लूका 3
3
यूहन्ना बपतिस्मा देण वळा को परचार
(मत्ती 3:1-12; मर 1:1-8; यूहन्ना 1:19-28)
1जौं दिनों मा महाराजा तिबिरियुस रोम को महाराजा छौ, वेका राज का पन्द्रवां साल मा यहूदिया मुलक को गवर्नर पुन्तियुस पिलातुस छौ, अर गलील मुलक पर सासन करण वळु हेरोदेस अन्तिपास छौ। अर वेकू भै फिलिप्पुस को सासन इतूरैया मुलक पर अर त्रखोनीतिस मुलक पर छौ। अर अबिलेने मुलक पर लिसानियास सासन करण वळु छौ। 2अर जब यू लोग राज कना छा, त ये बगत मा हन्ना अर काइफा महा पुरोहित छा। ऊं दिनों मा जकरयाह का नौना यूहन्ना का दगड़ा मा परमेस्वर न #लूका 1:80निर्जन जगा मा अपणु वचन देके बात-चित कैरी। 3अर उ यरदन गाड का आस-पास का मुलक मा जैके पापों बटि माफी पौण खुणि मन से पस्ताप कैरिके बपतिस्मा लेण को परचार कनु छौ। 4अर जन की भौत साल पैलि परमेस्वर का रैबर्या यशायाह का द्वारा बुलयां वचनों की किताब मा लिख्यूं च, वेका मुताबिक ही यू ह्वे। वेन इन बोलि छौ कि,
#
यशा 40:3-5
“निर्जन जगा मा जोर-जोर से धै लगै के बुलण वळे की आवाज औणी च कि,
‘प्रभु को बाटु तयार कैरा, वे खुणि बाटु सीदु कैरा।
5अर हरेक गदेरु भुरे जालु,
अर हरेक ढौंडा अर पाड़ समतल किये जाला।
अर जु टेड़ा-मेड़ा बाटा छिन, ऊंतैं सीदु किये जालु,
अर जु उबड-खाबड़ बाटा छिन, ऊंतैं समतल किये जालु।
6अर हरेक मनखि परमेस्वर का द्वारा दियां छुटकारा तैं दिखलु।’”
7अर भौत जादा भीड़ ज्वा वेका पास बपतिस्मा लेणु खुणि औणी छै, वेन ऊंकू बोलि, “हे गुरौ का बच्चों,#3:7 इख मा “हे गुरौ का बच्चों” को मतलब ऊं लोगु से च जौं का मनों मा गुरौ का जन बिस भोरयूं च। तुमतै कैन चितै की परमेस्वर का औण वळा परकोप से दूर भागा? 8पर तुम इन्द्रया काम कैरा, ज्यां से इन पता चलु कि तुमुन मन से पस्तावा कैरियाली। अर अपणा-अपणा मनों मा यू नि सोचा कि, ‘हम अब्राहम का वंश मदि छां, इलै हमतै परमेस्वर दण्ड नि द्यालु।’ पर मि तुमतै बतै देन्दु कि, परमेस्वर यू ढुंगो मा बटि भि अब्राहम खुणि औलाद पैदा कैरी सकदु च। 9अर अब कुल्हाडु डाळों की जड़ पर रख्युं च, इलै जै डाळा पर अच्छा फल नि लगदिन, वेतैं काटी के आग मा ढुळै जान्दु।”
10तब भीड़ का लोगु न यूहन्ना बटि पूछी, “त हमतै क्या करण चयेणु?” 11तब वेन ऊंतैं जबाब देई, “अगर कै मनखि का पास दुई कुरता हो, त उ एक वेतैं दे द्यो जैमा नि च। अर ठिक उन्नि जैमा खाणु च, उ भि इन्नि कैरो।”
12अर तब चुंगी लेण वळा भि वेका पास बपतिस्मा लेणु कू ऐनी, अर वे बटि पूछी, “गुरुजी, हमतै क्या करण चयेणु?” 13अर वेन ऊंकू बोलि, “जथगा चुंगी लेण ठैर्युं च उथगा ही ल्या, ना कि वेसे जादा।”
14तब सिपयों न भि वे बटि पूछी कि, “हमतै क्या करण चयेणु?” वेन ऊंकू बोलि, “कै बटि भि जबरदस्ती कैरिके पैसा नि ल्या, अर ना ही झूठ्ठों इळजाम लगा। पर अपणी ही कमै पर संतुष्ट रा।”
15अर वे बगत पर लोग मसीह की आस मा लग्यां छा, अर ऊ सब अपणा-अपणा मनों मा यूहन्ना का बारा मा विचार करण लगि गैनी कि, “कखि यूई मसीह त नि च।” 16तब यूहन्ना न ऊं सभ्यों कू बोलि, “मि त तुमतै पाणिळ बपतिस्मा देणु छौं, पर उ औण वळु च, जु मिसे भि जादा ताकतबर च। अर मि ये लैख भि नि छौं कि वेका जुतों का तसमा भि खोली सैकु। अर उ तुमतै पवित्र आत्मा अर आग बटि बपतिस्मा#3:16 उ तुमतै पवित्र आत्मा देके तुमरा मनों तैं शुद्ध करलु। द्यालु। 17अर वेको सुप्पु वेका हाथों मा च। अर उ अपणा खल्याण तैं अच्छा ढंगल साफ करलु, अर ग्यूँ तैं अपणा कुठार मा इकट्ठा करलु, पर बूखा तैं वीं आग मा ढोळि द्यालु ज्वा कभि बुझि नि सकदी।” 18इन्नि और भि भौत सरी शिक्षा देके यूहन्ना न लोगु तैं शुभ समाचार सुणै।
19तब गलील मुलक पर सासन करण वळु हेरोदेस अन्तिपास तैं यूहन्ना वेका सब बुरा कामों का बारा मा झिड़कुदु छौ, अर इलै भि झिड़कुदु छौ किलैकि वेन अपणा भै फिलिप्पुस की घरवळी हेरोदियास तैं अपणु बणैयालि छौ। 20तब हेरोदेस न यूहन्ना तैं जेलखाना मा डालि दिनी। अर यू काम कैरिके हेरोदेस न अपणा जीवन को सबसे बड़ु बुरु काम कैरी।
यीशु को बपतिस्मा
(मत्ती 3:13-17; मर 1:9-11)
21यूहन्ना का जेलखाना मा डळै जाण से पैलि, जब सब लोग बपतिस्मा लिणा छा, तब यीशु न भि बपतिस्मा लेई, अर जब उ प्रार्थना कनु छौ तब आसमान खुलि गै। 22अर पवित्र आत्मा तैं कबूतर का रुप मा यीशु पर उतरद देखि। अर आसमान बटि या आवाज ऐ कि, “तू मेरु लाडलु पुत्र छैई, अर मि त्वे बटि भौत खुश छौं।”
पितरों का नौ की सूची
(मत्ती 1:1-17)
23अर जब यीशु न अपणी सेवा शुरु कैरी, त उ तकरीबन तीस साल को छौ। अर लोग इन समझदा छा कि यीशु यूसुफ को नौनु छौ,
अर यूसुफ पितर एली को नौनु छौ।
24अर एली मतात को नौनु छौ,
अर मतात लेवी को नौनु छौ,
अर लेवी मलकी को नौनु छौ,
अर मलकी यन्ना को नौनु छौ,
अर यन्ना यूसुफ को नौनु छौ।
25अर यूसुफ मत्तित्याह को नौनु छौ,
अर मत्तित्याह आमोस को नौनु छौ,
अर आमोस नहूम को नौनु छौ,
अर नहूम असल्याह को नौनु छौ,
अर असल्याह नोगह को नौनु छौ।
26अर नोगह मात को नौनु छौ,
अर मात मत्तित्याह को नौनु छौ,
अर मत्तित्याह शिमी को नौनु छौ,
अर शिमी योसेख को नौनु छौ,
अर योसेख योदाह को नौनु छौ।
27अर योदाह यूहन्ना को नौनु छौ,
अर यूहन्ना रेसा को नौनु छौ,
अर रेसा जरुब्बाबिल को नौनु छौ,
अर जरुब्बाबिल शालतिएल को नौनु छौ,
अर शालतिएल नेरी को नौनु छौ।
28अर नेरी मलकी को नौनु छौ,
अर मलकी अद्दी को नौनु छौ,
अर अद्दी कोसाम को नौनु छौ,
अर कोसाम इलमोदाम को नौनु छौ,
अर इलमोदाम एर को नौनु छौ।
29अर एर यहोशुआ को नौनु छौ,
अर यहोशुआ इलाजार को नौनु छौ,
अर इलाजार योरीम को नौनु छौ,
अर योरीम मतात को नौनु छौ,
अर मतात लेवी को नौनु छौ।
30अर लेवी शमौन को नौनु छौ,
अर शमौन यहूदाह को नौनु छौ,
अर यहूदाह यूसुफ को नौनु छौ,
अर यूसुफ योनान को नौनु छौ,
अर योनान इलयाकीम को नौनु छौ।
31अर इलयाकीम मलेआह को नौनु छौ,
अर मलेआह मिन्नाह को नौनु छौ,
अर मिन्नाह मत्तता को नौनु छौ,
अर मत्तता नातान को नौनु छौ,
अर नातान राजा दाऊद को नौनु छौ।
32अर दाऊद यिशै को नौनु छौ,
अर यिशै ओबेद को नौनु छौ,
अर ओबेद बोअज को नौनु छौ,
अर बोअज सलमोन को नौनु छौ,
अर सलमोन नहशोन को नौनु छौ।
33अर नहशोन अम्मीनादाब को नौनु छौ,
अर अम्मीनादाब अदमीन को नौनु छौ,
अर अदमीन अरनी को नौनु छौ,
अर अरनी हिस्रोन को नौनु छौ,
अर हिस्रोन फिरिस को नौनु छौ,
अर फिरिस यहूदाह को नौनु छौ।
34अर यहूदाह याकूब को नौनु छौ,
अर याकूब इसहाक को नौनु छौ,
अर इसहाक अब्राहम को नौनु छौ,
अर अब्राहम तिरह को नौनु छौ,
अर तिरह नाहोर को नौनु छौ।
35अर नाहोर सरूग को नौनु छौ,
अर सरूग रऊ को नौनु छौ,
अर रऊ फिलिग को नौनु छौ,
अर फिलिग एबिर को नौनु छौ,
अर एबिर शिलह को नौनु छौ।
36अर शिलह केनान को नौनु छौ,
अर केनान अरपक्षद को नौनु छौ,
अर अरपक्षद शेम को नौनु छौ,
अर शेम नूह को नौनु छौ,
अर नूह लिमिक को नौनु छौ।
37अर लिमिक मथूशिलह को नौनु छौ,
अर मथूशिलह हनोक को नौनु छौ,
अर हनोक यिरिद को नौनु छौ,
अर यिरिद महललेल को नौनु छौ,
अर महललेल केनान को नौनु छौ।
38अर केनान एनोश को नौनु छौ,
अर एनोश शेत को नौनु छौ,
अर शेत आदम को नौनु छौ,
अर आदम परमेस्वर को नौनु#3:38 अर आदम तैं परमेस्वर न बणै। छौ।
© (Active) Wycliffe Bible Translators, Inc. All rights reserved.