Gewilde Bybelverse vanaf Pigbukasan 13

Deel

Yanagaw, ka-ilangan ya katadeng, kay ya utaw na matadeng mag-iyap sa kakawasan na numiro na tagnaꞌ na ayep, ka-ede-an nan uman kun singalan ya utaw yan. Kay ya numiro na kanan ngalan, yan ya enemenggatus aw ka͡eneman tag enem (666).

Ya ayep yeiy, simba͡en na kadég na manga utaw na walaꞌ kasulat ya ngalan nilan adti libru na pigsulatan sa manga nyakatagtun sa ginawa na walaꞌ ya katigkasan. Sa walaꞌ pa ka-imoꞌ ya kadakulaꞌ na banwa, dadan da na walaꞌ pakasulat ya manga ngalan nilan dun ni libru na pig-awidan na Nati na Karniro na pigpatay.

Aw migsuguꞌ uman sakanan na ya kadég na manga utaw ka-ilangan dumawat sa marka dun ni kalintu na kamaw nilan, aw kun diliꞌ, adti kanilan bayuꞌ. Pangkay mangkalangkaw silan aw kun tagituꞌ na utaw, aw pangkay mayaman aw kun walaꞌ ya pagkamangan, aw pangkay allang aw diliꞌ allang, ka-ilangan na alag silan kamarka͡an. Kun walaꞌ ya marka nilan, diliꞌ silan makabaligyaꞌ aw makabayad. Aw ya marka, yan ya numiro na palangad ngalan na tagnaꞌ na ayep.

Pangkay singalan na ya datengan nan un allangen, allangen saba. Aw kun ya datengan nan patayen, un saba sakanan patayen. Asuntu na mangintu-uway da kamu kan Jisu-Kristu, ti-isa mayu ya madég na pamulayam aw padelega ya kamayu pagpangintu-u.

Pagkatigkas yan, awun kyinitaꞌ ku na kasiling na ayep na to-o kallekanan na tyumungngaw lekat adti dagat. Pitu ya ulu aw sampuluꞌ ya suwag nan. Adti tagsambuksambuk na suwag nan awun korona. Aw adti tagsambuksambuk na ulu nan awun nyakasulat na manga tingeg na malatay adti Tyumanem.

Aw pigtumbay uman adti ayep ya pag-imoꞌ sa dakulaꞌ na tanam adti manga mangintu-uway sa Tyumanem, pada degen nan silan. Aw pigtumbay uman kanan ya pagdumala sa kadég na manga tribu aw manga nasud, aw sa manga miglong sa madég na punganan na tingeg.

Aw magi sa manga pangilala na pigpa-imoꞌ kanan na tagnaꞌ na ayep, kyagawayan nan ya manga utaw na nyeyaꞌ asini tas na lupaꞌ. Aw pigsuguꞌ nan silan na mag-imoꞌ sa inutaw na tagnaꞌ na ayep na kyapali-an magi sa kampilan manang walaꞌ kamatay. Aw pigtumbay adti kadwa na ayep na atagan nan ya inutaw na ginawa pada makapaglong aw magsuguꞌ na pamatayen ya manga utaw na kumele magsimba sa inutaw.

Ya ayep yeiy kasiling na léopardo, aw ya manga siki nan kasiling na oso na to-o mangkatas ya kakulun. Aw ya manga untu nan, to-o matalem kasiling na untu na liyon. Aw pig-atagan sakanan na ulud na katulus, aw trunu, aw katundanan na un magdumala asini tas na lupaꞌ.

Na, pigtumbay adti ayep ya pagpatastas sa kanan pagka-utawun, aw ya paglong sa malatay adti Tyumanem, aw ya pagdumala seled na kapatan tag duwa (42) ya bulan.

Adti sambuk na ulu na ayep yan, awun paliꞌ na makamatay manang mig-ulat da. Yanagaw to-o nya-enneng-enneng ya kadég na utaw sa ayep yeiy, aw dyumalug silan kanan.

Pagkatigkas yan, kyumitaꞌ aku sa sambuk pa uman na ayep na to-o kallekanan na lyumuwaꞌ lekat adti lupaꞌ. Ya ayep yeiy, awun duwa ya suwag nan na kasiling na suwag na karniro, manang dun ni paglong nan kasiling sakanan na ulud na matigawayay. Aw piggamit nan ya kadakulaꞌ na katundanan na pig-atag kanan na tagnaꞌ na ayep. Aw piggelgel nan ya manga utaw asini tas na lupaꞌ na simba͡en nilan ya tagnaꞌ na ayep na awun paliꞌ na makamatay manang nyaguliꞌ da.