लूका 5
5
यीसु रा पैला चेला
(मती 4:18–22; मरकुस 1:16–20)
1 #
मत 13:1,2; मरकु 3:9,10; 4:1 एक बार यीसु गनैसरत री झील रै किनारै माथै ऊभा हा, तो भीड़ उणनै परमेसर रा वचन सुणणै वास्तै घेर लियौ। 2उण वगत उणै झील रै किनारै माथै दो नावो लागोड़ी देखी, अर मछुआरा उण नावो माथै ऊं उतरनै जाळ धोवता हा। 3उणमे ऊं एक नाव जिकौ समौन रौ हो, यीसु उण माथै चढ़नै समौन ऊं कयौ, “नाव नै किनारै ऊं थोड़ोक आगौ ले ले।” पछै वो नाव माथै बैठ नै लोगां नै उपदेस देवण लागौ।
4उपदेस देवण रै पछै यीसु समौन ऊं कयौ, “नाव नै गेरा पांणी मे ले चाल, अर मछलियो पकड़नै रै वास्तै आपरा जाळ नोखो।”
5 #
यूह 21:3
तो समौन यीसु ऊं कयौ, “हे मालिक, म्हैं पूरी रात मेनत करी अर कीं हाथ नीं आयौ, तौभी थौरे कैणै ऊं जाळ नोखो हो।”
6 #
यूह 21:6
जद वे जाळ नोख्यौ, तो घणी हारी मछलियो जाळ मे फंसगी अर उणरा भार ऊं जाळ फाटनै लागौ। 7ओ देखनै वे आपरा दूजा साथवाळौ नै हेलौ करनै बुलाया जिकौ दूजा नाव माथै हा, ताकी वे इणौरी मदद कर सकै। वे आयनै दोनूं नावो नै मछलियो ऊं इती भर दी, की दोनूं नावो डूबणै लागी।
8ओ देखनै समौन पतरस यीसु रै पगां मे पड़ियौ अर कयौ, “हे परभु, म्हारै खनै ऊं जाता रौ, म्हैं थौरी बातां माथै विसवास कोनीं करयौ। क्यूंकै म्हैं पापी मिनख हूं।” 9समौन अर उणरै साथवाळा इती मछलिया पकड़नै रै कारण घणा इचरज मे हा। 10इण तरैह जबदी रा बेटा याकूब अर यूहन्ना नै भी अचूम्बो होयौ, जिकौ समौन रौ साथी हो।
यीसु समौन ऊं कयौ, “डर मत, अबै ऊं थूं लोगां नै परमेसर रा राज रै वास्तै पकड़ेला।” 11अर वे नावो नै किनारै माथै ले आया अर सगळी चीजों छोड़नै यीसु रै लारै चाल दिया।
यीसु कोढ़ी नै सावळ करयौ
(मती 8:1–4; मरकुस 1:40–45)
12एक बार यीसु एक नगर मे हा, उठै कोढ़ होयोड़ो एक मिनख हो, जद उणै यीसु नै देख्यौ तो गोडा टेकनै परणाम करनै उण ऊं पराथना की, “हे परभु, जे थूं चावै तो म्हनै कोढ़ ऊं सावळ कर सकै है।”
13तो यीसु आगै बढ़नै उणरै हाथ लगायो अर कयौ, “म्हैं चावूं हूं, की थूं कोढ़ ऊं ठीक हो जा।” अर तुरत वो सावळ हो गियो। 14पछै यीसु उणनै सावचेत करयौ, “किणनै ही मत कहीजै, पण जायनै अपणै आप नै याजक नै दिखा अर कोढ़ झड़नै रै बारै मे जिकौ कीं मूसा चढ़ावौ तैय करयौ है उणनै चढ़ा, ताकी उणरै वास्तै भी एक गवाई बणै।” 15पण आ बात ओर फैलती गी अर भीड़ री भीड़ यीसु रा उपदेस सुणणै अर बिमारियों ऊं सावळ होणै रै वास्तै भेळी होई। 16पण यीसु रिंदरोही मे न्यारा जायनै पराथना करता हा।
यीसु लकवे रै बिमार नै सावळ करयौ
(मती 9:1–8; मरकुस 2:1–12)
17एक दिन यीसु उपदेस देता हा अर फरीसी अर यहूदी धरम सास्तरी भी उठै बैठा हा। जिकौ गलील अर यहूदिया रै हरैक नगर ऊं, अर यरुसलेम ऊं आया हा। परभु री सगति बिमारों नै सावळ करनै यीसु रै साथै ही। 18उण वगत कीं लोग एक लकवो होयोड़े मिनख नै खाट माथै लाया। अर वे लोग उणनै यीसु रै सांमै राखणै रौ उपाय ढ़ूंढ़ता हा। 19क्यूंकै भीड़ रै खातर उणनै मांय ले जावणै रौ रासतो नीं मिळयो। तो वे घर रै माथै चढ़गा अर छपरा नै उधेड़ दियौ। लकवा रा बिमार नै खाट समेत सगळौ रै बीच मे यीसु रै सांमै उतार दियौ।
20यीसु उण लोगां रै विसवास नै देखनै बिमार ऊं कयौ, “हे दोसत, थारा पाप माफ होया।”
21इतौ कैवता ही सास्तरी अर फरीसी आपस मे कैवण लागा, “ओ कुण है जिकौ परमेसर री निंदा करै है? परमेसर नै छोड़नै कोई भी पाप माफ नीं कर सकै है।”
22यीसु उणौरै मन री बातां जांण नै उणौ ऊं कयौ, “थै थौरे मन मे ऐड़ौ क्यूं सोचो हो? 23आसान कांई है? कांई ओ कैवणौ, ‘थारा पाप माफ होया’ या ओ कैवणौ की ‘उठ अर चाल फिर’? 24म्हैं थांनै बताऊं हूं, थै जांण लौ के, म्हैं, मिनख रा बेटा नै, धरती माथै पाप माफ करणै रौ भी अधिकार है।” पछै यीसु उण लकवा होयोड़े मिनख नै कयौ, “म्हैं थारै ऊं कैवूं हूं, उठ अर थारी खाट उठान थारै घर जातौ रै।” 25वो तुरत उण सगळौ रै सांमै ऊं उठयौ अर जिण खटिया माथै पड़ियौ हो उणनै उठायनै, परमेसर री सौभा करतौ होयौ आपरै घर जातौ रियौ। 26तो उठै सगळा अचूम्बे मे पड़गा अर परमेसर री सौभा करनै लागा। वे घणा डर रै साथै कैवण लागा की, “आज म्हैं घणी अनोखी बातां देखी है।”
यीसु चुंगी लेवण वाळा लेवी नै बुलाया
(मती 9:9–13; मरकुस 2:13–17)
27इणरै पछै यीसु बारै गिया अर लेवी नाम रा चुंगी लेवण वाळा नै चुंगी चौकी माथै बैठौ देख्यौ। अर उणनै कयौ, “म्हारै लारै चाल दे।” 28तो वो ऊभौ होयौ अर सगळौ कीं छोड़नै यीसु रै साथै चाल दियौ।
29पछै लेवी आपरा घर मे यीसु वास्तै एक मोटो खाणौ राख्यौ जिणमे वो घणा ही चुंगी लेवणवाळा अर दूजै लोगां नै मेमाण बुलाया। 30#लूक 15:1,2तद फरीसी अर उणौरा सास्तरी जिकौ उठै हा वे यीसु रै चेलौ ऊं कैवण लागा की, “थै चुंगी लेवणवाळा अर दूजै पापियो रै साथै क्यूं खाओ-पीओ हो?”
31यीसु उणौनै जबाब दियौ, “वैद री जरुरत चंगा लोगां नै कोनीं रै, पण बिमारों नै रैवै है। 32म्हैं धरमियो नै नीं, पण पापियो नै पाप ऊं मन फिराणै वास्तै बुलाणै आयौ हूं।”
उपवास रै बारै मे यीसु रा विचार
(मती 9:14–17; मरकुस 2:18–22)
33कीं लोग यीसु ऊं कयौ के, “यूहन्ना रा चेला तो बराबर उपवास राखै अर पराथना करै है। अर इण तरैह फरीसियों रा चेला भी करै है। पण थारा चेला तो हर वगत खाता पीता रैवै है।”
34यीसु जबाब दियौ, “जद तांई बींद जांनियां रै साथै है, कांई वे उपवास कर सकै? ऐड़ौ कदैई नीं होवै। जद तांई बींद उणौरै साथै है, वे उपवास नीं करैला। 35पण वे दिन आवैला जद बींद जांनियां ऊं न्यारौ कियो जावैला, उण वगत वे उपवास करैला।”
36अर यीसु उणौनै वळै दिस्टांतो मे कयौ, “कोई भी मिनख नवा कपड़ा नै फाड़नै उणरी कारी पुराणा कपड़ा माथै नीं लगावै। इण ऊं नवो कपड़ो भी फाट जावैला अर वा नवा कपड़ा री कारी पुराणा ऊं मेळ भी नीं खावैला। 37इण तरैह नवो अंगूर रस पुराणी मसको में नीं भरे, इण ऊं नवो अंगूर रस पुराणी मसको नै फाड़नै ढ़ूळ जावैला, अर मसको भी नास हो जावैला। 38पण नवो अंगूर रस नवी मसको मे भरणौ चाहीजै। 39कोई मिनख पुराणौ अंगूर रस पीयनै नवो नीं मांगे क्यूंकै वो कैवै है, ‘पुराणौ ही चौखौ है।’ ”
© NLCI CC BY-NC-ND 4.0