Stat Tok i go pas
Tok i go pas
Dispela buk i stori long as o stat bilong olgeta samting. Em i stori long as bilong skai na graun, na em i stori tu long stat bilong ol manmeri na long as bilong ol sin na hevi na pen i stap long dispela graun. Em i stori long rot God yet i makim bilong wok wantaim yumi manmeri bilong dispela graun.
Yumi inap brukim dispela buk long tupela bikpela hap.
1) Sapta 1-11. Dispela hap i stori long God i wokim skai na graun, na em i stori tu long ol samting i bin kamap bipo yet, taim ol manmeri i kamap long graun. I gat ol stori bilong Adam tupela Iv, na bilong Kein na Abel. Na tu dispela hap bilong buk i stori long Noa na long bikpela tait i bin kamap long graun, na long taua bilong Babel.
2) Sapta 12-50. Dispela ol sapta i stori long ol tumbuna bilong ol lain Israel. Namba wan tumbuna em Abraham. Abraham i bin aninit tru long laik bilong God na em i kamap olsem piksa bilong ol manmeri i bilip tru long God. Dispela hap i stori tu long Aisak na long pikinini bilong en Jekop wantaim ol 12-pela pikinini man bilong em. Dispela man Jekop em i kisim narapela nem Israel, na ol 12-pela pikinini man bilong en i bin kamapim ol 12-pela lain bilong Israel. Planti sapta long dispela hap bilong buk i stori long Josep, em wanpela pikinini bilong Jekop. Ol i soim klia ol samting i bin kamap bilong mekim ol lain tumbuna bilong ol Israel i go i stap long kantri Isip.
I gat planti stori bilong ol manmeri i stap insait long dispela buk, tasol namba wan samting dispela buk i tok long en, em ol samting God yet i bin mekim. Pastaim God yet i bin wokim olgeta samting, na bihain, taim ol manmeri i stat long mekim ol pasin nogut, God i mekim save long ol na em i larim ol lain bilong Noa tasol i stap. Na bihain gen, God i makim Abraham na em i promis long mekim gut long Abraham na long ol lain tumbuna bilong en. Dispela buk i stori moa yet long God. Em i Papa tru bilong ol manmeri, na em i save skelim pasin bilong ol na mekim save long ol lain i save mekim rong. Na em i save bosim gut na lukautim ol manmeri i aninit long em. Dispela buk i stori long bilip bilong ol manmeri bilong bipo tru, bai ol lain i kamap bihain, ol tu i ken ritim na i stap strong long bilip.
Tok Pisin DC Bible © Bible Society of Papua New Guinea, 1969, 2008.