मत्ती 17
17
चैलै, मूसा एलिय्याह औरौ यीशु का दर्शन दैखा
1छोई दूसौ कै बाद यीशुए पतरस औरौ याकूब औरौ तैसकै भाई यूहन्ना खै आपणै साथै ऐक ऊंचे धारो पांदी शान्त जौगैह दै नियै। 2औरौ तिनकै सामणै तैसका भैष बौदलै गौआ, औरौ तैसकौ मुँह सुरज कै जैशणौ चौमकौ औरौ तैसकै खोटणो पेयाशै कै जैशणै उजल़े हौए गौवै। 3औरौ मूसा औरौ एलिय्याह यीशु कै साथै बातौ कौरदै बैई तिनकै देखिऐ। 4ऐजौ देखिबा पतरसे यीशु कै बौल़ौ, “ओए रै प्रभु, अमारै इथै रौणौ आछौ औसौ; जै तैरै इछा औसौ तौ इथै तीन तोम्बू बाणु; ऐक तांव कारिए, ऐक मूसा कारिए, औरौ ऐक एलिय्याह कारिए।” 5तैणै बौल़ै ही लो थियु, कै दैखौ, ऐक चौमकिला बादल़ तिनु पांदी छाए गौआ, औरौ तिनुऐ तैसी बादल़ौ पौरैशा पौरमेशवर कै बौलदै बैई शुणा कै, “ऐजा मैरा लाड़कु बैटा औसौ; जैसी दा हांव खुश औसौ: ऐसकी शुणौ।” 6चैलै इथु शौणैबा मुँह कै ढौबौशै धैनै रिड़ै औरौ बौहितै डौरे गौवै। 7यीशुए नेड़िक आयौ चैलै कै छूवे, औरौ बौल़ौ, “ऊबा बिज़, डौरेया नै।” 8तोबै चैलै आपणी आखी खुली औरौ यीशु कै छोड़ेबा कोसी ओकी कै ना दैखी। 9जोबै सै धारो पांदी दै उदे आन्दै लागै रौए थिए, तोबै यीशुए तिनुखै ऐजै आज्ञा दै, “जांव तौड़ी हांव आदमी का बैटा मौरेयौंदे पौरैशा हौजौ जियुंदी ना हौए जोऊं, तांव तौड़ी कोसी कैंई ऐजौ नी बौताया कै तुऐं का दैखौ।” 10औरौ तैसकै चैलै तैसी कैईंदु पूछु, “कै यहूदी शास्त्री किथुखै बौल़ौ, कै एलिय्याह मसीह दा औगौड़ियौ आला?” 11यीशुए तिनुखै जोवाब दिया, “एलिय्याह तौ जौरुर आन्दा औरौ सौब ठुँ सुधारै दैन्दा। 12पौरौ हांव तुऔं खै बौतौऊं एलिय्याह औगौड़ियौ आए रौआ; औरौ तिनुऐ तौ तैसीखै ना पोछैयाणी, पौरौ जैशैखै चोऊ तैशैखैई तैसकै साथै बुरा बर्ताव कौरा, ऐशैखैई हांव आदमी का बैटा बै तिनकै हाथौ लैई दुख झैलदा।” 13तोबै चैलै जाणौ की ऐणै आमुकैंई यूहन्ना बपतिस्मा दाता कै बारै मुंजी बौल़ै लौ।
मिर्गी दा पौड़ेयौंदा भैईया कै ठीक कौरणा
(मर 9:14-29; लूका 9:37-43)
14जोबै यीशु औरौ तैसकै चैलै भीड़ौ कै धोरे पोऊंचे, तौ ऐक आदमी तिनकै धोरे ओऊवा, औरौ घुंडू नियुड़ायो बौलदा लागा। 15“ओए रै प्रभु, मैरै बैटै पांदी दया कौर, जिथु तैसीखै मिर्गी कै दोरै आंव, औरौ सै बैजाए दुखी औसौ; औरौ बार-बार आगी मुंजी, औरौ बार-बार पाणी मुंजी रिड़ो। 16औरौ मोऐं तैसीखै तैरै चैलै कै धोरे लाए राए थिया, पौरौ सै तैसीखै ठीक ना कौरे सौकी।” 17यीशुए जोवाब दिया, “ओए रै बिशवाश ना कौरणौवाल़ै औरौ हठीले लोगौ, हांव कोलो तौड़ी तोंवारै साथै रोऊंबा? औरौ कोलो तौड़ी तुंआरी सोंहुबा? तैसी भैईया मैरै धोरे इथै लांव।” 18तोबै यीशुए दुष्टआत्मा कै झिड़की, औरौ दुष्टआत्मा तैसी पौरैशै निकल़ै गौए, औरौ भैईया तैसी सौमय ठीक हौए गौआ। 19तोबै चैलै इकली दै यीशु कै धोरे आयौ पूछु; “अमारै किथुकै दुष्टआत्मा कै बायरै ना घाड़ी?” 20तैणै तिनुखै बौल़ौ, “आपणै बिशवाश कै कमी कै बौजैह शै, जिथुखै हांव तुऔं खै साचौ बुलू, जै तोंवारा बिशवाश राई कै दाणै कै बराबर बै हौला, तौ तुऐं इथु धारो खै बै बौल़ै सौकौ, ‘कै इथै दो ओकशैयो तिथै हौटै जा,’ तौ सै हौटै जांदो; औरौ कुणजी बै बात तुऔं कारिए नामुमकिन ना हौंदै। 21पौरौ ऐजी जाति बिना प्रार्थना औरौ उपवास कै ना निकल़ौ।”
यीशु का आपणी मौत कै बारै मुंजी औटेयौ बौताणौ
22जोबै सै गलील जिले दै थिए, तौ यीशुए तिनुवागे बौल़ौ, “हांव आदमी का बैटा, बौयरै कै हाथौ लैई थोम्बाया जांदा। 23औरौ ऐजै लोग मुखै मारै दैंदै; औरौ हांव ती दूसौ बाद जियुंदा हौए जांदा।” इथपांदी सै बौहितै उदास हौवे।
मन्दिर का मामला लोणा
(मर 9:30-32; लूका 9:43-45)
24जोबै सै कफरनहूम नगर दै पोऊंचे, तौ मन्दिर का मामला लोणो वाल़ै पतरस कै धोरे आयौ पूछु, “की का तोंवारा गुरु मन्दिर का मामला ना दैंदा?” 25तैणै बौल़ौ, “हौर दैंव तौ औसौ।” जोबै सै घोरे ओऊवा, तौ यीशुए तैसीकै पूछणो दो आगै बौल़ौ, “ओए रै शमौन तू का सौमझै धोरती का राजा महसूल या मामला कोसी कैईंदु लोंव? आपणै बैटै कैईंदु या पराए कैईंदु?” 26पतरसे तैसीखै बौल़ौ, “पराए कैईंदु।” यीशुए तैसीखै बौल़ौ, “तौ बैटा बौचै गौआ। 27तोबै ऐशैखै ना हौंव कै सै आमुआरी खैजै जांव, तू झील कै किनारे जाऐबा कांडा पा, औरौ जू माछी आगै निकोलल़ी, तियौं ला; तौ ताखै तिथकै मुं खौलणौ पांदी ऐक सिका भैटला जिथका दाम चोऊ दूसौ कै धियाड़ै औसौ, तैसी लोएबा मैरै औरौ आपणै मामलै कै बौदलै तिनुखै दैय दैया।”
Okuqokiwe okwamanje:
मत्ती 17: SRXNT
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
