मत्ती 21

यीसू गो यरुसलेम में जाणो

(मरकुस 11:1-11; लूका 19:28-40; यूहना 12:12-19)

1यीसू अर बिंगा चेला जद यरुसलेम कनै जेतुन प्हाड़ गै बैतफगे पूग्या तो यीसू आपगै दो चेलां नै ओ आदेस देगे भेज दिया कै, 2ईं सामलै गाम में जाओ। बठै जाण तांई थानै एक गधी बांदेड़ी मिलैगी। बिंगै कनै बिंगो बच्चों होवैगो। बानै मेरै कनै लिआओ। 3जे कोई थानै कीं केवै तो थे के देईयो प्रभु नै इंगी लोड़ है। बेगो ई पाछा पुगादैयगो। 4ओ परमेसर गी बात बताण आळा गो बचन पूरो होण खातर इंया होयो कै, 5यरुसलेम गा लोगों, देखो थारो राजा थारै कनै आण लागरयो है। बो दीन अर एक गधी गै बच्चै पर सवार है। 6जद चेला जा'गे बिंयाई करयो जिंया यीसू केयो। 7बे गधी अर बिंगै बच्चै नै ल्याया। अर बिं पर आपगी चादर घाल दी क्यूंकै यीसू नै बिं पर बेठणो है। 8भीड़ गै लोगां आपगा पोतिया रा पर बिछा दिया अर केई लोगां दरखतां गी डाळियां बाड बाडगे रा में बिछा दी। 9अर सारा लोग केवा,

“प्रभु गी जय जयकार होवै,

धन्य है दाऊद गो बेटो झिको प्रभु गै नाम ऊं आवै।

प्रभु झिको सुरग में विराजमान है बिंगी जय जयकार होवै।”#भजन संगिता 118:25,26

10जद बो यरुसलेम में बड़यो तो सारै नगर में रोळो मचग्यो, ओ कुण है? 11लोगां इंया जबाब दियो, बो गलील गै नासरत गो परमेसर गी बात बताण आळो यीसू है।

यीसू मिन्दर में

12जद यीसू मिन्दर गै आंगणै में आयो तो बठै लोगां गी लगाएड़ी दूकाना देखी। जद बण सारै दूकानदारा नै भजा दिया। अर सारा गी दूकाना खिण्डा दी। 13बो बानै केण लागग्यो, सासतर इंया केवै, “ओ मेरो पराथना गो घर है।#यसयाह 56:7 पण थे इनै डाकुआं गो अड्डो बणा राख्यो है।”#यिरमयाह 7:11 14मिन्दर में केई आंधा, लंगड़ा बिं कनै आया बण बानै ठीक कर दिया। 15जद मुख्य याजकां अर यहुदी नेम सिखाण आळा बिंगै चमत्कार गा काम देख्या अर लोगां गी ऊंची आवाज में सुण्यो कै प्रभु गी जय जयकार होवै। दाऊद गो बेटो धन्य है। 16जद बानै रीस आ'गी अर बां पूछयो, “तूं सुणै है कै के केण लागरया है?” यीसू बानै केयो, “सुणण लागरयो हूं।” थे सासतर में इंया कोनी पढयो कै,

“थे टाबरां अर दूध पीण आळा टाबरा ऊं

बडाई करवाई है।”#भजन संगिता 8:2

17फेर बानै बठै ई छोड़गे यरुसलेम नगर ऊं बारै बेतनियाह उड़ग्यो अर रात नै बठै ई रेयो।

बिना फळ गै अंजीर गो दरखत

(मरकुस 11:12-14,20-24)

18अगलै दिन दिनगै दिनगै नगर ऊं पाछो आण लागरयो तो बिनै भूख लागी। 19रा में बण एक अंजीर गो दरखत देख्यो अर बिंगै कनै गेयो, पण बिंगै एक ई अंजीर कोनी लागेड़ो दिख्यो। जद बण केयो, “तेरै कदी फळ ना लागै। अर बो दरखत जद ई सूक ग्यो।” 20जद चेला ओ देखगे हेरान हो'ग्या अर पूछयो, “ओ दरखत इतो बेगो किंया सुख ग्यो।” 21यीसू उतर दियो कै, “मैं थानै साची केऊं कै जे थारै में बिस्वास है अर मन में बेम कोनी राखो तो झिको मैं ईं दरखत सागै करयो है बिंयाई थे जे ईं प्हाड़ नै के दैयो, उठ अर समुंदर में पड़ जा तो बिंया होवैगो। 22थे पराथना में झिको कीं बिस्वास ऊं मांगो बो थानै मिल ज्यैगो।”

यीसू गै अधिकार पर सवाल

(मरकुस 11:27-33; लूका 20:1-8)

23जद यीसू मिन्दर में परचार करण लागरयो तो मुख्य याजक अर यहुदी बुडा लोगां बिंगै कनै आ'गे पूछयो, “हिसी बातां तूं किंगै हक ऊं करै। ओ हक तनै कण दियो है।” 24यीसू बानै उतर दियो, “मैं थानै एक बात पूछूं, जे थे जबाब देओगा तो मैं थानै बताऊंगा कै मनै ओ हक कण दियो है। 25यूहना गो बतिस्मो कठूं होयो? परमेसर कानूं या मिनखां गै कानूं।” जद बे आपसरी में बात कर'गे केण लागग्या, जे आपां के दियो, परमेसर कानूं होयो तो ओ पूछैगो तो थे बिस्वास क्यूं कोनी करयो? 26जे के दियो कै मिनखां गै कानूं तो लोग आपां नै मारैगा क्यूंकै बो एक परमेसर गी बात बताण आळो हो। 27जद बां केयो, “म्हानै ठा कोनी।” जद यीसू केयो, “फेर मैं थानै कोनी बताऊं, मैं ओ काम किंगै अधिकार ऊं करूं।”

दो बेटां गी मिसाल

28थे इंगै बारै में के सोचो? एक आदमी गै दो बेटा हा। बण मोटै बेटै नै केयो, “आज अंगूरा गै बाग में जा'गे काम कर।” 29बेटै केयो, “मैं कोनी जाऊं।” पण बाद में पछताओ कर'गे उड़ग्यो। 30फेर बण छोटियै बेटै कनै जा'गे बिंयाई केयो। बण केयो, “पिता, मैं जाऊं।” पण बो गेयो कोनी। 31थे बताओ, आं दोनां मू पिता गो केणो कण मान्यो। बां केयो मोटोड़ै बेटै। यीसू केयो, “मैं थानै साची केऊं, चुंगी लेण आळा अर वेसिया लुगाईयां परमेसर गै राज में थारूं पेली जासी।” 32मैं ईंखातर केण लागरयो हूं, “क्यूंकै बतिस्मो देण आळै यूहना थानै सई रा बताण आयो, पण थे बिं पर बिस्वास कोनी करयो। पण चुंगी लेण आळा अर वेसिया लुगाईयां बिं पर बिस्वास करयो। थे बानै देखगे मन कोनी बदळ्यो अर ना'ई बिस्वास करयो।”

बुरै किसान गी मिसाल

(मरकुस 12:1-12; लूका 20:9-19)

33“एक ओर मिसाल सुणो। एक जमिन्दार हो। बण अंगूरां गो बाग लगायो अर बिंगै च्यारूंमेर बाड़ लगा दी अर रस काडण खातर एक कुण्ड बणायो अर ऊंचो डूंचियो रुखाळी खातर बणायो। फेर बाग नै ठेकै पर देगे परदेस उड़ग्यो। 34जद अंगूर तोडण गो टेम आयो तो बाग गै मालिक आपगै दासा नै बाग ऊं पांती ल्याण घाल्या। 35-36पण किसानां बानै कूट मारगे भजा दिया। फेर बण आपगै केई ओर दासा नै घाल्या, पण बांगै सागै बिंयाई करयो। केईयां नै कूटया, किनैई मार दिया अर किनैई पथर मारया। 37फेर आपगै बेटै नै बाग में भेज्यो। बण सोच्यो, मेरै बेटै गो आदर मान करसी। 38पण किसानां बेटै नै देखगे आपसरी में केण लागग्या, ओ तो बिंगो वारिस है। आपां इनै मार दैयां तो बाग आपणो होज्यी। 39जद बे बिनै घीसगे बारै लेग्या अर मार दियो। 40अब थे बताओ जद बाग गो मालिक आवैगो तो बो किसानां सागै के करैगो?” 41बां केयो, “बो बां दुस्ट लोगां नै माड़ी मोत मारैगो अर बाग गो ठेको दूसरा नै दे दैयगो झिका इमानदार होवैगा। बे बिनै टेम पर फळ दैयगा।” 42यीसू केयो, “थे सासतर गो बो बचन कोनी पढयो।”

“झिकै पथर नै राज मिस्तिरियां बेकार समझयो

बो ई कूंट गो सारा ऊं आच्छो पथर बणग्यो।

हिस्यो प्रभु करयो,

झिको म्हारी नजरां में आच्छो है।”#भजन संगिता 118:22,23

43ईंखातर मैं थानै केऊं कै परमेसर गो राज थारूं ले लियो जावैगो अर बो बानै दियो जावैगो झिका बिनै टेम पर फळ दैयगा। 44झिको ईं पथर पर पड़ैगो बो टोटा टोटा होज्यैगो। अर जे ओ पथर कीं पर पड़ैगो तो बिनै पीस दैयगो। 45जद मुख्य याजकां अर फरीसियां आ मिसाल सुणी तो बे जाणग्या कै म्हारै खातर केण लागरयो है। 46जद बे बिनै पकड़न गी कोसिस करण लागग्या पण बे लोगां ऊं डरा क्यूंकै लोग यीसू नै परमेसर गी बात बताण आळो माना हा।

Okuqokiwe okwamanje:

मत्ती 21: BGQ

Qhakambisa

Dlulisela

Qhathanisa

Kopisha