Hosheya 14
14
Toyo hin vey na Dagwi Darwey
1À yin BeIsrayɛl, Toyo hin na Dagwi Darwey, Dagwi min,
banɛn min ba ga tɛ̀ yin tiris bol, yin gabsa.
2Jut in hâ won na he sè nɔrɔ min, yin ye,
“Hala a wot mwa banɛn mot,
na hwo sey pyɛ́ ryat de wot a sé nɔng,
jut ha mot sede nɔrɔ̂ mus.
3Asirya ê kyɛm a sey ot wɛt,
ko bedwâ como bê tɔk gyep ot wɛt.
Wot ê to yang cī de wot a yong na vɔ mot
ya sé dagwi mot wɛt.
À Dagwi Darwey a sé e hwo zɔng de hwó
tosho reyɔ̂m nehyɛn.”
Neken nepas yaga BeIsrayɛl
4Dagwi Darwey a ye,
Yɛn á kana toyo na bama,
ko mê tɛ̀ ɛn tyang.
Mê tɛ̀ yey na yɛn na yey hom mwa,
mê to wok shom na yɛn wɛt.
5Mê gaba e ra BeIsrayɛl sede mwɛngɛ,
ko yɛn ê tɛ̀ bejamuk sizɔng sede batîn berang líli,
ko berinis mɛn bê vɔk gap sede ve cɔ́gɔt sida Lɛbanɔn.
6Yɛn ê túruk na nelang nepas
ko nerat mɛn nê sè sede ne tin pwat.
Ko nesang nerat mɛn nê sè sede ne cɔ́gɔt sida Lɛbanɔn.
7Bê toyo be sangal e nɛ̂n necam hom.
Bê ras sede pyɛ̂ yeneng.
Bê vo cúyu sizɔng sede tin anap.
Bê vɔk nesang nerat sede nshî anap ne Lɛbanɔn.
8À yin BeƐfrayim,
Sɛ́ ya wuna me na cī ɛ?
E me wɛ de mê toyo a yin na newon min,
na me bɛrɛng hin naka.
Mê tɛ̀ necam e ra yin
sede retîn cɔgɔ̂t fir de ré sè gwim-gwim kayɛ jeng,
ko a sé yi na me de yin ê sɛ̀ nèy nerat.
9Kawɛ mwat de a vɔk netsitsɛng,
tik na a tɔk pyɛ́ yemo.
Ko kawɛ mwat de a vɔk tɔk,
tik na a vɔk pyɛ́ yemo e yey.
Begwông Dagwi ba sé tas,
bemât cik bê kyè e ra vɛ,
ko bemât banɛn bê tiris bol e vɛ.
Currently Selected:
Hosheya 14: bomBI
ማድመቅ
ኮፒ
አወዳድር
ያጋሩ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust