Luk 4
4
Ka Iblisa arifne bujodhu Yensa ki k'aŋanam a hójondoŋo
1Angu Yensa bayicaa mees a jakanku Joodan, adék ba a kanaŋaŋo kalaalinno. Agida Jamméejhu Díino Jarenninno inja na n'arumun tip a binaanam, te jámár anohálinemne ba a kanaŋaŋo kámár. 2Angu, a kanaŋaŋo kámár, bim Iblisa asíibane buŋanhu Yensa a hójondoŋo. Arifemrif na buruhu ásibaŋ jamaŋinak, kanda pirendom. Te ásibaŋo jamaŋinako nómáráŋ nip Yensa yaahálaaraŋ, haman hotir, báárig gireŋ, jaket gireŋ. Angu, kúugo alaham dáde. 3Iblisa ayéjem:
- Angu, f'ugune Úbáku Díino? Aji fi Úbáku Díino, doohor baŋ buwaalo umbu k'úyejem:
- Kular, ukaan úmbuur!
4Ayéjem:
- Ingah! Dikaan nim mara aññaañaañ a Hañaañeno anyéj: «Guyroŋ karo jafoolaŋo bareŋ gakankánehne ki uraagofoŋo ajéb.»#4.4 Na Yensa aŋoolinkinne h'añaañaane a Tawrato, a Líibáro n'aretuhne Deutéronome 8:3.
5Angu, fo Yensa alóbemne nim, Iblisa adoohom k'andék ba k’afaŋunumne n'alóba. Bampúti na, ajellihinem maŋ fam didiiraŋo di duniyaŋo nip 6-7k'ayéjem:
- Ingah! Eke úfefeg didiiraŋo indi nip?
Ayéjem:
Oo!
Ayéjem:
- Ingah! Didiiraŋo indi nip me gankarafarne! Gasúumi me, íneer ugurumaareŋ m'ísiibane. Inini, ruŋar manini a jannokum k'úbuuñahaam! Aji uruŋay a jannokum, me ínekuno maasayahu didiiraŋo indi nip ingi bafukánin ingi kunyikhinin na. Inini, ufant uruŋa a jannokum k'íneero maasayahu duniyaŋo nip!
8Angu, Yensa aŋoyindem ayéjem:
- Ingah! Me dikaan n'úsiibane. Féger baŋ, añaaññaañ a Hañaañeno ayéj:
«Ninkinan moŋon moŋon, uñantañanta ufuuhurin Umuyhintor Díino k'útuyoh ámár ba bareŋ.»#4.8 Na Yensa aŋoolinkinne h'añaañaane a Tawrato, a Líibáro n'aretuhne Deutéronome 6.13
Nim gaŋoyindemne.
9Angu, banfúri a kanaŋaŋo kalaalinno, Iblisa adoohom adékirem ba Jerusalem. Bampúti Jerusalem aŋafun Yensa baman a raafununku Jaameŋo Adénno. Bampúti a raafo ayéjem:
- Ingah! Aji angu fi Úbáku Díino, te ufiyumfiyum Díino, ricar baŋ baman a réeŋo! Ingah! Dunen úduja mara aññaañaañ a Hañaañeno anyéj: 10«Díino abúuñhuneh maleekaŋaŋo k'ankooño.
11 Maleekaŋaŋo ámáráŋ anjaalunkuno ki jinenken dugida a buwaal k'úduja haman hotir.#4.11 Na Yensa aŋoolinkinne h'añaañaane a Líibáro Bákimo 91.11,12
12Balóbi nim Yensa aŋoyindem ayéjem:
- Ingah! Me dikaan n'úsiibane. Féger baŋ, aññaañaañ a Hañaañeno anyéj:
Wúur ñantaaraŋ aríf Umuyhintor Díino k'apájul karo akankáneh karo dakaan.#4.12 Na Yensa aŋoolinkinne h'añaañaane a Tawrato, a Líibáro n'aretuhne Deutéronome 6.16
Nim gaŋoyindne Iblisa.
13Angu, nim Iblisa arifne guŋanhu Yensa a bukanku hójondoŋo. Arifrif fasoŋoŋo nip, pirendom. Angu, abénnem k'adék. Ayéj a jamméejhinem,
- Kanda iŋoolinekineh dadúk d'eyikinahinehne k'ifak irifem!»
Fo Yensa alóbne a jaameŋo no Nasaret a gubaarhu ho Díino abúuñuremne ba bukaano
14-15Angu, afúrumi na, Yensa aŋoolin ba a didiirahu Galile. Angu, f'apútne Galile, adoorulah a jaameŋeŋo k'akawandineh jamaŋo. Angu jamaŋo, banyennehini kawandhánam, andank kawandhánam n'ajóon. Angu, gurethinem ayéega fanfaŋ a didiiraŋo dímár nip. Agida Jamméejhu Díino Jarenninno inja na a binaanam n'arumun tip.
16Angu, afúrumi na, ayikyik bísiba, Yensa adék ba a saariŋo n'akunaane. Saariŋo n'akunaane, Nasaret ganyéjehne. Bapúti na, da bísibaŋo bi guyohálaŋo, adék ba a jaameŋo. Agida, maŋ nim gakaanahne a saari noŋon noŋon. Angu, dam mees adékdek ba a jaameŋo. Inini bísibaŋo bímár, waathu gukaranku Hañaañeno babári, 17annéerem kayerhu Hañaañeno k'anyéjem akaraŋ. Agida hañaañeno ha gúloku Anabila Esay gannéeremne dam. Angu bajahi kayero kámár, akeng k'atukul. Batukuli, adék ba a gúbido g'adékehne ba gukaraŋo dam. Badaŋuni kantígo, atoŋ gukaranku ho Anabila Esay añaañne na ayéj:
18 Jamméejhu Umuyhintor injanjiye a binaam. Acaabeneemcaaben k'ídek imbi mi yikireŋeŋne, ídek íteekineeniŋ kúmbuuñaam kúnsuumi.
Umuyhintor abúuñureemne k'ídek ba imbi m'ankimbenaane k'íteekineeniŋ mara ayikhineh bísiba ambénhineeniŋ. Abúuñureembuuñ k'ídek íteekin m'ampímne, mara bísiba anfékineh. Abúuñureembuuñ k'ídek íteekin m'anféginaane ingi m'anyohne dáde, mara bísiba anyohálaháneh.
19 Abúuñureembuuñ k'ídek íteekin jamaŋo mara maŋ ásibaŋo innoŋ, Umuyhintor gadékirehne bujellihinkinan básuumahánam.#4.19 Na Yensa aŋoolinkinne ho Anabila Esay añaañne a Hañaañeno; Esay 61.1,2.
Nim Yensa akaraŋne a Hañaañeno dam. 20Angu babollay gukaraŋo, abop kayero k'aŋoyind m'anéeremne. Baŋoyindem, adék anooh. Angu dam, jamaŋo banyennehini gúbido gu Hañaañeno gu Yensa akaraŋne, anningem caw immereŋ nip. 21Angu Yensa atoŋ bukawandinkinin ayéjeeniŋ:
- Inini ninkinan, h'oyennehineŋne gub a Hañaañeno, hómár atoŋtoŋ buyiko. Hómár nip ho Hañaañeno alóbne, marigen.
22Angu, jamaŋo anjantenem f'adék abolla. Úfegeŋ, balóbo b'afúruntohne a buruhunom dam anoonooh teñef k'afak asúum dáde buyennehin.#4.22 Agida immereŋ ampulpul bujantenku kawandanku alimaamaŋo k'anyéjeheeniŋ, «Kant inini! Dahu ukaan inini!» Hómár gampulne bujanteno. Angu, kawandhu Yensa amburayburay ingi kawandhu alimaamaŋo nómáráŋ. Yensa, gaŋay bukawandinku jamaŋo, akeekireeniŋ hóbun. Gúduk afúnn funaare ki nim jamaŋo ampiren anwut hóbun h'asíibane balóbo. Te faka, kawandhu Yensa ganékeeniŋneer jíko ajóoni a gubaarhu gucum tápár. Gúmár akanne ampokuni kawandhánam fanfaŋ. Balóku Yensa b'anyennehinne a kawandhánam, amapuneeniŋmapun baman a hafitenkinin. Angu Yensa balóbi nim adétun, antoŋ búyejo:
- Eke úmár úbáku Isuf?
23Angu, fo Yensa ayennehinne n'anlóbne nim, ayéjeeniŋ:
- Ingah! Afeereemfeer, ílobidir mees, ninkinan úlobhunoŋ úyejemuŋ, «Usaajum, saajar baŋ bigokon k'ífegmiŋ!» maŋ ni funaareŋo alóbne. Afeereemfeer mara úyejehunumuŋ «Inini, tamaseereŋo n'okanne a saarihu Kapáneyum, kant nanka a saarihen!» Ípápájul mara nim gúdekheŋne ba búyejhum.
24Yensa abocin ayéjeeniŋ:
- Inini, jantenemuŋ k'íteekinoonuŋ marigeno baŋ: Káriman fam anabiyoŋo, k'okunaane, na duyik guret. Saari adúk gadékehne ba buyoofunkon. Ingah! Anabiyoŋo, a saarihinem ganjutihemjuti, kanda a saari adúk ganyoofunkomyoofun. Nim gamíirne a duniyaŋo.
25Inini, túyomuŋ baŋ k'íteekinoonuŋ h'ayikne a jamaanihu Anabila Eli. A didiirahánam indi di Israyel, indikaamo mi índiigeenenkinin anhunnane anlabalaba dáde. Hómár arennrenn. Angu, a waato nómár adék ayik gurank. Guranko gúmár ayikyik díineŋ alallaŋ ingi júunoŋ amákilaŋ ingi amánduk. Angu, kúugo alah jamanku didiiraŋo nip. 26Kanda Umuyhintor, búuñuroŋ Eli k'adék anéereeniŋ gufoolaŋo a didiirahánam di Israyel. Abúuñembuuñ ba a didiira díduk. Ayéjem adék baman a didiirahu Sidon, ki gapúti na adék ba imbi udikaam úduk mu údiigenkinem guyroŋ a duniya. Udikaamo úmár a saariŋo n'ayéjuhne Sarepeta gagune.#4.26 1 Rois 17.9 Na Umuyhintor abúuñne Eli k'adék akááñinahin udikaamo a nintiku gufoolaŋo. Agida udikaamo úmár Uyahud gireŋ.
Yensa abocin ayéjeeniŋ:
27- Ingi faka, a jamaanihu Anabila Elise, ayikyik jamaŋ m'úpájul mi kafaño alah. A waato nómár anlabalaba dáde a didiirahu Israyel. Kanda Díino búuñururoŋ Anabila Elise k'adék ajébun meŋen. Úmánduk bareŋ gajébunne mu guyroŋ mu Israyel. Gurethinem Naaman. A didiira díduk gafúruntne d'ayéjuhne Siri.
28Nim Yensa alóbeeniŋne dam a jaameŋo. Angu, balóbeeniŋ nim anuyeeniŋ, ki immereŋ nip aññuumul fanfaŋ. Immereŋ h'anuyeeniŋne, ni Yensa atéekineeniŋne mara Díino, jandiŋ bakááñinayhinum ummu Israyel, fo afant anohum akááñinahin m'angune a siyeŋo adúkoŋo. Hómár anuyeeniŋne. 29K'angu anlaham anfúnnom a jaameŋo k'andékirem ba ka didiiraŋo afaŋunumne n'alóba. Agida, Nasaret a montaaño galódaane. Angu, andooh Yensa baman a raafo k'anyéj ba bucikinemer a jídonku montaaño. 30Kanda pirendeŋeŋ k'ankaan nim maro na Yensa aŋanŋan a bájegenenkinin k'apaheeniŋ adék adoona.
Fo Yensa afúnnáne tamaseereŋo Kapáneyum
31Afúrumi na, Yensa adék ba a saari adúk n'aguy a didiirahu Galile. Saariŋo nómár, Kapáneyum ganyéjehne. Angu na Kapáneyum gakawandinehne ásibaŋo no guyohálaŋo. 32Angu, jamanku Kapáneyum ambúuñabuuña kawandhánam dáde. Balókunom anoonooh teñef, te kawandhánam aŋanŋan baman a hafitenkinin. Ingi faka, jamaŋo banyennehini kawandhánam, ampájul mara ho marigen.
33Angu, ayikyik bísiba bi guyohálaŋo Yensa afak adék ba a jaameŋo nómár. Bapúti, alahun na údiigeen mu fáguh aruur. Angu údiigeeno bafégem, ayililin, ayéjem:
34- Fi Yensa mu Nasaret, horaŋ gutifehne mint? Karo údekridek nanka ba bukoomunkint? Bént mint! Me ípájulenpájul arenn fet! Fi ingine M'arennáne fet, mu Díino abúuñurne!
35Angu, fo fáguho alóbne nim, Yensa ayéjem:
- Ingah! Fi, kotar baŋ! Fút imbi uraagofoŋo!
Angu Yensa bayéji nim, fáguho awor údiigeeno a bájegenenku jamaŋo k'antógne. Baworem na, afúr k'adék adoona. Angu údiigeeno mungu, aŋoolin ajéb. Kanda fáguho afúrfur a binaanam te ni kandom h'aléer.
36Angu jamaŋo banfégi hómár, abineeniŋ dáde, k'angu anyéjeh:
- Huh! Mintoroŋ! Kanda ummu! Horaŋ ingine inho? Galóbi ingi fáguhoŋo, fáguhoŋo anwaalaram! Ummu ii, gúlokunom ayikyik sembe fanfaŋ. Fáguhoŋo ganyennehindem, andék andoona.
Hómár jamaŋo ganlóbohne dam a jaameŋo no Kapáneyum.
37Angu afúrumi na, gurethinem afaŋunum n'ayéega. Ayéega fanfaŋ a saariyeŋo nip a didiiraŋo dímár.
38Angu dam, bafúrumi a jaameŋo no Kapáneyum, adék ba a díku údiigeeno m'ayéjuhne Simon. Angu f'apútne, antéekinem mara úboonahu Simon udikaamo jébireŋ. Anyéjem arinkinem gadocodoc, adúhunduhun waat. Angu, anyéjem:
- Újebireŋo ummo na. Dókulo k'úkááñinahinem!
Angu, Yensa adék alahun újebireŋo k'awaanane. 39Bapúti na adíigirina imbi újebireŋo k'ayéjem:
- Gúduhuno! Bénnerem! Fút!
Maŋ ni anik alóbne nim, gúduhuno afúr. Maŋ ni afúrne arinku udikaamo agillen yem, ajéb. Angu, akeng maŋ fam adék ba bítedakánin.
40Angu, afúrumi na, fo bísibaŋo añunne, moŋon moŋon jébireŋne a saariŋo, andoorom andékitem ba imbi Yensa. Banér baŋan baŋan alahne wúur, andoorom ba imbi Yensa. Gampútri, alah újebireŋ moŋon moŋon k'alóbundom halakánam. Galóbunden halakánam, újeb. Maŋ nim gakanne f'adék ajébun jamaŋo immereŋ nip. 41Angu, mi fáguhoŋo anruurne, immereŋ mees, andooreeniŋdoor imbi Yensa, ki Yensa afúndureeniŋ fáguhoŋo. Kanda fáguh faŋan faŋan, gaŋay gúfuro, ayililin ayéjeh:
- Fi, ípájulenpájul, f’ugune Úbáku Umuyhintor!
Angu fáguhoŋo banlóbi nim, Yensa lókiireŋ k'antéekin jamaŋo hómár k'ayéjeeniŋ:
- Ninkinan! Kotaareŋ!
Agida fáguhoŋo n'ampájul mara úmár agune Umaasaŋo mu Díino Acaabenne.
Angu dam, Yensa ajébunjebun ñanjébireŋo nip m'angune Kapáneyum.
42Angu gucunkunom harennaamo, Yensa akeng afúr a saariŋo nómár k'adék ba a kantíg k'ayerer k'anooh na. Angu, banfégi maro gireŋ na a saariŋo, jamaŋo jup ankomb horoŋ bútibhinem f'andék andaŋunam. Angu, bandaaŋunem anyéjem:
- Yensa! Bonkerer, mint síibaarimiŋ k'úfur a saarihint deh! Mint ísiibáámiŋsiib k'uŋooliner.
43Banlóbi nim ayéjeeniŋ:
- Inini, ninkinan, eke ujaheŋjah Kúmbuuñaamo Kúnsuuminno ku maasayahu Díino? Inini me ii, kúmbuuñaamo kúmár, iñantay ídek ipasun a saariyeŋo adúkoŋo. Ingah! Gúmár ho Díino abúuñureemne. Ñantaari inooh a saari amánduk bareŋ.
44Angu Yensa balóbeeniŋ nim, abénneeniŋ na k'adék ba a didiirahu Júde, úmár ingi ñantaalibehinem. Angu, gampúti a jaame no fanti banyennehin Kúmbuuñaamo Kúnsuuminno, Yensa adék akawandineeniŋ. Nim gakaanahne a jaameŋeŋo no didiirahu Júde.
Okuqokiwe okwamanje:
Luk 4: GD
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Copyright Vision Intégrale, Senegal
