Teḛ-Raga 10:13-14

Moyis ula kag-tɔs ləa ndiŋ dɔ ɓee gə́ Ejiptə’g, mee ndəa’g neelé Njesigənea̰ ar lel ḭ bər ula dɔ ɓee gə́ Ejiptə’g dan kàrá gə loondul’g tɔ. Loo gə́ loo àr ndá lel gə́ ḭ bər lé ree gə beedéje. Beedéje lé teḛ mee ɓee gə́ Ejiptə’g tɔɓəi d’wa naŋg gə looje lai-lai mee ɓee gə́ Ejiptə’g lé tɔ, deḛ bula digi-digi dum dɔ loo tɔ, to né gə́ dəw oo togə́bè kédé el ləm, a koo garee gə́ togə́bè gogo el ləm tɔ.