Chukusakị 40
40
Josẹf Ḅe Ikoliapụ Ma Ḍawọ Ma Pumẹ
1Sịkị ḅo ḅọrọ sịkị Ijipt amanyanaḅọ ḅe, iru chụa ọ̀ pịrịpịrịḅọ ḅe na oria fịturu fọịfọị apụma ḅie tịḅịnịḅọ ḅe na, amanyanaḅọ ḅe ịganịmaye mịẹmẹ. 2Ini mama fịrịnwẹngịapụma ori ịganị nyana ini pịrịmẹ gose 3ori ini se oria warị koruapụma tịḅịnịḅọ ḅe ikoliwarị ḅie chumẹ, anị gbọrị nyọ anị ini Josẹf ḅe se koroma nyọ mị-ẹ. 4Ini ikoliwarị ḅie sime ḅọlọ sịkị lamẹ, se nyọ ḍikiḍikiapụ ma ḅụ tịḅịnịḅọ ḅe Josẹf ḅe tọnmẹ ori inia fịrịnwẹngịḅọ sọ.
5Gbọrị ḍin, ikoliwarị ḅie iru-chụachụaḅọ ḅe na pịkị fịturu fọịfọị apụma ḅie tịḅịnịḅọ ḅe na ini ḍawọmẹ, inia ḍawọ ma kịrịkịrịye nwọ fiemẹ. 6Josẹf ḅe ḅo dede ḅie ini lasịkị ori ini ọrịmẹ na inia tọrụ ḅẹlẹkẹ. 7Ori ini gbelamẹ, “Cheye gose mịmgba ọ́mịna tọrụ ḅẹlẹka?”
8Ini nwọ pẹkẹrẹmẹ, “Mịnaḅụ, ḅọḅọ ḍawọmẹ, mịanga ḍawọ ma fieye pu wa pịrịḅịa ḅọ ofori-ẹ.”
“Tamụnọ Ḅe anị ḍawọ fieye pu finji kụrọ mị pịrịpịrịye-ẹ.” Josẹf ḅe ọkọ ḅẹmẹ, “Ọ́mịna ḍawọ ma ọ́ nwọ ḍuko ị̀ pịrị.”
9Anịgose iru-chụaḅọ ḅe nwọ ḅẹmẹ, “Ḍawọju tụmgbakị elelenda se mịẹ iru eje ị̀ tọrọkọ simemẹ 10tẹrẹ-a chịn ịkpangị anịa ọgọnọ omi-ẹ. Arịa ịnyanya ma ḅịpị toluma kirikiri, arịa ngwengwe ma pakaḅomẹ, tụmgbakị elelenda ma pịkị kirikiri ḅịamẹ. 11Anịsịkị amanyanaḅọ ḅe ọmọngọ à nwọ ọlọ waraḅẹ; se à tụmgbakị elelenda ma ọkị àrị pọnjị ọmọngọ mị ḅie chụa se anị se ọ̀ pịrịmẹ.”
12Josẹf ḅe nwọ ḅẹmẹ, “Mị anị fieye mị-ẹ: tẹrẹ-a ịkpangị ma anị tẹrẹ-a ḍin-ẹ. 13Tẹrẹ-a ḍin ḅo laḅịa sịkị amanyanaḅọ ḅe ori ị́ sin pakụmase, siḅụ ḅarasin ị́ pịrịḅịa, ọ̀ pịkị ị́ se ị́ya fịrịnwẹngị kiri koromaḅịa. Ị́ iru chụachụa sịkị ị́ ọmọngọ mị se ọ̀ pịrịpịrị ọkụ ị́ pịkị nwọse ọ̀ pịrịḅịa. 14Ọkụma ị̀ se ḅiekoroma ye ị́rị́ na deinkoroḅịa sịkị, pịkị iḅimịẹ ḅaraḅụ ị̀ ḅụye ḍuko amanyanaḅọ ḅe pịrị, se ḅarachụa ị̀ pịrị à mị ikoli mị ḅie pakaḅo. 15Arịmgba tangboloma, Hibru ama ḅie ini ị̀ furuḅomẹ, pịkị mị Ijipt ḅie sọ, ikoli sọ gbẹịn sima à nwọ mịẹkẹ.”
16Fịturu fọịḅọ ḅe ḅo ọrịmẹ na iru chụaḅọ ḅe kọn ḍawọ mị iḅiye fiemẹ nwọ ḅẹye gose, ọ̀ nwọse Josẹf ḅe ḅẹmẹ, “Ị̀rị̀sọ à gbọrị ḍawọ kọnmẹ; fịturu tẹrẹ-a kana ị̀ tịḅị à nwọ pụra mẹ. 17Ọgọnọ da kana mị ḅie, se amanyanaḅọ ḅe pịrịḅịa gbẹkẹnịsa tọrụ kịrịkịrị fịaye omi-ẹ, anịsịkị feni àrị gbọgbọ fịaḅẹ.”
18Josẹf ḅe pẹkẹrẹmẹ, “Mị anị fiearịye-ẹ: tẹrẹ-a kana ma anị tẹrẹ-a ḍin-ẹ. 19Tẹrẹ-a ḍin laḅịa sịkị amanyanaḅọ ḅe ori ị́ sin pakụmaḅịa—se ini ị́ tịḅị pẹlẹsinḅịa! Anịsịkị ori ị́ya ḍụẹịn mị se chịnḅụ sololo se, fenima ḅo ị́ya oju mịnị mị gbọgbọ pẹịḅịa.”
20Ḅo tẹrẹ-a ḍin lasịkị amanyanaḅọ ḅe oria yi ene alalị fịaye ọ̀ nwọ chụọ oria fịrịnwẹngịapụ mamgba pịrịmẹ; iru chụachụaḅọ ḅe na fịturu fọịfọị apụ tịḅịnịḅọ ḅe na, ori ini sin pakụma oria fịrịnwẹngịapụma tọrọkọ ḅomẹ. 21Iru chụachụaḅọ ḅe ọ̀ tatarị nwẹngị sime fịrị mị ọ̀ pịkị se ọ̀ pịrịmẹ, 22ọkụma fịturu fọịfọị apụ tịḅịnịḅọ ḅe, ọ̀ tịḅị ọ̀ pẹlẹsinmẹ. Arịmgba Josẹf ḅe ḍuko ọkụ anị anị paka ọkụ-ẹ. 23Ọkụma iru chụachụaḅọ ḅe, ọ̀ ḅarị Josẹf ḅe koroma kọnkẹ—ọ̀ gbọtụma Josẹf ḅe na kpakịma yegoyegoye se ḅieḅaramamẹ.
Okuqokiwe okwamanje:
Chukusakị 40: OBTP
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
The Bible Society of Nigeria