ከ{{ምዕራፍ}} ታዋቂ የመጽሐፍ ቅዱስ ጥቅሶች

ያጋሩ

Ang kahulogan sa pagtuo mao nga may kasigurohan kita sa mga butang nga atong gilaoman nga dili makita. Pinaagi sa pagtuo ang mga tawo sa karaang panahon gikahimut-an sa Dios.

Walay makapahimuot sa Dios kon dili pinaagi sa pagtuo. Kay ang moduol sa Dios kinahanglan gayod motuo nga adunay Dios ug gantihan niya ang nangita kaniya.

Pinaagi sa pagtuo nasabtan nato nga ang kalibotan gibuhat pinaagi sa pulong sa Dios ug ang makita gihimo gikan sa mga butang nga dili makita.

Tungod sa pagtuo misugot si Abraham sa dihang gipaadto siya sa Dios sa usa ka nasod nga gisaad sa Dios nga ihatag kaniya. Gibiyaan niya ang iyang kaugalingong nasod bisan wala siya masayod asa siya paingon. Pinaagi sa pagtuo mipuyo siya sa nasod nga gisaad sa Dios kaniya ingon nga usa ka langyaw. Nagpuyo siya sa mga tolda sama ni Isaac ug ni Jacob nga nakadawat sa samang saad gikan sa Dios.

Tungod sa pagtuo namati si Noe sa mga pasidaan sa Dios mahitungod sa mga butang nga umaabot nga wala niya makita. Nagmasinugtanon siya sa Dios ug nagbuhat siyag arka nga maoy nakaluwas kaniya ug sa iyang pamilya. Niining paagiha gihukman niya nga sad-an ang tibuok kalibotan ug nadawat niya gikan sa Dios ang pagkamatarong pinaagi sa pagtuo.

Tungod sa pagtuo wala mamatay si Enoc. Gidala siya ngadto sa kahitas-an. Wala na siya hikaplagi kay gikuha man siya sa Dios. Nag-ingon ang Kasulatan nga sa wala pa kuhaa si Enoc nakapahimuot siya sa Dios.

Tungod sa pagtuo naghalad si Abel ngadto sa Dios ug mas maayong halad kay sa kang Cain. Tungod sa iyang pagtuo gikahimut-an siya sa Dios ingon nga tawong matarong kay gidawat man sa Dios ang iyang mga halad. Patay na si Abel apan pinaagi sa iyang pagtuo nagsulti gihapon siya.

Tungod sa pagtuo nahimo si Abraham nga usa ka amahan bisan tuod ug tigulang na siya kaayo ug si Sara dili na makapanamkon. Misalig siya nga tumanon sa Dios ang iyang gisaad.

Kay nagpaabot si Abraham sa siyudad nga ang Dios mismo maoy nagplano ug nagtukod. Mao kini ang siyudad nga ang mga patukoranan dili gayod mapukan.

Tungod sa pagtuo, si Moises sa dako na siya midumili nga tawgong anak sa babayeng anak sa Paraon. Gipalabi niya ang pag-antos uban sa katawhan sa Dios kay sa pagpahimulos sa sala sulod sa mubong panahon. Naghunahuna siya nga ang pag-antos sa mga pagyubit tungod sa Mesiyas labi pang bililhon kay sa tanang bahandi sa Ehipto tungod kay gilantaw niya ang ganti nga madawat niya. Tungod sa pagtuo mikagiw si Moises gikan sa Ehipto sa walay pagkahadlok sa kasuko sa hari. Mipadayon gayod siya ug wala mobalik kay daw nakita niya ang Dios nga dili makita.

Tungod sa pagtuo, nakahimo si Abraham paghalad sa iyang anak nga si Isaac sa dihang gisulayan siya sa Dios. Si Abraham mao ang gisaaran sa Dios apan andam siya paghalad sa iyang bugtong anak ingon nga halad-sinunog.

Tungod sa pagtuo, ang daotang babaye nga si Rahab naluwas gikan sa kamatayon nga nahiagoman niadtong misupak sa Dios tungod kay gidawat man niya nga malipayon ang mga espiya.

Tungod sa pagtuo, ang mga Israelita nakatabok sa Dagat nga Pula sama ra nga kini yuta nga uga. Apan sa dihang misulay pagtabok niini ang mga Ehiptohanon, nangalumos sila.

Tungod sa pagtuo, nangatumpag ang mga paril sa Jerico human kini libotliboti sa mga Israelita sulod sa pito ka adlaw.

Tungod sa pagtuo gitukod niya ang tulomanon sa Pagsaylo ug misugo nga isablig ang dugo diha sa mga pultahan aron dili patyon sa Anghel sa Kamatayon ang mga kamagulangang anak nga lalaki sa mga Israelita.

Tungod sa pagtuo, si Jose sa hapit na mamatay naghisgot mahitungod sa pagbiya sa mga Israelita gikan sa Ehipto ug nanugon kon unsaon ang iyang patay nga lawas.

Tungod sa pagtuo, gipanalanginan ni Jacob ang duha ka anak ni Jose sa wala pa siya mamatay. Miakbo siya sa iyang sungkod ug misimba sa Dios.

Tungod sa pagtuo, gisaad ni Isaac kang Jacob ug kang Esau ang mga panalangin sa umaabot nga panahon.