Chukusakị 41
41
Josẹf Ḅe Amanyanaḅọ Ḅe Ḍawọ Mị Pu Finjimẹ
1Mama kụra ḅo ḅọrọ sịkị, Ijipt amanyanaḅọ ḅe ọ̀ ḍawọmẹ, na Naịl Tọrụ mị aka ọ̀ chịẹarịogbo, 2ḅẹlẹkị chụa oju mọnịmọnị sọnọma nambulo ọ̀ nwọ ọrịmẹ tọrụ mị ḅie pakaḅo se anịanga sime osueinma fịaḅẹ. 3Anịsịkị jịn sọnọma nambulo pịkị tọrụ mị ḅie pakaḅomẹ; àrị nyọnị pịkị ikpoki chụamẹ. Àrị tọrụ mị aka ísí nambuloma anga chịẹmẹ, 4ikpoki chụa nambuloma ḅẹlẹkị chụaye ma pẹị somẹ. Anị amanyanaḅọ ḅe ò boma sịsẹye-ẹ. 5Ọ̀ pịkị mọnọmẹ, se jịn ḍawọ kọnmẹ. Ḍụḅaḍụḅa chụa pụn sọnọma ịpịamgba gbọrị ịkpangị ḅụ chụamẹ. 6Anịsịkị jịn nyọnị fịoro-fịoro, onwun ele ḅie fọrụ mị samịnamasa ịpịamgba sọnọma chịn pịkị pakaḅomẹ, 7se fịoro-fịoro samịna sọnọma chịnma iḅiaye ma mịnịmẹ. Amanyanaḅọ ḅe boma sịsẹ ḅo nemimẹ na ọ̀ ḍawọ simemẹ. 8Dedeḅie, ḍawọ ma ọ̀ ḅụḅalaḅalamamẹ, anịgose ori Ijipt ḅie sime ḍirikọrị apụma na, ḅịrịkọn apụ mamgba na fịrịma ḅomẹ. Ori oria ḍawọ ma ḍuko ini pịrịmẹ, ọkụma inimgba ineda ḍawọ ma fieye pu finji ọ̀ pịrịḅọ ofori-ẹ.
9Anịsịkị re mị amanyanaḅọ iru chụachụaḅọ ḅe ḅiekoroma se nwọse amanyanaḅọ ḅe ḅẹmẹ; “Ngịsị à gbarịma-ẹkẹ mịmgba, àrị ị̀ya si ḍukopakụmaḅịa na à siye mịẹsam. 10Tịḅịnị fịturu mịẹḅọ ḅe na ị̀rị̀ na, ị́ ịganị wa pịrịmẹ, se ị́ pịkị wa se nyọkoruapụ ma tịḅịnịḅọ ḅe ikoliwarị ḅie ịkasịmẹ. 11Gbọrị ḍin wa ḍawọmẹ, anịsịkị ḍawọ ma pịkị kịrịkịrịye fiemẹ. 12Gbọrị Hibru asẹmẹnị tọkụ anịanga mine na simemẹ, ori anị, nyọ ḍikiḍiki apụma tịḅịnịḅọ ḅe omoniḅọ-ẹ. Wa mịna ḍawọ ma ḍuko ọ̀ pịrịmẹ, ọ̀ pịkị àrị fieye ḍuko wa pịrịmẹ. 13Ye ma pịkị ò ḍuko ḅara nwọ pakamẹ: ị́ ị̀ seḅo ị̀ya kiri koromamẹ, ọkụma fịturu mịẹḅọ ḅe tịḅị ị́ nwọ pẹlẹsinmẹ.”
14Amanyanaḅọ ḅe ò Josẹf ḅe fịrịmamẹ, se kirikiri ikoli ḅie ini ori ọkịḅomẹ. Ori ọgụrẹ ma sẹịn sin sosịkị, ori oria ḅụchụayema ḍinmamẹ, se nwẹngị amanyanaḅọ ḅe tọrọkọ mun mẹ. 15Amanyanaḅọ ḅe nwọse ò ḅẹmẹ, “À ḍawọmẹ, ineda àrị fieye pu finjiḅọ ofori-ẹ. Ini ḍuko ị̀ pịrịmẹ na ị́ ineda ḍawọ ma fieye pu finjiḅịa.”
16Josẹf ḅe nwọ pẹkẹrẹmẹ, “Àrị ineda ẹkẹ, Amanyanaḅọ, ọkụma Tamụnọ ḅe mị anị fieye mị ḍukopakụmaḅịaye-ẹ.”
17Amanyanaḅọ ḅe nwọ ḅẹmẹ, “À ḍawọmẹ na Naịl Tọrụ mị aka à chịẹarịogbo, 18sọnọma ḅẹlẹkị chụa pịkị mọnịmọnị nambulo tọrụ mị ḅie pakaḅo anịanga sime osueinma fịaḅẹ. 19Anịsịkị jịn sọnọma nambulo, nyọnị pịkị ikpoki chụa aye pịkị pakaḅomẹ. Àrị si ọkụ si nambulo jenejene Ijipt ḅie ma ọrịkẹ. 20Nyọnị nambuloma ḅẹlẹkị chụa nambuloma pẹịmẹ, 21gbọrịḅọ sọ nemi ẹkẹ àrị nwọ simeye pẹị so ọkụ, anịatịḅị àrị sime si gbọrị ḅaraḅụ mị àrị pa omi-ẹ. Ọḅụkọ mị à boma sịsẹye-ẹ. 22À pịkị ḍawọmẹ na sọnọma iḅiọkụ chụa pụn ịpịamgba chịn à nwọ ọrịmẹ, gbọrị ịkpangị ḅụ anị arịmgba chụaye-ẹ. 23Anịsịkị jịn nyọnị fịoro-fịoro, onwun ele ḅie fọrụ mị samịnamasa ịpịamgba sọnọma chịn pịkị pakaḅomẹ, 24se pakaḅo ḅein chịnma mịnị ọkịye-ẹ. À ḍawọ mị ḍuko ḅịrịapụma pịrịmẹ, ọkụma inia ḅie gbọrịḅọ sọ ineda àrị pu finji ị̀ pịrịkẹ.”
25Josẹf ḅe nwọse amanyanaḅọ ḅe ḅẹmẹ, “Mama ḍawọ ma gbọrịye mị àrị fieye-ẹ; Tamụnọ Ḅe ọ̀ mịẹḅịaye ọ̀ nwọ ḍuko ị́ pịrịsam. 26Sọnọma ḅẹlẹkị chụa nambuloma anị sọnọma kụra-ẹ, pịkị sọnọma chụa pụn ịpịamgba chịnma anị pịkị sọnọma kụra-ẹ; arịmgba gbọrịye mị àrị fiearịye-ẹ. 27Ọḅụkọ pakaḅo sọnọma alị pịkị nyọnị nambuloma, pịkị eleogbo fọrụ mị ofuro samịnama fịoro-fịoro ịpịamgba sọnọma chịnma, anị fịye kụrọḅịa sọnọma kụra-ẹ. 28À pa ḍuko ị́ pịrịsa gbọrị ḅaramị-ẹ, Tamụnọ Ḅe ọ̀ mịẹḅịaye mị ọ̀ nwọse ị́ ḍiesam. 29Sọnọma kụra na gbasịye opu lọkọlọkọ Ijipt ama mị ḅie mgba simeḅịa. 30Ma kụra ma ḅọrọ sịkị, ḅuruḅaa sọnọma kụra ḅoḅịa se iḅi-a kụra mamgba ó se ḅieḅaramaḅịa, anịatịḅị ḅuruḅaa mị sẹ mị gulugulumaḅịa. 31Lọkọlọkọ sọnọma kụra ma ini okorona okorona nwọse ḅieḅaramaḅịa, anịatịḅị anịa ọḅụju ḅoḅịa ḅuruḅaa mị opuma ḅalafamaḅịa. 32Ị́ pịkị kpoto kọn àrị gbọrị ḍawọ mị fiemẹ na Tamụnọ Ḅe mị anị tọnye-ẹ, ọ̀ mịẹse anị ḅọlọka sịkị kiri ọkịḅịa.
33“Mịọkụ yenemi pịkị tọrụkweinḅọ nwọ sẹlẹ, se sẹ mị ḅie tịḅịdaḅọ mị-ẹ. 34Ị́ pịkị jịn fịrịnwẹngịapụ tọnḅịa, ḅoḅịa lọkọlọkọ sọnọma kụra ma ḅie fịye ma se sọnọ-a kiri ḍie, se arịa ḅụ gbọrị kiri koko wẹrịḅịa apụ. 35Tọn ini pịrị na fịye ḅo àrị kụra ma ḅie pakaḅoḅịa fịaye mamgba ini nwọ koḅiri, àrị se opuamama ḅie wẹrị, se nweni tọn àrị ḍikiḍiki. 36Ma sọnọma kụra ma ḅie kokoḅịa fịayema, anị ḅụ ọbị ḅaraḅụ sẹ mị se ḅụ wẹrịmaḅịaye-ẹ, sọnọma kụra ḅuruḅaa mị ḅo Ijipt laḅịa sịkị. Mị ḅaraḅụ nweni ḅarị fịye ḅụḅalaḅala nyana ẹkẹ.”
Ini Josẹf Ḅe Se Gọvịna Mịẹmẹ Ijipt Ḅie
37Amanyanaḅọ ḅe na oria fịrịnwẹngịapụma na mị tọnsaye mị mịẹkụrọmamẹ, 38ọ̀ pịkị nwọse ini ḅẹmẹ, “Wa ngịsị iḅi Josẹf ḅe nẹngịḅọ nwọ nyana ẹkẹ, ori anị sosikima ḍiepịrịye nyanaḅọ-ẹ Tamụnọ Ḅe ḅaraḅụ.” 39Amanyanaḅọ ḅe nwọse Josẹf ḅe ḅẹmẹ, “Tamụnọ Ḅe maye mamgba se ị́ ḍiesam, anịẹrẹchị ị́rị́ mị nemi nyanatẹịn pịkị anị mịẹḅịa ọkụ nemi nwenimgba nẹngịmẹ. 40Àrị ị́ se ị̀ya sẹ mị ḅie tịḅịnịḅọ mịẹḅịa se ị̀ya tomoni mamgba ini ị́ tọnye layelaye nwọ mịẹḅịa. Ị́rị́ anị ḅẹrẹtọn kiri ḅụ ị̀ palịḅịaye-ẹ. 41Mịọkụ àrị ị́ tọnmẹ ị́ Ijipt mgba ḅie Gọvịna nwọ sọ-ẹ.” 42Amanyanaḅọ ḅe ọ̀ ḅara tụmgbalị sime, ini amanyana kụrọ mị anịa tọrụogbo nwọ gịẹịn iringi mị sin Josẹf ḅe ḅara tụmgbalị chụamẹ. Ori iḅi lọkọ koro opu ḅụchụaye nwọse ọ̀ chụamẹ, pịkị goli goli pụkọchụaye nwọse ọ̀ kọngọ chụamẹ. 43Amanyanaḅọ ḅe maịn karama kporokporo mị nwọse ọ̀ pịrịmẹ, ò se nwẹngị, anịsịkị ori amanyanaḅọ ḅe osiḅụ sime tomoniogbo mị ọ̀ tọrọkọ ịsụn se olokuaḅẹ, “Ateli ḅelema! Ateli ḅelema!” Mị ini Josẹf ḅe se Ijipt gọvịna nwọ mịẹ ọkụ-ẹ. 44Amanyanaḅọ ḅe nwọse ọ̀ ḅẹmẹ, “Ị̀rị̀ amanyanaḅọ ḅe-ẹ—gbọrịḅọ sọ ofori-ẹ Ijipt ḅie mgba pa ḅara anịkanịka ḅụọ deki chịẹmaḅịaḅọ ị́rị́ kụrọ pịrịka simeogbo.” 45-46Anị ò ḅo oria ẹrẹ mị pịkị, Ijipt ḅịpị ḅụ nwọse ọ̀ chịnmẹ, Zafẹnat Pania, se Pọtifẹra, Heliopolịs opuama orualaḅọ ḅe ḅarọ Asẹnat ma amanyanaḅọ ḅe nwọse ọ̀ pịrịmẹ, ori á sime.
Josẹf ḅe kụra soi ọ̀ nwọ lase ọ̀ sakị fịrịnwẹngị Ijipt amanyanaḅọ ḅe pịrịmẹ. Ori amanyanaḅọ odo mị wẹrịso se nwẹngị Ijipt mgba kelemamẹ. 47Lọkọlọkọ sọnọma kụra ma ḅie, kiri mị ḅakama chịnmgbọlụ pakụmamẹ, 48arịmgba Josẹf ḅe ò kolokolo opuamama ḅie fịaye wẹrị warịma ḅie kokomẹ. Opuama layelaye anị na kpeki nyọ ḅụ pakaḅo fịayema ọ̀ nwọse anịa ḅie kokomẹ. 49Ịpịamgba ma ḅaka so ọkụma Josẹf ḅe ọ̀ ḅarị yetọnye se àrị tọnkẹ—tọrụ aka ḅụ sime onwun ḅaka ọkụ anị àrị ḅaka ọkụ-ẹ.
50Ḅuruḅa kụra ma ma ḅo laka simeogbo Josẹf ḅe Asẹnat ma ḅụlọ mama owuapụ awọ ọ̀ nwọ yimẹ. 51Ọ̀ nwọ ḅẹmẹ, “Tamụnọ Ḅe ị̀ mịẹsam àrị ị̀ya ḅụfụka ma na, ị̀ ḍa furo na se ḅieḅaramasam;” anịgose ọ̀ nwọse oria tarị owutọkụ ḅe chịnmẹ Manasẹ. 52Ọ̀ pịkị nwọ ḅẹmẹ, “Tamụnọ Ḅe à tọrụsiọrịarị ama ḅie ori awọ se ị̀ pịrịsam,” anịgose ọ̀ nwọse oria maịn karama tọkụ ḅe chịnmẹ Ifrem.
53Ijipt ama mị ḅie fịaye ḅaka se inia tọrụḅẹlẹ sọnọma kụra ma ḅo kulumamẹ, 54se ḅuruḅaa sọnọma kụra ma sakịmẹ, Josẹf ḅe ḍukosa ḅaraḅụ. Ḅuruḅa mị jịn sẹ mamgba lamẹ. Ọkụma Ijipt mgba ḅie fịaye omi-ẹ. 55Fịye ḅo Ijipt apụma tarị sịkị, ini owu amanyanaḅọ ḅe pịrịmẹ. Anị ori ini se Josẹf ḅe fịrịmaye-ẹ, na ò ḍuko ini pịrịye ini nwọ mị-ẹ. 56Ḅuruḅa mị anị sitẹịn pịkị wasama bebe sẹ mị mgba kelemamẹ, anịgose Josẹf ḅe, ọ̀ sakị fịaye koko warị mamgba finji se ịpịamgba se Ijipt apụma dẹrịmẹ. 57Tomonikiri mị mgba kelema, tomoni Ijipt ḅo Josẹf ḅe ḅara ịpịamgba fẹfẹmẹ. Anịatịḅị ḅuruḅaa mị, anị kụrọ nyọ mamgba kelemamẹ.
Okuqokiwe okwamanje:
Chukusakị 41: OBTP
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
The Bible Society of Nigeria