O ROMA 4
4
O Abraham hokä o dulada
1Nako hokogënanga, okia yakunu ngone hotemo mangale o Abraham nangaete de nangatohora? Sarakia wamäke idädadioka? 2Nako o hali-o hali wadodiaioka idadi o hababu ma Jou Madutu wïtarima ünanga hokä o nyawa yasosanangi ma Jou Madutu aihininga, done nagaö idadi o titi unangika la womahi amo-amoko. Mä unanga wakunua womahi amoko ma Jou Madutu aihimangoka. 3#Kej. 15:6; Gal. 3:6 Ma Jou Ai Demo ma Buku magoronaka yatulihi, ”O Abraham wïngaku ma Jou Madutuika, deʼ karana aingongaku nënanga ünanga ma Jou Madutu wïtarima hokä o nyawa yasosanangi ma Jou Madutu aihininga.” 4O nyawa yomomanarama yatarima manga hewa; deʼ aihewa wapulonua hokä o ngongike moi, hababu ënanga ganga aihaku. 5Mä naga o nyawa imahigagaoua manga hidailako mahireteika; ünanga wohidöaka aidiri ma Jou Madutuika kiaka wohinyönyata-nyata o baradoha manyawa yolapahioka de o howono. Matiti de aingongaku gënanga ma Jou Madutu wïtarima o nyawa gënanga hokä o nyawa yasosanangi ma Jou Madutu aihininga. 6Hoko gënanga ma Koano Daudö aidamäke; mahababu gënanga ünanga wotemo o nyawaika halamati youtumu kiaka ma Jou Madutu wätarimaka hokä o nyawa yasosanangi Ai hininga, ma Jou Madutu watailakoua o nyawa gënanga aimanarama. Ma Koano Daud wotemo hokonënanga,
7 #
Mzm. 32:1-2
”Halamati woutumu o nyawa aihowo-howono ya apongoka
deʼ aibaradoha-baradoha ma Jou Madutu walungunoka!
8Halamati woutumu o nyawa aibaradoha ma Jou Madutu wölehaokaua!”
9Boteka o demo halamati youtumu nënanga duga-duga yahidumutu o nyawa yamote-moteke o huna madatoro dika? Ekola o nyawa yamote-motekuaö o huna madatoro? Madihirahi ngomi mia hetongoka, ma Jou Madutu wïtarima o Abraham hokä o nyawa yasosanangi Ai hininga, karana o Abraham wïngaku ma Jou Madutuika. 10Aa, kahuruono de ma Jou Madutu wohinyata o hali gënanga? O Abraham womahunaowahi ekola womahunaka? Igoungu ünanga womahunauwahi, ipahainoua. 11#Kej. 17:10 Unanga iwihuna ituru, deʼ aihuna gënanga duga-duga hokä o nonako ma Jou Madutu wïtarimaka hokä o nyawa yasosanangi ma Jou Madutu aihininga, karana wïngaku ma Jou Madutuika. Unanga ma Jou Madutu wïtarima maöraha ünanga wanïkowahi o huna madatoro. Deʼ o nyawa mata-mata yongaku-ngaku ma Jou Madutuika, o Abraham wodadi manga ama mangale o ngongaku, deʼ karana ünanga ma Jou Madutu wätarimaka önanga hokä o nyawa yasosanangi Ai hininga, ngarokö önanga yanïkua o huna madatoro. 12O Abraham ö wodadi manga ama mangale o ngongaku mangale o nyawa yamote-moteke o huna madatoro. Unanga to önanga manga ama mangale o ngongaku koigoungua duga-duga karana önanga yamoteke o huna madatoro, mä karana ö önanga yowango de iwi ngaku ma Jou Madutuika, ima tero hokä o Abraham maöraha ünanga wamotekowahi o huna madatoro.
Ma Jou Madutu aijaji watarima karana wïngaku ma Jou Madutuika
13 #
Kej. 17:4-6, 22:17-18; Gal. 3:29 Ma Jou Madutu wïjaji o Abrahamika deʼ aidifauku o dunia nënanga aha idadi madutu to Abraham. Ma Jou Madutu wïjaji hokogënanga hababuua o Abraham wohingounu wamoteke o agama Yahudi matita, mä karana ünanga wïngaku ma Jou Madutuika, hiädono ma Jou Madutu wïtarima ünanga hokä o nyawa yasosanangi Ai hininga. 14#Gal. 3:18 Hababu nako duga-duga o nyawa ihingou-ngounu yamoteke o agama Yahudi dika aha yatarima okia ma Jou Madutu wojäjajioka, done hongaku ma Jou Madutuika hakali-kali koiwa mabaraguna, deʼ ma Jou Madutu aijajiö duru o homoa. 15O agama Yahudi matita inägao ma Jou Madutu aihukumanga. Mä nako o tita koiwa, o dodilakuru mä koiwa.
16 #
Gal. 3:7
Hoʼ ma Jou Madutu aijaji gënanga mahohol̄e o nyawa iwingaku ma Jou Madutuika. Gënanga idadi o ngongike moi o Abraham aidifaukuika mata-mata, ho o jaji gënanga yahidöaka onangika hokä o ngongike moi karana o dora ma Jou Madutuino; ka onangikaua dika yamote-moteke o agama Yahudi matita, mä onangikaö yongaku-ngaku ma Jou Madutuika, imatero hokä o Abraham wongaku Unangika. Hababu o Abraham gangala mata-mata tongone nanga ama cara rohani. 17#Kej. 17:5 Hababu ma Jou Madutu wïtemo o Abrahamika hokonënanga, ”Ngohi tonihidadioka ngona o hoana de o berera mangöe manga ama.” Hoko gënanga ma Jou Madutu wohidöaka o jaji gënanga o Abrahamika. Deʼ o Abraham wïngaku Unangika. Unanga ma Jou Madutu wahiwango-wango o nyawa yohone-honengoka; Unangö ma Jou Madutu kade wotemo dika wadiai okia komaiwa naga idadi dema ënanga. 18#Kej. 15:5 O Abraham kagila-gila dika wönganono deʼ wongaku ngarokö koiwaka aingonganono. Karana gënanga ünanga wodadi o hoana de o berera mangöe manga ama. Hokä itulihi Ma Jou Ai Demo ma Buku magoronaka, ”Ani difauku aha yodadi duru ka mangangöe.” 19#Kej. 17:17 O Abraham o öraha gënanga wohiöriki ünanga idadiokaua de aidifauku, hababu airöehe yaperekioka holi deʼ aiumuru yodangadeoka o taongo ratuhu moi; inoli o ngo Sarah, ngoihekata gënanga komo ngohakua. Mä o Abraham aingongaku ikurangua. 20Unanga kahirahi wongaku deʼ wododatoua mangale ma Jou Madutu aijaji. Gënanga hongoli aingongaku yadiai ünanga idogo wokuata, hiädono ünanga wihigogiriri ma Jou Madutu. 21Unanga duru wongaku ma Jou Madutu wakunu wadiai okianaga wohijäjajioka. 22Mahababu gënanga o Abraham, ma Jou Madutu wïtarima hokä o nyawa yasosanangi ma Jou Madutu aihininga. 23O demo ”wï tarima hokä o nyawa yasosanangi ma Jou Madutu aihininga” i tulihi duga-duga kao Abrahamua dika mahirete, 24mä mangale ngoneö. Ngoneö aha ina tarima hokä o nyawa yasosanangioka ma Jou Madutu aihininga, karana ngone hongaku ma Jou Madutuika wihiwöwango-wango o Yesus, tongone nanga Jou, o honenge mahidogoronaka. 25#Yes. 53:4-5 O Yesus gënanga iwihilapahioka Ai diri la iwitoma karana nangabaradoha; daha Unanga ma Jou Madutu wihiwangookali la ngone yakunu homateke oa-oaokali de ma Jou Madutu.
Currently Selected:
O ROMA 4: TLB
ማድመቅ
ኮፒ
አወዳድር
ያጋሩ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ LAI 2002