ከ{{ምዕራፍ}} ታዋቂ የመጽሐፍ ቅዱስ ጥቅሶች

ያጋሩ

Сора Раббий Муссагъа: – Фыргъаууннга бар. Мен араларында бу тамаша белгилерими кёргюзтюр ючюн, аны да, аны къуллукъчуларын да терсакъыл этгенме. Алай бла Мен Мисирде этген затланы, Мен анда кёргюзтген тамаша белгилени сен уланынга эм уланынгы уланына айтырса эмда Раббий Мен болгъанымы билирсиз, – деди.

Сора Раббий Муссагъа: – Къолунгу кёкге узат, Мисирни жеринде къарангы, сезерча къарангы болуп къалсын, – деди. Мусса къолун кёкге узатханды, сора битеу Мисирни жеринде юч кюннге къаппа-къарангы болуп къалгъанды. Бир-бирлерин кёрмегендиле, юч кюнню бир адам да жеринден къопмагъанды. Битеу Исраил улуларыны мекямларында уа жарыкъ бар эди.

Сора Мусса аса таягъын Мисирни жерине узатханды, Раббий да кюн чыкъгъан жанындан уруучу желни келтиргенди, жел а саулай ол кюнню бла ол кечени уруп тургъанды. Танг атханда кюн чыкъгъан жанындан уруучу жел мачаланы келтиргенди. Мача битеу Мисирни жерине чапханды, битеу Мисир къыралгъа эсепсиз кёп санда тюшгенди. Алгъын да болмагъанды аллай мача, мындан арысында да боллукъ тюйюлдю.