Ma-thi-ơ 22
22
Arkatê ka đam likhah
(Lu-ka 14:15-24)
1Pô Yê-su gilaic angui arkatê bican thong khol nhu: 2“Dit Biya Thôr Riga drơh yau tha pakat patao dêh radak đam likhah ka anưk drei. 3Patao pachai halun nao mưdơh dôm urang bihu daa mưrai tamưbha đam likhah, min khol nhu ôh mai. 4Patao gilaic pachai halun pakan thong kakei laic: ‘Xang đôm thong dôm urang bihu daa laic: Dêh, kaya ƀang krung hu thrap gap bloh, limo thong dôm athur limưk krung hu ngak rilo pajơ, rim paka krung hu thudia. Xang mưrai tamưbha đam likhah.’ 5Min khol nhu ôh angat haget tal panôic daa: kưk klāk nao, mưnuix nao hamu, ra nao pablei talei, 6dok dôm urang pakan yơ mưk dôm halun patao dok dang jhak, bloh pamưtai. 7Patao dangih pachai bôl bala thubang dôm ra pamưtai mưnuix nan thong cuh dhan khol nhu. 8Hadei di nan, patao đôm thong dôm halun: ‘Đam likhah krung hu thudia min dôm urang bihu daa ôh thei lek thamgôn. 9Kaywa yau nan, xang tabiak nao abih jalan riya, gōk pathar pathar urang halei, xang daa mưrai tamưbha đam likhah.’ 10Dôm halun nao graup dôm canah jalan patom abih dôm urang halei khol nhu gōk, ôh krưn siam, jhak. Ywa nan, kati likhah bak tôi daa. 11Min tuk patao tamư iơk dôm tôi, ƀôh tha urang ôh cuk angui tui đam likhah, 12yơ đôm thong urang nan laic: ‘Mưni ayut, ngak habar ayut tamư pak ni bihu bloh ôh cuk angui tui đam likhah?’ Urang nan gađang dhit. 13#Mat 8:12; Mat 25:30; Lu 13:28.Patao pađar dôm halun: ‘Xang girak tangin takai nhu vơk thong parah tabiak libik xup palup gah lingiu, nạn libik mưca hu hia cok thong grik tagei.’ 14Kaywa ralô urang bihu iêu min takik urang bihu rwah.”
Masalah hakak jiư ka Sê-sa
(Mag 12:13-17; Lu-ka 20:20-26)
15Kal nan, dôm urang Pha-ri-si tabiak nao, xin biai anngak piêh pađik ge di Pô Yê-su dalam panôic đôm. 16Khol nhu pađar dôm anưk xêh drei mưthong dôm urang tui gah Hê-rôt mưrai pathau thong Pô Yê-su laic: “Pathau Gru, khol dahlak thau Gru nạn mưnuix kahanôt, thong tapi tapak pato jalan ƀāk Pô Lingik, ôh kađa tagrơk thei, kaywa Gru ôh mong di lingiu mưnuix urang. 17Yau nan, likau brei ka khol dahlak thau ganap mong Gru: Bruk hakak jiư ka Sê-sa#22:17 Sê-sa: Sani nạn ngia anưd patao bôl Rô-ma. hu njaup adat halei thoh?” 18Min Pô Yê-su thau anngak khol nhu mưng thuuk laic: “Hơic dôm ra jalan adat baniai, habar khol hư long Ita? 19Xang brei ka Ita iơk tha boh jiên hakak jiư.” Khol nhu ba ka Bhô tha đơ-ni-ê. 20Bhô tanhi: “Thek thong angan thei ngok ni?” 21Khol nhu thuuk: “Anưd Sê-sa.” Bhô bican: “Yau nan xang biyar ka Sê-sa dôm haget anưd Sê-sa, thong xang biyar ka Pô Lingik dôm haget anưd Pô Lingik.” 22Tuk pang panôic nan, khol nhu plơng kadơng thong klāk Bhô bloh nao.
Panôic tanhi ka gruk diup vơk
(Mag 12:18-27; Lu-ka 20:27-40)
23 #
Bruk 23:8. Mưthong harei nan, dôm mưnuix Sa-đu-xê nạn kavôm mưnuix brei laic ôh hu gruk diup vơk, mưrai tom Bhô thong tanhi:#22:23 dôm mưnuix Sa-đu-xê... thong tanhi: Dalam tha thanôn blah vak tangin nạn dôm mưnuix Sa-đu-xê, nạn kavôm mưnuix brei laic ôh hu gruk hadiup vơk, mưrai tom Bhô thong tanhi. 24“Pathau Gru, Mô-se hu đôm: ‘Mưyah tha urang mưtai mai ôh hu anưk, yơ urang adei xang khing xaai thang bilau piêh hu anưk cek pajeh ka xaai drei.’ 25Urak ni, dalam khol dahlak hu tajuh dei ai; urang xaai kacwa khing kamei, bloh mưtai, min kaywa ôh hu anưk yơ cek hadiup vơk ka adei. 26Urang ya dwa, ya klau, ka tal ya tajuh lijang yau nan. 27Taluic, urang kamei lijang mưtai. 28Yau nan, tuk diup vơk, urang kamei ni mưca nạn hadiup thei dalam tajuh urang? Kaywa abih jang krung hu khing kanai.” 29Pô Yê-su thuuk: “Khol hư xwel pajơ, kaywa khol hư gam ôh dul Agal Nưbi gam ôh dul gon xagta Pô Lingik. 30Kaywa tuk diup vơk, mưca mưnuix urang ôh khing kamei lijang ôh khing likei, min drơh yau umat ngok thôr riga rei. 31Dok ka gruk diup vơk anưd ra mưtai, khol hư ô ka pôic Panôic Pô Lingik bican ô: 32‘Ita nạn Pô Lingik Ap-ra-ham, Pô Lingik I-sag, Pô Lingik Ya-kôp’ ô habar? Bhô ôh njaup nạn Pô Lingik ra mưtai, min anưd mưnuix diup.” 33Tuk bôl bhap pang panôic ni, khol nhu biak plơng kadơng ka gruk Bhô pato pakai.
Vahi samkhan yatha
(Mag 12:28-34; Lu-ka 10:25-28)
34Tuk hamit đôm Pô Yê-su krung hu ngak ka vakak Sa-đu-xê xang gađang pabah, yơ dôm urang Pha-ri-si nhom gaup vơk. 35Tha gru adat dalam nhom khol nhu tanhi piêh long Bhô: 36“Pathau Gru, dalam hakum jakar, vahi halei samkhan yatha?” 37Pô Yê-su thuuk: “‘Hư xang bih tian, bih thap xwan, bih mat ar bloh anit ranam Pô nạn Pô Lingik hư.’ 38Sani nạn vahi ya tha thong samkhan hơl di bih. 39Dok vahi ya dwa lijang drơh yau nan: ‘Hư xang anit ranam mưnuix jek taphia yau êng drei.’ 40#Lu 10:25-28.Abih hakum jakar thong panôic hôr jang bha patui di dwa kabha ni.”
Dê Krist thong patao Đa-vit
(Mag 12:35-37; Lu-ka 20:41-44)
41Dalam tuk mưnuix Pha-ri-si nhom gaup vơk, Pô Yê-su tanhi khol nhu laic: 42“Khol hư xanưng habar ka Dê Krist? Bhô nạn Anưk thei?” Khol nhu thuuk: “Anưk patao Đa-vit.” 43Bhô tanhi: “Yau nan ngak habar patao Đa-vit tuk bihu Pô Nưbi Ginrơh padrut gilaic iêu Bhô nạn Pô thong đôm laic:
44‘Pô Yê-hô-va bican thong Pô dahlak:
Xang dok gah hanuk Ita,
Ka tal tuk Ita padok ra thutruh Anưk di ala takai Anưk’?
45Mưyah patao Đa-vit iêu Bhô nạn ‘Pô’ yơ ngak habar Bhô nạn Anưk patao nan bihu?” 46Ôh thei hu mưda thuuk bihu tha panôic, thong lijang mưng harei nan, ôh thei khin tanhi Bhô kabha haget vơk.
© 2024 Bible Society Vietnam. All rights reserved.