidumutu ahihininga maoa, de Ngohi aha tohidumutu o hayanga de o dora o nyawaika Ngohi tomau tohi dumutu o hayanga de o dora.” 16Hoʼ, ma Jou Madutu aiputuhu gënanga imahigagaoua de o nyawa manga hininga maoa ekola o nyawa manga hidailako, duga-duga imahigagao ma Jou Madutu aihininga maoa-oaika dika, geonangika o nyawa wäiri-iriki gënanga. 17#Kel. 9:16 Hababu Ma Jou Ai Demo ma Buku magoronaka itulihi, ”Ma Jou Madutu wïtemo o Mesir ma Koanoika, ’Ngohi tonihi dadi ngona nokoano mangale madungutu nënanga moi dika, enagënanga hupaya dede ngona, Ngohi tohidumutu Ahi kuaha deʼ Tadiai ahiromanga yodogilianga o dunia mata-mataika.’ ” 18Hoʼ, ma Jou Madutu wädora de wähayangi o nyawa imatëngo-tëngoika, nako ma Jou Madutu womau hokogënanga. Deʼ ma Jou Madutu wodadi o hababu womatëngo idadi aihäeke itogowini, nako ma Jou Madutu womau hoko genangoli.
Ma Jou Madutu aidohata deʼ aihininga maoa-oa
19Aa, o Riadodoto aha nitemo ngohino, ”Nako hokogënanga yadodoa ho ma Jou Madutu kawomauohi wonahi howono o nyawa? Koigoungua kao nyawa moiö de yakunua yatatoko ma Jou Madutu aimau?” 20#Yes. 29:16, 45:9 Mä Riadodoto! Riadodoto duga-duga kao nyawa dika. Deʼ Riadodoto yakunua de niabarani niwipaluhu ma Jou Madutuika! Kai yakunu o bunga-bunga mangï ileha o nyawa yadodiaiika, ”Yadodoa hongohi nohidiai hokonënanga?” 21Koigoungua o nyawa wododiai o bunga mangï gënanga de aihaku wakarajanga o tonaka matau-taulu gënanga aihininga mahuka? O tonaka matau-taulu o bolulu moi o nyawa gënanga de ai haku wodiai o bunga mangï o rupa hinoto: moi irahai, deʼ moi mahomoa ikuranga irahai.
22Hokogenangoli de okia ma Jou Madutu wadodiai. Unanga de Ai dungutu la Ai dohata wohiaiki deʼ wohimatoko Ai kuaha. Ma önanga kokiani yähukumu karana yadodiai Unanga iwitohata, mawahisabari önanga. 23Ma Jou Madutuö Ai dungutu la wohidumutu ngoneino o utumu dema boboloioka wonädoburaraha ngoneino wonädö dora-dora. Ngone inasadiaka la hatarima o utumu gënanga. 24Ngoneö wona ahokoka kao Yahudi manyawainoua, mä de o hoana de o berera mahomoaino ö. 25#Hos. 2:23 Hababu ma Nabi Hosea aibuku magoronaka ma Jou Madutu wotemo,
”O nyawa Ahi umatua,
aha Tä hetongo ’Ahi Umati’.
O hoana de o berera Tä dora-doraua,
aha Tä hetongo ’Tä haya-hayangia’.
26 #
Hos. 1:10
Deʼ o ngï kiaka yahi ngahu o nyawaika, ’Ngini Ahi umatua,’
genangoka o nyawa ge önanga aha yähetongo ma Jou Madutu aingoha-ngohaka yowango-wango.”
27 #
Yes. 10:22-23
Ma Nabi Yesaya wotemo wohitotiaika mangale o Israel manyawa, ”Igoungu ngaro o Israel manyawa manga ngöe hokä o dowongi o ngötoka, maduga-duga manga huhutulu dika aha yohalamati; 28hababu ma Jou aha de madataitoka wögelenga o hukumanga o dunia madol̄a mata-mataika.” 29#Yes. 1:9 O Yesaya wotemoli hokonënanga, ”O demo maade ma Jou Madutu woko Kuaha wonagumal̄aua o difauku, marai ngone mata-mata hodadioka hokä o Sodom deʼ o Gomora.”
O rimoi ma Jou Madutu aiumati de o Abari ma Oa ma Jou Madutuino mahidogorona
30Hoʼ, mademo madipoko ganga hokonënanga: O hoana de o berera mahomoa o Yahudiokaua önanga imahidailakoua hupaya manga rimoi de ma Jou Madutu idadi yaoaoli. Mä karana önanga iwingaku ho ma Jou Madutu wadiai manga rimoi dede Unanga idadi yaoaoli. 31I idulu yaino, o Yahudi manyawa salalu imahidailako yamoteke o tita hupaya manga rimoi de ma Jou Madutu idadi yaoaoli. Mä itiai önanga yohasilua. 32Yadodoa ho önanga yohasilua? Hababu önanga yodiai gënanga mangëkomo de madodagiua iwingaku ma Jou Madutuika, duga-duga mangëkomo de madodagi manga hidailako mahirete. Onanga yoruba yopeleke ”O Helewo i Bobebelekika”. 33#Yes. 28:16 Mangale o helewo gënanga Ma Jou Ai Demo ma Buku magoronaka i tulihi hokonënanga,
”Nio hohininga nënanga:
O Sion ma Doporonoka Takelenga ukuoka o helewo gahumu moi
aha hiädono o nyawa yopeleke;
enagënanga o helewo moi mapako-pako aha hiädono o nyawa yäruba.
Mä o nyawa yangaku enangika
aha manga hininga ihuhaua.”
Currently Selected:
O ROMA 9: TLB
ማድመቅ
ኮፒ
አወዳድር
ያጋሩ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ LAI 2002