ISihlabelelo Sezihlabelelo 1
1
Isihlabelelo Sezihlabelelo
1 Isihlabelelo sezihlabelelo sikaSolomoni.
Isihlabelelo Sothando (1)
Intombi:
2 Makangiqabule
ngokuqabula komlomo wakhe!
Uthando lwakho
lumnandi kunewayini.
3 Amafutha akho
athaphuka iphunga elimnandi,
igama lakho linjengamafutha
atheliweyo;
yingakho izintombi
zikuthanda nje.
4 Ngidonse ngikulandele, sigijime.
Inkosi isingingenisile
emakamelweni ayo.
Abangani:
Siyojabula, sithokoze ngawe;
uthando lwakho siyolukhumbula
ukwedlula iwayini.
Intombi:
Abalungileyo bayakuthanda.
5 Madodakazi aseJerusalema,
ngimnyama kodwa ngimuhle.
Nginjengamathende akwaKhedari,
nanjengamakhethini kaSolomoni.
6 Ningabuki ukuthi ngimnyama,
ngifuswe yilanga.
Amadodana esizalwa
mfazi munye nawo,
angithukuthelele,
angenza umlindizivini,
ngangabe ngisasilinda esami.
7 Ngitshele wena othandwa
ngumphefumulo wami,
umhlambi wakho uweluselaphi,
uwuphumuzelaphi emini na?
Kungani kumele ngihambe
ngicinga emihlanjini
yabangani bakho,
njengowesifazane ogubuzele
ngemvakazi na?
Insizwa:
8 Uma ungazi,
wena omuhle
kunabo bonke abesifazane,
landela imizila yomhlambi,
weluse amazinyane akho
ngasemathendeni abelusi.
Insizwa:
9 Ngikufanisa nehhashi lami lensikazi
phakathi kwezinqola zempi kaFaro,
sithandwa sami.
10 Izihlathi zakho zinhle
zinemicu yobuhlalu,
intamo yakho inemigexo.
11Sizokwenzela imigexo yegolide
enobuhlalu besiliva.
Intombi:
12 Ngesikhathi inkosi
isahleli etafuleni layo,
inadi lami lathaphuka
iphunga lalo.
13 Othandiweyo wami uyisigaxa semure kimi,
ulala phakathi kwamabele ami.
14 Othandiweyo wami kimi
ufana nesixha sehena
ezivinini zase-Eni Gedi.
Insizwa:
15 Waze wamuhle sithandwa sami!
Bheka, umuhle,
amehlo akho angamajuba.
Intombi:
16 Bheka, umuhle,
wena othandiweyo wami,
yebo, uyathokozisa.
Indawo esicambalala kuyo iluhlaza.
Insizwa:
17 Imishayo yezindlu zethu iyimisedari,
uphahla luyimisayiphuresi.
Okuqokiwe okwamanje:
ISihlabelelo Sezihlabelelo 1: ZUL20
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Bible in isiZulu 2020 © Bible Society of South Africa 2020. Digital Version © Bible Society of South Africa 2020. All rights reserved. www.biblesa.co.za.
Bible in isiZulu 2020 with Deuterocanonical Books © Bible Society of South Africa 2020. Digital Version © Bible Society of South Africa 2020. All rights reserved. www.biblesa.co.za.