UJobe 17
17
Ukuphela kwenkulumo kaJobe: ucela ukumelwa nguNkulunkulu; ulindela ukufa
1“Umoya wami usuchithekile, imihla yami iyacimeka;
okwami sekuyithuna nje.
2Impela kukhona abangiklolodelayo,
iso lami lisekucunuleni kwabo.
3 Ake unginike isibambiso, ungimele;
ngubani oyakuxhawulana nami na?
4Ngokuba uvalile izinhliziyo zabo zingaqondi;
ngalokho awuyikubaphakamisa.
5Ochaka abangane bakhe ngenxa yesabelo,
amehlo abantwana bakhe ayakufiphala.
6 Ungibeke isaga sabantu,
ngibe ngokhafulelwa ebusweni.
7Iso lami lifiphele ngosizi;
onke amalungu ami anjengethunzi.
8Abaqotho bayethuswa yilokho;
ongenacala uyavukela ongenaNkulunkulu.
9Kepha olungileyo ubambelela endleleni yakhe;
onezandla ezihlanzekileyo ude eqina njalo.
10Nokho buyani nonke phela, nize;
kodwa angiyikuthola phakathi kwenu ohlakaniphileyo.
11Imihla yami isidlulile,
amasu ami anqunyiwe
kanye nemicabango yami yenhliziyo.
12Ubusuku babenza imini,
bathi:
‘Ukukhanya kuseduze nobumnyama.’
13Uma ngithemba ukuthi indawo yabafileyo iyindlu yami,
ngendlalele ukhukho lwami ebumnyameni,
14 ngibize ukubola ngokuthi ubaba
nezimpethu ngokuthi umame nodadewethu,
15liphi, pho, ithemba lami na?
Yebo, ithemba lami,
ngubani oyakulibona na?
16Liyakwehlela emigoqweni yendawo yabafileyo,
lapho kuyakuba khona ukuphumula othulini kanyekanye.”
Okuqokiwe okwamanje:
UJobe 17: ZUL59
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© Bible Society of South Africa 1959, 1997. Used with permission. All rights reserved.