मत्ती 22
22
ब्या गै भोज गी मिसाल
(लूका 14:15-24)
1यीसू फेर बानै एक ओर मिसाल केण लागग्यो। 2“सुरग गो राज बिं राजा बरगो है झिकै आपगै बेटै गो ब्या करयो। 3राजा आपगै दासा नै भेज्या कै बां लोगां नै बुला ल्यावो झिका नै नूंतो देयड़ो है। पण बां लोगां आणो कोनी चायो। 4राजा फेर दासा नै केयो बानै जा'गे ल्यावो कै भोजन तैयार है, चालो। 5नूंतो देऐडि़यां लोगां बिं बात पर ध्यान कोनी दियो। अर कोई खेत में उड़ग्यो अर कोई आपगै काम पर उड़ग्यो। 6अर झिका बचा रेया, बां दासा नै पकड़गे कूट्या अर केईयां नै मार दिया। 7जद राजा नै रीस आ'गी, बण आपगै सैनिकां नै घाल्या। बां जा'गे सारा नै मार दिया अर बांगै नगर में आग लगा दी। 8फेर राजा आपगै दासा नै केयो, भोज तैयार है। पण झिका नै नूतो दियो बे लोग काम गा कोनी निकळ्या। 9ईंखातर गाम में जाओ अर गळियां में अर कूंटा पर झिको बी थानै मिलै बानै बुला ल्यावो। 10जद बे गेया अर जिता बी आच्छा माड़ा लोग बानै मिल्या बानै ल्याया अर बिंगो घर मेहमाना ऊं भरिजग्यो। 11पण जद राजा मेहमाना नै देखण आयो तो बण एक हिस्यो आदमी देख्यो झिकै गै ब्या गा गाबा कोनी पेरेड़ा। 12राजा बिनै केयो, हे बेली, तूं बिना ब्या गा गाबा गै मा किंया आ'ग्यो? पण बो बोल्यो कोनी। 13जद राजा आपगै दासा नै केयो, इंगा हात पग बांदगे अंधेरै में फेंक दैयो जठै लोग रोवै अर दांत पिसै। 14क्यूंकै बुलाएड़ा तो भोत है पण चुणेड़ा थोड़ा है।”
कैसर नै कर देणो
(मरकुस 12:13-17; लूका 20:20-26)
15फेर फरीसियां जा'गे ईं बात पर बिचार करण लागग्या, यीसू नै किसी बात में फसावां? 16बां आपगै चेला नै हेरोदेस गै सागै बिंगै कनै भेज्या। बां जा'गे यीसू नै केयो, “गुरूजी म्हे जाणा कै तूं साच्चो है अर सच्च में परमेसर गी रा गी सिक्सा देवै। कोई कीं सोचै तूं बिं बात गी फिकर कोनी करै क्यूंकै तूं आदमियां कानूं कोनी करै, तूं परमेसर कानूं करै।” 17फरीसियां पूछयो, “थे बताओ कै महाराज कैसर नै कर देणो ठीक है या कोनी?” 18यीसू बांगै बुरै इरादै नै जाण ग्यो अर केयो, “अरै कपटियो थे मनै क्यूं परखो? 19मनै एक सिको दिखाओ झिका ऊं थे कर देवो।” जद बां बिनै सिको दियो। 20बण केयो, “ईं पर किंगी फोटू अर किंगो लेख खुदेड़ो है।” 21बां केयो, “महाराज कैसर गो।” जद बण केयो, “झिको महाराज कैसर गो है बो कैसर नै दे दैयो अर झिको परमेसर गो है बो परमेसर नै दे दैयो।” 22ओ सुणगे बे हेरान हो'ग्या अर बठूं उड़ग्या।
जी उठणो अर ब्या होणो
(मरकुस 12:18-27; लूका 20:27-40)
23बिं दिन'ई केई सदूकी झिका दुसर जी उठण नै कोनी मानै हा बे बिं कनै आया अर पूछण लागग्या। 24“गुरूजी, मूसा गै नेम विधान गै अनुसार जे कोई लुगाई गो आदमी बे उळाद मरज्यै तो बिं लुगाई सागै बिंगो भाई ब्या कर सकै के? कै आपगै भाई खातर उळाद पैदा करै। 25इंया मानो कै सात भाई है। पेलै गो ब्या होयो अर बे उळाद मरग्यो। फेर दूसरै भाई बिंऊं ब्या कर लियो। 26जद तांईं सारा मरग्या इतै तांई सारा सागै इंया ई होयो। सारा बे उळाद मरग्या। 27अर बाद में बा लुगाई बी मर गी। 28अब थे बताओ दुसर जीण गै बाद बा सातां मू किंगी लुगाई हो'सी क्यूंकै बण सातां सागै ब्या करयो।” 29यीसू उतर दियो, “थे गळत सोचण लागरयाओ क्यूंकै थे सासतर अर परमेसर गी सकती नै कोनी जाणो। 30थानै ओ समझणो चईयै कै मरेड़ा ऊं जीवंता होवांगा जद किंगोई ना तो ब्या होवैगो अर ना ब्या करसी। पण बे सुरगदूतां बरगां होवैगा। 31पण मरेड़ा ऊं जींवता होण गै बारै में थे ओ बचन कोनी पढयो झिको परमेसर थानै दियो। 32मैं अबरहाम, इसहाक अर याकूब गो परमेसर हूं। मैं मरेड़ा गो कोनी पण जीवंता गो परमेसर हूं।”#निरगमन 3:6 33जद लोग बिंगी बात सुणगे हेरान हो'ग्या।
सारा ऊं मोटो आदेस
(मरकुस 12:28-34; लूका 10:25-28)
34जद फरीसियां सुण्यो कै यीसू आपगी बात ऊं सदूकियां गै मूं गै ताळो जड़दियो तो बे सारा भेळा होया। 35बामूं एक यहुदी नेम सिखाण आळै बिनै फसाण खातर पूछयो। 36“गुरूजी, नेम विधान में सारा ऊं मोटो आदेस किस्यो है।” 37-38यीसू केयो, “तूं पूरै मन आत्मा अर बुद्धी ऊं आपणै प्रभु परमेसर ऊं प्रेम कर। ओ सारा ऊं पेलो अर मोटो आदेस है।”#व्यवस्ता विवरण 6:5 39अर ईं तरियां गी आ दूसरी आग्या है कै तूं आपगै पड़ोसी ऊं आपगै तरियां ई प्रेम करी।#लेवी 19:18 40सारी नेम विधान अर परमेसर गी बात बताण आळा गी किताबां, आं दो आदेसा पर टिकेड़ी है।
41जद फरीसी सारा भेळा होया, बिं टेम यीसू बानै एक बात पूछी। 42“मसी गै बारै में थे के सोचो कै बो किंगो बेटो है?” बां केयो, “दाऊद गो।” 43-44बण पूछयो, “फेर आत्मा ऊं भरगे दाऊद बिनै प्रभु क्यामी केवै?” परमेसर मेरै प्रभु नै केयो, “मेरै दाहिणै पासै बेठगे राज कर। जद तांई मैं तेरै दुसमणां नै तेरै बस में ना कर दैयूं।”#भजन संगिता 110:1 45फेर जद दाऊद बिनै प्रभु केयो तो बिंगो बेटो किंया हो सकै। 46ईं बात गो कणैई उतर कोनी दियो। अर बिंगै बाद किनैई कोई बात पूछण गी हिम्मत कोनी पड़ी।
Okuqokiwe okwamanje:
मत्ती 22: BGQ
Qhakambisa
Dlulisela
Qhathanisa
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2023 (Active), Wycliffe Bible Translators, Inc. All rights reserved. © WIn Publishing Trust
