ଜହନ 6
6
ଜିସୁ ସେ ହଜାର୍ ଦାଲ୍ଲାନିକି ତିନ୍ବନ୍ ହିଅନ୍
(ମାତିଉ ୧୪:୧୩–୨୧; ମାର୍କ ୬:୩୦–୪୪; ଲୁକ ୯:୧୦–୧୭)
1ଏମ୍ୱାଟି ଜିସୁ ଗାଲିଲି ସାମ୍ନ୍ଦେର୍ ଇଚ୍ଚେସି, ତିବିରିଆ ସାମ୍ନ୍ଦେର୍ତି ରକଟ୍ ୱାଡୁ ହାଚ୍ଚେଞ୍ଜି । 2ଆଟେ ଏୱାଞ୍ଜି ରଗୁଗାଟାର୍ ବାଗା ଇନ୍ନି ଇନ୍ନି ଆକ୍କାବାଡ଼ାଙ୍ଗ୍ତି କାମା କିଚ୍ଚେଞ୍ଜି, ଏୱା ହାବେ ହୁଡ଼ାନ୍ ଏଗେଲ୍ ଦାଲ୍ଲା ତା ବେତଟ୍ ହାଲ୍ବନ୍ ମ୍ରାସ୍ତେରି । 3ଏମ୍ବାଟି ଜିସୁ ହରୁଡ଼ିପେ ହାଜ୍ଜାନ୍ ତା ଗ୍ରାମ୍ୱାଗାଟାର୍ ଡ଼ାହି ଏଦିମ୍ୱା କକ୍ତେଞ୍ଜି । 4ଏଚିତୁକାତାୱା ଜିହୁଦି ଦାଲ୍ଲାତି ନିସ୍ତାର ରେହାଙ୍ଗ୍ତି ଦିନା ଟାକ୍କେ ମାଚ୍ଚେ । 5ଆଟେ ଜିସୁ ଏଗେଲ୍ ଦାଲ୍ଲାନିକି ତା ଟାକ୍କେ ୱାଅନ୍ତାଆ ହୁଡ଼ାନ୍ ପିଲିପନିକି ୱେସ୍ତେଞ୍ଜି, “ଇୱାର୍ତି ତିନ୍ବନ୍ ବାଗା ମାରୁ ଇମ୍ୱିନାୱାଟି ରୁଟିଙ୍ଗ୍ କଡ୍ଡିନା ?” 6ମତ୍ର ଏୱାଞ୍ଜି ତାଙ୍ଗେ ପରିକ୍ୟା କିଅନ୍ ବାଗାଟି ଇଦା ୱେସ୍ତେଞ୍ଜି, ଇନାକି ଏୱାଞ୍ଜି ଇନ୍ନା କିଅନ୍ ବାଗା ହାଜ୍ଜିନ୍ନେଞ୍ଜି, ଏଦା ଏୱାଞ୍ଜି ତାନୁ ପୁଞ୍ଜାଚ୍ଚେଞ୍ଜି ।
7ପିଲିପ ଜିସୁନିକି ୱେସ୍ତେଞ୍ଜି, “ହାବେତାରିନିକି ହିତେ ହିତେ ରୁଟି ଏପନ୍ ବାଗା ଦାସା କୁଡ଼ି ରୁପା ଟାକ୍କାଙ୍ଗ୍ତି ରୁଟିଙ୍ଗ୍ କଡ୍ଡିତେସି ୱାଡ଼େ ଏୱାରିକି ଏଃଅ ।” 8ସିମନ ପିତରତି ଆମ୍ୱେସ୍ ଆନ୍ଦ୍ରିୟ ପାରୁଟି ତା ଗ୍ରାମ୍ୱାଗାଟାର୍ ତାୱାଟି ରଃଅଞ୍ଜି ତାଙ୍ଗେ ୱେସ୍ତେଞ୍ଜି, 9“ଇଦିମ୍ୱା ରଃଅଞ୍ଜି ବଦାସ୍ ମାନ୍ନେଞ୍ଜି, ଏୱାଞ୍ଜ୍ ପାଟ୍ଟି ୱାର୍ରି ସେଙ୍ଗି ରୁଟିଙ୍ଗ୍ ଅଟେ ରିଣ୍ଡି ୱାହାନ୍ନି ମିନ୍ଙ୍ଗା ମାନ୍ନୁ, ମତ୍ର ଇଚେ ଦାଲ୍ଲା ବାଗା ଏୱା ଇନ୍ନା ଆନୁ ?” 10ଜିସୁ ୱେସ୍ତେଞ୍ଜି, “ଦାଲ୍ଲାନିକି କକ୍କି କିଦୁ ।” ଏ ଗର୍ରିତାୱା ଏଗେଲ୍ ହଲା ମାଚ୍ଚେ, ଏଦାକି ଦାଲ୍ଲା କକ୍ତେରି ଆଟେ ଏମ୍ବା ୱାର୍ରି ମ୍ଡେହେଙ୍ଗ୍ ବାଇକ୍ ସେ ହଜାର୍ ମାଚ୍ଚେରି । 11ଏମ୍ବାଟି ଜିସୁ ଏ ରୁଟିଙ୍ଗ୍ ଅଆନ୍ ଦନ୍ୟବାଦ ହିଆନ୍, ତା ଗ୍ରାମ୍ବାଗାଟାରି ତାୱାଟି କକ୍ଚାଚ୍ଚି ଦାଲ୍ଲାନିକି ପାହାହିତେରି, ଏଚିଡେହେଙ୍ଗ୍ ୱାହାନ୍ନି ମିନ୍ଙ୍ଗା ୱାଡ଼େ ପାହାହିତେରି, ଦାଲ୍ଲା ଏଚ୍ଚେ ମନ କିତେରି, ଏଚେ ହିତେରି । 12ଆଟେ ଦାଲ୍ଲା କ୍ଡିପନେଃଏ, ଏୱାଞ୍ଜି ତା ଗ୍ରାମ୍ୱାଗାଟାରିକି ୱେସ୍ତେଞ୍ଜି “ଇନିସ୍କି ହିତେ ୱାଡ଼େ ନାହେଡ୍ ଆଃଅ, ଏଦାବାଗା ହାରାନ୍ନି ରୁଟି କାଣ୍ଡାଙ୍ଗ୍ ହାବେ ରପାଟ୍ଟେ ଉହି କିଦୁ ।” 13ଏମ୍ବାଟି ଏୱାରି ଏୱା ହାବେ ରପାଟ୍ଟେ ଉହି କିତେରି, ଆଟେ ଦାଲ୍ଲା ତିଚ୍ଚାୱିଃଆଟି ଏ ସେଙ୍ଗା ରୁଟିଙ୍ଗ୍ ତାୱାଟି ଇମ୍ୱିନ୍ ରୁଟି କାଣ୍ଡାଙ୍ଗ୍ ହାବେ ହାରାଚ୍ଚୁ, ଏମ୍ବା ଏୱାରି ବାରା ହୁନ୍ଦା ନେସ୍ତେରି ।
14ଏଦାକି ଦାଲ୍ଲା ତା କିଆନ୍ନି ଆକ୍କାବାଡ଼ାଙ୍ଗ୍ତି କାମା ହୁଡ଼ାନ୍ ୱେସ୍ପନ୍ ମ୍ରାସ୍ତେରି, “ପୁର୍ତିତାୱା ଇମ୍ୱିନ୍ ବାବବାଦି ୱାଅନ୍ ମାଚ୍ଚେଞ୍ଜି, ଏୱାଞ୍ଜି ନିଜ୍ଜାନେଃଏ ଇୱାଞ୍ଜି ।” 15ଏମ୍ବାଟି ଏୱାରି ୱାନ୍ ରାଜେଞ୍ଜି କିଅନ୍ ବାଗା ବାଦ୍ୟ କିଆନ୍ ତାଙ୍ଗେ ଆହ୍ପନ୍ ବାଗା ସେସ୍ଟା କିଅନ୍ତାଦା ପୁଞ୍ଜାନ୍, ଜିସୁ ରିହିକ୍ ରେମ୍ବାନାହି ରଃଅଞ୍ଜେଃଏ ହରୁଇନ୍ଦା ହାଚ୍ଚେଞ୍ଜି ।
ଜିସୁ ଏଜୁ କୁଃଏଟି ତାକନି
(ମାତିଉ ୧୪:୨୨–୩୩; ମାର୍କ ୬:୪୫–୫୨)
16ମିଡ୍ଡଡ଼୍ ଆଅନେଃଏ ତା ଗ୍ରାମ୍ୱାଗାଟାରି ସାମ୍ନ୍ଦେର୍ଇନ୍ଦା ହାଚ୍ଚେରି । 17ଆଟେ ଡଙ୍ଗାତାୱା ଏଙ୍ଗାନାହି ସାମ୍ନ୍ଦେର୍ତି ଆନେଟ୍ ୱାଡୁ ମାନ୍ନି କପର୍ନାହୁମଇନ୍ଦା ହାଲ୍ବନ୍ ମ୍ରାସ୍ତେରି । ଡାଡ଼ିଙ୍ଗ୍ ଆତେ, ଆଟେ ଜିସୁ ଏଚେ ଟିକ୍ନା ଏୱାର୍ ଟାକ୍କେ ୱାହେଃଲ୍ଲାତେଞ୍ଜି । 18ଏଚିତୁକାତାୱା ଗାପ୍ଚ୍ଚି ୱ୍ଲିକା ଆଇଚ୍ଚି ବାଗାଟି ସାମ୍ନ୍ଦେର୍ତାୱା ଲହଡ଼ା ନିଙ୍ଗେଚ୍ଚେ । 19ଏମ୍ବାଟି ଏୱାରି ବାଇକ୍ ସେ ହାରା କିଲ ମିଟର ଦେହା ହାଜ୍ଜାନ୍ ଜିସୁନିକି ସାମ୍ନ୍ଦେର୍ କୁଃଏଟି ତାକାନ୍ ଡଙ୍ଗାଇନ୍ଦା ୱାଇଚ୍ଚାଦାଃଆ ହୁଡ଼ାନ୍ ଆଜ୍ଜିତେରି । 20ମତ୍ର ଏୱାଞ୍ଜି ଏୱାରିକି ୱେସ୍ତେଞ୍ଜି, “ନାନୁନେଃଏ ଏୱାତାନୁ, ମିରୁ ଆଃଜ୍ଜାଟୁ ।” 21ଏଦାକି ଏୱାରି ତାଙ୍ଗେ ଡଙ୍ଗାତାୱା ଅପନ୍ ବାଗା ଇଚ୍ଚା କିତେରି, ଆଟେ ଏୱାରି ଇମ୍ୱିନ୍ ଗର୍ରିଇନ୍ଦା ହାଜ୍ଜିଚ୍ଚେରି, ଡଙ୍ଗା ଏଚିୱାଡ଼େ ଏ ଗର୍ରିତାୱା ଏତେ ।
ଦାଲ୍ଲା ଜିସୁନିକି ଦାହ୍ପନ୍
22ଏ ୱେଃଇତ୍ ସାମ୍ନ୍ଦେର୍ତି ଆନେଟ୍ ୱାଡୁ ମାଚ୍ଚି ଦାଲ୍ଲା ହୁଡ଼ିତେରି ଜେ, ଏ ଗର୍ରିତାୱା ୱାର୍ରି ରଣ୍ଡି ଡଙ୍ଗା ମାଚ୍ଚେ, ଆଟେ ଏଦିମ୍ୱା ୱାର୍ରି ଗ୍ରାମ୍ୱାଗାଟାର୍ ହାଜ୍ଜାଚ୍ଚେରି, ମତ୍ର ଜିସୁ ଏଦିମ୍ୱା ଏୱାର୍ ଡ଼ାହି ହାଜ୍ଜା ହେଃଲ୍ଲାତେଞ୍ଜି, ଇଦା ଏୱାର୍ ପୁଚ୍ଚେରି । 23ଦାର୍ମୁ ଦନ୍ୟବାଦ ହିତାୱିଃଆଟି ଏୱାରି ଇମ୍ୱିନ୍ ଗର୍ରିତାୱା ରୁଟିଙ୍ଗ୍ ତିଞ୍ଜାଚ୍ଚେରି, ଏ ଗର୍ରିତାୱା ତିବିରିଆତାୱାଟି ଅଟେ ଏଚ୍ଚଡ଼୍ ଡଙ୍ଗାଙ୍ଗ୍ ୱାତୁ; 24ଏମ୍ବାଟି ଜିସୁ ଅଟେ ତା ଗ୍ରାମ୍ୱାଗାଟାର୍ ଜେ ଏଦିମ୍ୱା ହେଃଲ୍ଲେରି, ଇଦା ଏଚ୍ଚିକିଃଆ ଦାଲ୍ଲା ହାବେ ହୁଡ଼ିତେରି, ଏଚିତୁକାତାୱା ଏୱାରି ଏ ହାବେ ଡଙ୍ଗାତାୱା ଏଙ୍ଗାନ୍ ଜିସୁନିକି ଦାହି ଦାହି କପର୍ନାହୁମଇନ୍ଦା ୱାତେରି ।
ଜିସୁନେଃଏ ପରନ୍ ହିଅନ୍ତି ପଡ଼ି
25ଆଟେ ଏୱାରି ସାମ୍ନ୍ଦେର୍ତି ଆନେଟ୍ ୱାଡୁ ଜିସୁନିକି ହୁଡ଼ନ୍ ପାଁଣ୍ଡାନ୍ ତାଙ୍ଗେ ୱେଚ୍ଚେରି, “ଏ ଗ୍ରାପାଗାଟାତି, ନିନୁ ଏଚ୍ଚିକିଃଆ ଇଦିମ୍ୱା ୱାତି ?”
26ଜିସୁ ଏୱାରିକି ୱେସ୍ତେଞ୍ଜି, “ନିଜ୍ଜାନେଃଏ ନାନୁ ମିଙ୍ଗେ ୱେସ୍ପିଞ୍ଜା, ଆକ୍କାବାଡ଼ାଙ୍ଗ୍ତି କାମା ହୁଡ଼ନେଃଏ ଜେ ମିରୁ ନା ବେତଟ୍ ୱାଇଞ୍ଜେରି, ଏଦି ଆଃଏ, ମତ୍ର ରୁଟିଙ୍ଗ୍ ତିଞ୍ଜାନ୍ କ୍ଡିପନେଃଏ ନା ବେତଟ୍ ୱାଇଞ୍ଜେରି । 27ନାହେଡ୍ ଆଅନ୍ତି ତିନ୍ବା ପଡ଼ି ବାଗା କାମା କିଃଆଟୁ । ମତ୍ର ନାହେଡ୍ ଆଃଏଟେଃଏ ଟାକ୍କିଡ଼ହ୍ନା ପରନ୍ ବାଗା ବାସାଆନେ, ଏ ତିନ୍ବା ପଡ଼ି ପାଁନ୍ବନ୍ ବାଗା କାମା କିଦୁ; ଏ ତିନ୍ବା ପଡ଼ି କୁଏଞ୍ଜ୍ ମ୍ରିଃଏଞ୍ଜି ମିଙ୍ଗେ ହିଆନେଞ୍ଜି, ଇନାକି ଆବା ମୁଲାପେନୁ ତାଙ୍ଗେ ଇୱାହାବେ ସିଲ୍ କିଅନ୍ ବାଗା ହକତ୍ ହିଆନ୍ନେଞ୍ଜି ।”
28ଏମ୍ବାଟି ଏୱାରି ତାଙ୍ଗେ ୱେଚ୍ଚେରି, “ମୁଲାପେନୁତି ଇଚ୍ଚା ଡେହେଙ୍ଗ୍ କାମା ହାବେ କିଅନ୍ ବାଗା ମାଙ୍ଗେ ଇନ୍ନା କିଅନ୍ ଆନେ ?”
29ଜିସୁ ଏୱାରିକି ୱେସ୍ତେଞ୍ଜି, “ମୁଲାପେନୁ ଇନ୍ଦାରିକି ପାଣ୍ଡାଞ୍ଜାନେଞ୍ଜି, ତାଙ୍ଗେ ମାଞ୍ଜାଡ଼ି କିଅନ୍ତାଦିନେଃଏ ଆଇନେ ମୁଲାପେନୁତି କାମା ।”
30ଏମ୍ବାଟି ଏୱାରି ତାଙ୍ଗେ ୱେଚ୍ଚେରି, “ଏହେଙ୍ଗ୍ ଆତେସି ନିନୁ ଇମ୍ୱିନ୍ ଆକ୍କାବାଡ଼ାଙ୍ଗ୍ତି କାମା କିଦି ଜେ, ଏଦା ହୁଡ଼ାନ୍ ମାମୁ ନିଙ୍ଗେ ମାଞ୍ଜାଡ଼ି କିଆନାମୁ ? ନିନୁ ଇନ୍ନା କିଅନ୍ ମୁଦି ? 31ମା ଜୁଜୁଆକେଙ୍ଗ୍ ଚିହ୍ପି ଗର୍ରିତାୱା ମାନ୍ନା ତିଞ୍ଜିଚ୍ଚେରି, ଇଞ୍ଜାନ୍ ଇନିସ୍କି ଦର୍ମପୁତିତାୱା ୱ୍ରିଗାଆନ୍ନେ ତିନ୍ବନ୍ ବାଗାଟି ଏୱାଞ୍ଜି ଏୱାରିକି ସର୍ଗଟି ତିନ୍ବା ପଡ଼ି ହିତେଞ୍ଜି ।”
32ଏମ୍ବାଟି ଜିସୁ ଏୱାରିକି ୱେସ୍ତେଞ୍ଜି, “ନିଜ୍ଜାନେଃଏ ନାନୁ ମିଙ୍ଗେ ୱେସ୍ପିଞ୍ଜା ମସା ମିଙ୍ଗେ ସର୍ଗଟି ତିନ୍ବା ହିଆହେଲ୍ଲାଦାଃଏଞ୍ଜି, ମତ୍ର ନା ଆବା ମିଙ୍ଗେ ସର୍ଗଟି ତିନ୍ବା ହିଞ୍ଜାନେଞ୍ଜି । 33ଇନାକି ଇମ୍ୱିନ୍ ତିନ୍ବା ପଡ଼ି ସର୍ଗଟି ଜାଚାନ୍ ପୁର୍ତିତି ଦାଲ୍ଲାନିକି ପରନ୍ ହିନ୍ନେ, ଏଦି ଆଇନେ ମୁଲାପେନୁ ହିଆଞ୍ଜାନ୍ନି ତିନ୍ବା ପଡ଼ି ।”
34ଏୱାରି ତାଙ୍ଗେ ୱେସ୍ତେରି, “ଦାର୍ମୁ, ଦିନାଙ୍ଗେଃଏ ମାଙ୍ଗେ ଇ ତିନ୍ବା ପଡ଼ି ହିଆମୁ ।”
35ଏମ୍ବାଟି ଜିସୁ ଏୱାରିକି ୱେସ୍ତେଞ୍ଜି, “ନାନୁ ଏ ପରନ୍ ହିଅନ୍ତି ତିନ୍ବା ପଡ଼ି; ଏମ୍ବେନାରି ନା ଟାକ୍କେ ୱାନେରି, ଏୱାରି ଏଚ୍ଚେକ୍ ହାକ୍କି ହାଃଏରି, ଆଟେ ନାଙ୍ଗେ ଏମ୍ୱେନାରି ମାଞ୍ଜାଡ଼ି କିଆନେରି ଏୱାରି ଏଚ୍ଚେକ୍ ଏସ୍କି ହାଃଏରି । 36ମତ୍ର ମିରୁ ନାଙ୍ଗେ ହୁଡ଼ିଦାତେସ୍ ୱାଡ଼େ ମାଞ୍ଜାଡ଼ି କିହେଲ୍ଲାଦାଃଏରି, ଇଦା ନାନୁ ମିଙ୍ଗେ ୱେସାଞ୍ଜା । 37ଆବା ନାଙ୍ଗେ ଇନ୍ଦାରିକି ହିଞ୍ଜାନେଞ୍ଜି, ଏୱାରି ହାବେ ନା ଟାକ୍କେ ୱାନେରି, ଆଟେ ଏମ୍ବେ ନା ଟାକ୍କେ ୱାନେ, ତାଙ୍ଗେ ନାନୁ ଇନିସ୍ ୱାଡ଼େ କାଟ ହଃପାନୁ । 38ଇନାକି ନାନୁ ନା ଇଚ୍ଚା ସପଲ କିଅନ୍ ବାଗା ୱାଃଏଟେଃଏ, ମତ୍ର ନାଙ୍ଗେ ପାଣ୍ଡାଞ୍ଜାନ୍ ଆବାତି ଇଚ୍ଚା ସପଲ କିଅନ୍ ବାଗା ସର୍ଗଟି ୱାମାଃଇ । 39ଆଟେ ନାଙ୍ଗେ ପାଣ୍ଡାଞ୍ଜାନାଞ୍ଜିତି ଇଚ୍ଚା ଇଦି, ଏୱାଞ୍ଜି ନାଙ୍ଗେ ଇନ୍ଦାରିକି ହିଆଞ୍ଜାନେଞ୍ଜି, ଏୱାର୍ତାୱାଟି ଇନ୍ଦାରିକି ୱାଡ଼େ ପିଃହାନୁ, ମତ୍ର ୱିହାନ୍ଦୁକାତାୱା ନାନୁ ତାଙ୍ଗେ ପରନ୍ତାୱା ନିକିଃଇ । 40ଇନାକି ଏମ୍ୱେନାଞ୍ଜି ମ୍ରିଃଏଞ୍ଜିକି ହୁଡ଼ାନ୍ ତାଙ୍ଗେ ମାଞ୍ଜାଡ଼ି କିନେଞ୍ଜି, ଏୱାଞ୍ଜ୍ ଇନିସ୍ ଟାକ୍କିଡ଼ହ୍ନାତି ପରନ୍ ପାଁନେଞ୍ଜି, ଇଦି ଆଇନେ ନା ଆବାତି ଇଚ୍ଚା; ଆଟେ ନାନୁ ତାଙ୍ଗେ ୱିହାନ୍ଦୁକାତାୱା ପରନ୍ତାୱା ନିକିଃଇ ।” 41ନାନୁ ସର୍ଗଟି ଜାଚାଞ୍ଜାନ୍ନି ତିନ୍ବା ପଡ଼ି, ଏୱାଞ୍ଜି ଇଦା ୱେସ୍ପନେଃଏ ଜିହୁଦିଙ୍ଗ୍ ତା ବିରୁଦି କାତା ୱେସ୍ପନ୍ ମ୍ରାସ୍ତେରି, 42ଏଦାବାଗା ଏୱାରି ୱେସ୍ତେରି, “ଇୱାଞ୍ଜ୍ ଇନ୍ନା ଜସେପତି ମ୍ରିଃଏଞ୍ଜି ଜିସୁ ଆଃଏ ? ଆଟେ ମାରୁ ଇନ୍ନା ଇୱାଞ୍ଜ୍ତି ଇୟାଆବାନିକି ପୁଞ୍ଜାହେଃଲ୍ଲାସୁ ? ଏହେଙ୍ଗ୍ ଆତେସି ନାନୁ ସର୍ଗଟି ୱାମାଃଇ ଇଞ୍ଜାନ୍ ଏୱାଞ୍ଜି ଇନିସ୍ ୱେସ୍ପିନ୍ନେଞ୍ଜି ?”
43ଜିସୁ ଏୱାରିକି ୱେସ୍ତେଞ୍ଜି, “ମିରୁ ମିରୁ କାତାଙ୍ଗ୍ ଆଃଆଟୁ । 44ନାଙ୍ଗେ ପାଁଣ୍ଡାଞ୍ଜାନ୍ନି ଆବା ଇନ୍ଦାରିକି ନା ଟାକ୍କେ ତାଚ୍ଚିୱାନେଞ୍ଜି, ୱାର୍ରି ଏୱାରି ନା ଟାକ୍କେ ୱାଅନ୍ ମୁନେରି, ଆଟେ ନାନୁ ଏୱାରିକି ୱିହାନ୍ଦୁକାତାୱା ପରନ୍ତାୱା ନିକିଃଇ । 45ବାବବାଦିଙ୍ଗ୍ତି ଦର୍ମପୁତିତାୱା ୱ୍ରିଗାଆନ୍ନେ, ହାବେ ଦାଲ୍ଲା ମୁଲାପେନୁତାୱାଟି ଗ୍ରାମ୍ୱିନେରି । ଏମ୍ବେନାରି ଆବାତାୱାଟି ୱେଞ୍ଜାନାହି ଗ୍ରାମ୍ୱାନ୍ନେରି, ଏୱାରି ନା ଟାକ୍କେ ୱାନେରି । 46ଏମ୍ୱେନାଞ୍ଜି ଆବାନିକି ହୁଡ଼ାହେଃଲ୍ଲେଞ୍ଜି, ମତ୍ର ଏମ୍ୱେନାଞ୍ଜି ମୁଲାପେନୁତାୱାଟି ୱାନ୍ନେଞ୍ଜି, ୱାର୍ରି ଏୱାଞ୍ଜି ଆବାନିକି ହୁଡ଼ାନ୍ନେଞ୍ଜି । 47ନିଜ୍ଜାନେଃଏ ନାନୁ ମିଙ୍ଗେ ୱେସ୍ପିଞ୍ଜା, ଏମ୍ୱେନାଞ୍ଜି ମାଞ୍ଜାଡ଼ି କିନ୍ନେଞ୍ଜି, ଏୱାଞ୍ଜି ଟାକ୍କିଡ଼ହ୍ନାତି ପରନ୍ ପାଁଣ୍ଡାନ୍ନେଞ୍ଜି । 48ନାନୁ ପରନ୍ ହିଅନ୍ତି ତିନ୍ବା ପଡ଼ି । 49ମି ଜୁଜୁଆକେଙ୍ଗ୍ ଚିହ୍ପି ଗର୍ରିତାୱା ମୁଲାପେନୁ ହିଚ୍ଚି ମାନ୍ନା ତିଞ୍ଜାନ୍ ୱାଡ଼େ ହାତେରି । 50ମତ୍ର ଏମ୍ବେନାରି ଇନିସ୍କି ତିଞ୍ଜାନ୍ ହାଃଏରି, ଏଦାବାଗା ସର୍ଗଟି ଜାଚାନ୍ନି ତିନ୍ବା ପଡ଼ି ଆଇନେ ଇଦି । 51ନାନୁ ସର୍ଗଟି ଜାଚାନ୍ନି ଏ ପରନ୍ ହିଅନ୍ତି ତିନ୍ବା ପଡ଼ି; ଏମ୍ୱେନାଞ୍ଜି ଜଦି ଇ ତିନ୍ବା ପଡ଼ି ତିନେଞ୍ଜି, ଏୱାଞ୍ଜି କାଲେଙ୍ଗ୍କାଲା ଟିକ୍ନା ନିମ୍ବାନ୍ ବାସାଆନେଞ୍ଜି; ହାଁ, ନାନୁ ଇମ୍ୱିନ୍ ତିନ୍ବା ପଡ଼ି ହିଆ, ଏୱା ନା ଉଙ୍ଗା ନାନୁ ଏଦା ପୁର୍ତିତି ପରନ୍ ବାଗା ହିଃଇ ।”
52ଏମ୍ବାଟି ଜିହୁଦିଙ୍ଗ୍ ତାରୁ ତାରୁ ୱେସ୍ପିଆତେରି, “ଇୱାଞ୍ଜି ଇନିସ୍ ମାଙ୍ଗେ ତା ଉଙ୍ଗା ତିନ୍ବନ୍ ବାଗା ହିଅନ୍ ମୁତାନେଞ୍ଜି ?”
53ଏଦିମ୍ୱା ଜିସୁ ଏୱାରିକି ୱେସ୍ତେଞ୍ଜି, “ନିଜ୍ଜାନେଃଏ ନାନୁ ମିଙ୍ଗେ ୱେସ୍ପିଞ୍ଜା, କୁଏଞ୍ଜ୍ ମ୍ରିଃଏଞ୍ଜ୍ତି ଉଙ୍ଗା ତିଃନ୍ନାତେସି ଅଟେ ତା ରାକ୍କା ଉଃନ୍ନାତେସି, ମି ତାୱା ପରନ୍ ହେଃଲ୍ଲେ । 54ଏମ୍ୱେନାଞ୍ଜି ନା ଉଙ୍ଗା ତିନେଞ୍ଜି ଅଟେ ନା ରାକ୍କା ଉନ୍ନେଞ୍ଜି, ଏୱାଞ୍ଜି ଟାକ୍କିଡ଼ହ୍ନା ପରନ୍ ପାଁଣ୍ଡାନ୍ନେଞ୍ଜି, ଆଟେ ନାନୁ ତାଙ୍ଗେ ୱିହାନ୍ଦୁକାତ୍ ପରନ୍ତାୱା ନିକିଃଇ । 55ଇନାକି ନା ଉଙ୍ଗା ନିଜ୍ଜାନେଃଏ ତିନ୍ବା ପଡ଼ି ଅଟେ ନା ରାକ୍କା ନିଜ୍ଜାନେଃଏ ଉନ୍ବା କୁଲା । 56ଏମ୍ୱେନାଞ୍ଜି ନା ଉଙ୍ଗା ତିଞ୍ଜିନ୍ନେଞ୍ଜି ଅଟେ ନା ରାକ୍କା ଉଣ୍ଡିନ୍ନେଞ୍ଜି, ଏୱାଞ୍ଜି ନା ତାୱା ବାସାଆଇନେଞ୍ଜି ଅଟେ ନାନୁ ତା ତାୱା ବାସାଆଇମାଃଇ । 57ନିମ୍ବାନ୍ନି ଆବା ଇନିସ୍ ନାଙ୍ଗେ ପାଣ୍ଡିଦାତେଞ୍ଜି ଅଟେ ନାନୁ ଆବା ବାଗା ନିମ୍ବାନ୍ ବାସାଆଃଇ, ଏହେଙ୍ଗିସି ଏମ୍ୱେନାଞ୍ଜି ନାଙ୍ଗେ ତିଞ୍ଜାନେଞ୍ଜି ଏୱାଞ୍ଜ୍ ୱାଡ଼େ ନା ବାଗାଟି ନିମ୍ବାନ୍ ବାସାଆନେଞ୍ଜି । 58ଇମ୍ୱିନ୍ ତିନ୍ବା ପଡ଼ି ସର୍ଗଟି ଜାଚାଞ୍ଜାନେ ଏଦି ଇଦି; ଜୁଜୁଆକେଙ୍ଗ୍ ଇନିସ୍ ତିଞ୍ଜାନ୍ ୱାଡ଼େ ହାତେରି, ଏଚିଡେହେଙ୍ଗ୍ ଆଃଏ, ଏମ୍ୱେନାଞ୍ଜି ଇ ତିନ୍ବା ପଡ଼ି ତିନେଞ୍ଜି, ଏୱାଞ୍ଜି ଟାକ୍କିଡ଼ହ୍ନା କାଲା ଟିକ୍ନା ନିମ୍ବାନ୍ ବାସାଆନେଞ୍ଜି ।”
59ଏୱାଞ୍ଜି କପର୍ନାହୁମତି ହାଜା ଇଡ୍ଡୁତାୱା ଗ୍ରାପେଚ୍ଚି ତୁକାତାୱା ଇ ହାବେତ୍ କାତା ୱେସ୍ତେଞ୍ଜି ।
ଟାକ୍କିଡ଼ହ୍ନା ପରନ୍ତି ବାକ୍ୟ
60ଏଦାବାଗା ଜିସୁତି ଗ୍ରାମ୍ୱାଗାଟାର୍ ତାୱାଟି ଗାପ୍ଚି ଦାଲ୍ଲା ଇଦା ୱେସ୍ତେରି, “ଇ ଗ୍ରାପାଙ୍ଗାତା ଗାପ୍ଚି କସ୍ଟ, ଏମ୍ବେନାରି ୱେଞ୍ଜାନ୍ ପାଲ୍ନି ଆଅନ୍ ମୁନେରି ?”
61ମତ୍ର ଜିସୁତି ଗ୍ରାମ୍ୱାଗାଟାର୍ ଏ କୁଲାଟି ତାରୁ ତାରୁ କାତା ଆଇଚ୍ଚାଦାଃଆ ତା ହଡାଙ୍ଗିଃଆ ପୁଞ୍ଜାନ୍, ଏୱାରିକି ୱେସ୍ତେଞ୍ଜି, ଇ ଗ୍ରାପାଙ୍ଗାତା ଇନ୍ନା ମି ବାଗା କସ୍ଟ ଆଇନେ ? 62ଏହେଙ୍ଗ୍ ଆତେସି କୁଏଞ୍ଜ୍ ମ୍ରିଃଏଞ୍ଜି କାହେ ଇମ୍ୱିନ୍ ଗର୍ରିତାୱା ମାଚ୍ଚେଞ୍ଜି, ଏ ଗର୍ରିଇନ୍ଦା ଏଚ୍ଚେକ୍ ହାଲ୍ବନ୍ତାଃଆ ହୁଡ଼ିଦେରି, ଇଚ୍ଚେସ୍ ମିରୁ ଇନ୍ନା ଏଲୁ କିଦେରି ? 63ଡିଙ୍ଗା ପରନ୍ ହିଅନ୍ତାଦି, କୁଏଞ୍ଜ୍ ତା ବଲ ଡ଼ାହି ଇନ୍ନା କିଅନ୍ ମୁଃଏଞ୍ଜି; ନାନୁ ମିଙ୍ଗେ ଇମ୍ୱିନ୍ ହାବେତ୍ ବାକ୍ୟ ୱେସାଞ୍ଜା, ଏ ହାବେ ବାକ୍ୟ ଆଇନୁ ଡିଙ୍ଗା ଆଟେ ପରନ୍ । 64ମତ୍ର ମି ତାୱାଟି ତୁଲ୍ଲେତାରି ନାଙ୍ଗେ ମାଞ୍ଜାଡ଼ି କିହେଲ୍ଲାଦାଃଏରି । ଇନାକି ଏମ୍ବେନାରି ମାଞ୍ଜାଡ଼ି କିହେଲ୍ଲାଦାଃଆତେରି ଅଟେ ଏମ୍ୱେନାଞ୍ଜି ତାଙ୍ଗେ ସତ୍ରୁ କାଜ୍ଜୁତାୱା ସର୍ପି କିନେଞ୍ଜି, ଏଦା ଜିସୁ କାହେନେଃଏ ପୁଞ୍ଜାଚ୍ଚେଞ୍ଜି । 65ଆଟେ ଏୱାଞ୍ଜି ୱେସ୍ତେଞ୍ଜି, “ଇଦାବାଗା ନାନୁ ମିଙ୍ଗେ ୱେସାଞ୍ଜା, ଆବାତାୱାଟି ମେଲା ୱାଃଆତେସି ଏମ୍ବେନାରି ନା ଟାକ୍କେ ୱାଅନ୍ ମୁଃଏରି ।”
66ଏଚିତୁକାତାୱାଟି ତା ଗ୍ରାମ୍ୱାଗାଟାର୍ ତାୱାଟି ଏଗେଲ୍ ଦାଲ୍ଲା ବେତକ୍ ୱ୍ଡେଚାନ୍ ହାଚ୍ଚେରି, ଆଟେ ତା ଡ଼ାହି ତ୍ରେଃଆତେରି । 67ଏମ୍ବାଟି ଜିସୁ ବାରାଗାଣ୍ଡି ଗ୍ରାମ୍ବାଗାଟାରିକି ୱେଚ୍ଚେଞ୍ଜି, “ମିରୁ ୱାଡ଼େ ଇନ୍ନା ହାଲ୍ବନ୍ ବାଗା ଇଚ୍ଚା କିଞ୍ଜେରି ?” 68#ମାତି ୧୬:୧୬; ମାର୍କ ୮:୨୯; ଲୁକ ୯:୨୦ସିମନ ପିତର ତାଙ୍ଗେ ୱେସ୍ତେଞ୍ଜି, “ଦାର୍ମୁ, ମାମୁ ଇନ୍ଦାର୍ ଟାକ୍କେ ହାନ୍ନାମୁ ? ନି ପାଟ୍ଟି ଟାକ୍କିଡ଼ହ୍ନା ପରନ୍ତି ବାକ୍ୟ ମାନ୍ନେ; 69ଆଟେ ନିନୁ ଜେ ମୁଲାପେନୁତି ଏ ପିର୍ନି କୁଏଞ୍ଜ୍ତାତି, ଇଦା ମାମୁ ମାଞ୍ଜାଡ଼ି କିନ୍ନାମୁ ଅଟେ ପୁଞ୍ଜାନ୍ନାମୁ ।”
70ଜିସୁ ଏୱାରିକି ୱେସ୍ତେଞ୍ଜି, “ନାନୁ ଇନ୍ନା ମି ବାରାଜାଡ଼ାନିକି ଆଚି କିଆହେଲ୍ଲାଦାଃଏନୁ ? ମତ୍ର ମି ତାୱାଟି ରଃଅଞ୍ଜି ସଇତାନ ।#୬:୭୦ ସଇତାନ କାତା ଡ଼ାହି କାମା କିତେଞ୍ଜି” 71ଏୱାଞ୍ଜି ଇସ୍କାରିୟତ ନାଜୁତି ସିମନତି ମ୍ରିଃଏଞ୍ଜି ଜିହୁଦାନିକି ହୁଡ଼ାନ୍ ଇଦା ୱେସ୍ତେଞ୍ଜି, ଇନାକି ଏୱାଞ୍ଜି ବାରାଗାଣ୍ଡି ତାୱାଟି ରଃଅଞ୍ଜି, ଆଟେ ଏୱାଞ୍ଜି ତାଙ୍ଗେ ସତ୍ରୁ କାଜ୍ଜୁତାୱା ସର୍ପି କିଅନ୍ ହାଜ୍ଜିଚ୍ଚେଞ୍ଜି ।
