O AMOS 5
5
O gogahoko mangale yo toba
1Ni ihine hei Israel ma umati! Ngohi to mau tohinyanyi moi o duka ma nyanyi mangale ngini:
2I otakoka o Israel kai o moholehe maborohi,
ënanga aha koimomikokaua!
Ma ai tonaka mal̄okuoka mahirete ënanga yö dogumal̄aika,
moiua yariwo ënanga ima oko.
3Ma Jou Duru Wokö kurutil̄e wotemo, ”Moi o kota o Israel, mabereraka yä toomu o tentara ya ribuhu moi, mä ima kilioro yo lio duga-duga ya ratuhu moi; o kota ma homoa yä toomu o ratuhu moi, ima kilioro yo lio duga-duga ya ngimoi.”
4Ma Jou wätemo o Israel ma umati ika, ”Nima kilioro ni lio Ngohi ino, done ngini aha ni wango. 5Uha nioiki o Bersyeba ika mangale ni puji. Uha nihilingiri Ngohi o Betel mabereraka, hababu o Betel aha i hihanga. Uha oli nioiki o Gilgal ika, hababu yogö gogere o kota gënanga aha yä toraka o tabuangika.”
6Nima kilioro ni lio ma Jouika, done ngini aha ni wango. Nako ngini nima kiliorua ni lio Unangika, Unanga aha wo boa hokä o uku itahe ihora deʼ ya tuhuku o Israel manyawa yamata-mataka. O Beteloka mabereraka moiua o nyawa ya hohonenge o uku gënanga. 7Ni bodito ngini, ngini nia takaidulu o adili deʼ nia ora o nyawa manga haku!
8 #
Ayb. 9:9, 38:31 Kama Jou wo diai hagala o murumu o gitaoaka –
o murumu Belantik deʼ o murumu Kartika.
Unanga wa ngali o huhutu idadi o dararono deʼ o wange-wange idadi o hutu-hutu;
o akere o ngötoka ya uhe o dudungika.
Wododiai mata-mata gënanga Ai romanga enagenangala ma Jou.
9Unanga wä binaha o nyawa yo kokuaha kamamoi de toönanga manga dadatoko.
10Ngini niä dohata o nyawa ya lawa-lawani iadi-adilua deʼ yo temo-temo ma diai o juru hakimi magoronaka. 11Ngini niä tuku o nyawa mihikini deʼ manga gandum ngini nia ora. Karana gënanga ngini aha konigogerua nia tau-tau ma hö hailoa magoronaka, ngini nihigoko-goko ka gënanga. Ngini aha koni okerua o angguru nia angguru ma dumuleino ngini ni dato-datomo. 12Ngohi tohioriki hokokia ma amoko nia dorou deʼ hokokia ma ngöe nia baradoha. Ngini niä tuku o nyawa ma oa; ngini nia tarima o uru bokumu deʼ nia mal̄aika o nyawa mihikini yä hidiai koi adilua o juru hakimoka. 13Karana nia manarama gënanga, done hagala o nyawa yo bobarija ya mao iholoi yaoa ima rï ridokadika ma orahoka o dorou hokä hokogënanga.
14Nihidailako ni diai o oa deʼ uha ni diai o dorou, hupaya ngini ni wango. Done ma Jou o Jou Madutu Duru Wo kokuaha aha igou-goungu Wo gogere tingini nia hidogoronaka hokä ngini nia heto-hetongo. 15Niö dohata o dorou de niö igo o oa-oa, deʼ nia totiail̄e o adili. Yakunu idadi ma Jou aha wä dora hagala o nyawa ma hou-houohi o Israel manyawa ino.
16Ma Jou o Jou Madutu Duru Wo kokuaha wotemo, ”O kota ma ngeko-ngekomika, o nyawa aha yo dodora deʼ yo liwolu karana manga hininga ihuha. Ma boboloi yo totumule aha yä ahoko ima himoteke yo ari kamamoi deo nyawa yä hewa-hewa la yä dodora o nyawa yo hone-honengoka. 17Mata-mata o angguru ma dumuleoka, o nyawa aha yo dodora karana Ngohi to boa deʼ tinï hukumu ngini. Ngohi, ma Jou, to temoka.”
18Igoungu ni bodito ngini nio nö nahihu ma Jou Ai wange! Okia ma guna o wange gënanga ngini ika? O wange gënanga duga-duga ma rupa o wange ma hohohutu, ko o wange ma dodararonua ngini ika. 19Ha make hokä o nyawa ihi oara manga diri deo singa, maʼ ima kamake deo beruang. Ekola hokä o nyawa yo lio manga tau ika deʼ ima hidudukuika de manga giama o bebeno o mehelika, deo dodiha iwi tuduku. 20Ma Jou Ai wange itiai yö dotagao o huhutu, ko o dararonua – o wange kai lobi-lobi kai hohutuku.
21 #
Yes. 1:11-14
Ma Jou wotemo, ”Ngohi tö dohata deʼ yatoka to wunanga ta make nia agama ma rame-rame! 22Nako ngini ni ao o huhuba ya tuhu-tuhuku deʼ o huhuba o gandum, Ngohi aha ta tarimaua. Ngohi toluku ta tarima hagala nia aiwani-aiwani ma boburere gënanga ngini nihi hö huba-huba Ngohi ino hokä o dame ma huhuba.
23Nia togumukuohi hagala nia nyanyi ikokapusakuku gënanga; Ngohi toluku tohi gihene nia kecapi nihigogule. 24Iholoi ya oa, nihidailako hupaya o adili ihahuru hokä o akere, deʼ hininga irikoto hokä o ngairi komaiwa idudungu.
25 #
Kis. 7:42-43
Hei Israel ma umat, maöraha Ngohi tinï tuda nia nonu o tonaka i kokakaha o taongo moruata ma dekana, Ngohi togahokua nihi hö huba-huba deʼ o huhuba ngini ino. 26Mä öraha nënanga ngini nia huba o Sakut ngini nia pulono nia koano gënanga, deʼ o Kewan o murumu ngini nima hi gikiri gënanga. Karana gënanga hagala o dulada nia dodiai gënanga kokiani ngini nia toraka ma hirete nia umo. 27Nako Ngohi tinï umo ngini o berera moika iholoi ikurutika deo Damsyik. Ngohi ma Jou ahi romanga ma Jou Madutu Duru Wo kokuaha to temoka.”
Currently Selected:
O AMOS 5: TLB
ማድመቅ
ኮፒ
አወዳድር
ያጋሩ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ LAI 2002