1 കൊരിന്ത്യഗാറാര് 13
13
സീവാന്
1നാന് മന്‌സാര് നായാത്ത്‌ലൊ ദൂദാര് നായാത്ത്‌ലൊ നായനൊഡിന്താല്‌മ് എനാക്ക് സീവാന് ഇല്ലാദെ പോന നാന് ബെ്റ്‌ദെ ഓസെ്റിവ മണിന പാസേമ് ജെല്‌ങ്കുവ ജെലികുന്റിന പാസേമ്‌ത്തെ. 2സാമി നായന നേരെ കേ്ട്ട് സൊല്ലുവ ബര ഒന്റു സമ്യ എനാക്ക് ഇന്ത് നാന് മറേന്ത്‌റ്‌ക്കുവ എല്ലാ പൊറുളുഗാള്‌ഗാള്‌ന നെപ്പ് കെ്ഡേസ്‌ന്റവാന്‌മ് എല്ലാ ദിന്‌സ്‌ല അറുവുമു ഇര്‌ക്ക്‌ന്റവാന്‌മ് ആല. മലെഗാള്‌ന മറ്‌ക്കുവ ദിന്‌സ്‌ല നമ്പിക്കേമ് എനാക്ക് ഒന്റു സമ്യ ഇര്‌ക്ക്‌ല. എന്റാല്‌മ് എനാക്ക് സീവാന് ഇല്ലാദെ പോന നാന് ആര്‌മല്ല. 3എനാക്ക് ഇര്‌ക്കുവാദ്‌ന ഒട്ടുക്കു ഏ്ളെഗാള്‌ക്ക് നാന് ദാന ഗേന്താല്‌മ് എന്ന് സരിഗലന സുഡ്യ ഒപ്പിസി കൊഡുത്താല്‌മ് എനാക്ക് സീവാന് ഇല്ലാദെ പോന എനാക്ക് ഒന്റു ഗുണാമില്ലെ.
4സീവാന് ഉള്ളവാന് നല്ല പൊറിമുള്ളവാന് ആയിര്‌ക്കുവാന്, ഗവപഡ്‌ന്റവാന് ആയിര്‌ക്കുവാന്, എര്‌സ്സ ഇല്ലത്തവാന് ആയിര്‌ക്കുവാന്. സീവാന് ഉള്ളവാന് മേനാമ്പ് കാട്ടുവാദില്ലെ, താന് ഗേവാദ്‌ന പറ്റി പെരിമെപഡുവാദിമില്ലെ. 5സീവാന് ഉള്ളവാന് മര്യാദിഗെ്ട്ട് നഡാക്കാത്തവാന്‌മ് തന്ന് കാര്യന താനെ നോഡി നഡാക്കാത്തവാന്‌മ്, മുങ്കോവ ഇല്ലത്തവാന്‌മ്, അഡ്‌ത്തവാര് ഗേന്ത തപ്പ്‌ന മനേസ്സ്‌ല് ബെക്കാത്തവാന്‌മ് ആയിര്‌ക്കുവാന്. 6സീവാന് ഉള്ളവാന് കെ്ട്ട കാര്യാത്ത്‌ല് പിര്യപഡാദെ സത്ത്യമാന കാര്യാത്ത്‌ല് പിര്യപഡ്‌ന്റാന്. 7സീവാന് ഉള്ളവാന് എല്ലാദ്‌നാമ് പൊറുക്കുന്റാന്, എല്ലാദ്‌നാമ് നമ്പ്‌ന്റാന്, എല്ലാദ്‌നാമ് നെഞ്ചഡെ ബെക്ക്‌ന്റാന്, എല്ലാദ്‌നാമ് താങ്ക്‌ന്റാന്.
8സീവാന് എന്നാല്‌ക്ക്‌മ് ഇര്‌ക്ക്‌മ്. സാമി നായന നേരെ കേ്ട്ട് സൊല്ലുവ ബര ഇന്നാല് ഇന്താല്‌മ് പിന്നെ മാറി പോമു, പല ദിന്‌സ്‌ല നായഗാള്‌ല് നായനൊഡിവ ബരഗാള്‌മ് പിന്നെ നിന്റ് പോമു. അറുവു കെ്ഡേക്കുവ ബരാമ് പിന്നെ ഇല്ലാദ്യാമ്. 9എന്ത്‌ക്കെന്റ് സൊന്ന തെഗേന്ത അളാവുലു നമ്മ ഇന്നാല് നെപ്പ് കെ്ഡേസുവാദില്ലെ. സാമി നായന നേരെ കേ്ട്ട് സൊല്ലുവ ബരാത്ത്‌ല് തെഗേന്ത അളാവുലു നമാക്ക് കാര്യഗാള് ബെ്ളിപട്ട് കെ്ഡേക്കുവാദില്ലെ. 10ആന എല്ലാമ് തെഗേന്താദ് ബര്‌ഗാട്ടി തെഗേഗാദ ഇര്‌ക്കവാദെല്ല ഒയിന്ത് പോമു. 11നാന് സ്‌ന്ന പ്‌ള്ളെ ആയിര്‌ക്കാട്ടി സ്‌ന്ന പിള്ളെന പാസെ നായനൊഡിന്തേന്, സ്‌ന്ന പ്‌ള്ളെ നെനേത്ത് നഡാക്കുവ പാസെ നെനേത്ത് നഡാന്തേന്, സ്‌ന്ന പ്‌ള്ളെന പാസെ ഓസണെ മാഡി നഡാന്തേന്. ആന ദൊഡ്ഡാദാന പ്‌റ മക്കാള് പളാക്കന ബ്‌ട്ട് തള്ള്‌നെ. അദേപാസെ നിമ്മാമ് സാമിനിഗാല് തരുവ ബരഗാള്‌ന പറ്റി സ്‌ന്ന പ്‌ള്ളെഗാള്‌ന പാസെ നെനേക്കുവാദ്‌ന ബ്‌ട്ട് തള്ള്‌ഡൊ. 12ഇന്നാല് നമ്മ കന്നാഡില് കാണുവ പാസെ മാഗെമാഗ്യ കാണ്‌ന്റാമ്, അയി നാള്‌ക്ക് നേരെ നേരെ കാണ്യാമ്. എനാക്ക് ഇന്നാല് ലേസ അളാവുലുത്തെ തെരിന്റ്, ആന തെഗേന്ത അളാവുലു സാമിക്ക് എനാന തെരിവ പാസെ അയി നാള്‌ല് എനാക്ക്‌മ് എല്ലാമ് സൊക്കാന തെരിമ്.
13അദ്‌നാലെ നമ്പിക്കെ, നെഞ്ചഡെ, സീവാന് എന്നുവ ഈ മൂറുമു എന്നാല്‌ക്ക്‌മ് ഒയിന്ത് പോഗമാട്ട. ഇദ്‌ല് മുക്ക്യമാനാദ് സീവാന്‌ത്തെ.
New Life Computer Institute