Isaías 20
20
Asirian wlane latj yell-liw ke Egipton na Etiopían
1To lla, be'nnen llnebia Asirian nzi Sargón bsele'e to be'nn xan waka ya be'nn llze ke raw yell xhen ke Asdod, ne be'nn ni jatilrene to yell xhen, na blanten. 2Ka lla ka', bdixjwe Xanllon Isaíazen be'nnen nak xhi'nn Amós, na gulle'e le'e: Baka rall zechen nakon, na dan nraj niao ka'.
Isaíazen benee kan gulle'e le'en, na bda galniaze, na bkoach tuze xhane. 3Natell bnee Xanllon: Be'nn wen llin kia Isaíazen ba bde galniaze, na bkoach tuze xhane chonn yiz, ka' to sen na da chixjoe Egipton, na Etiopían. 4Leskakse be'nnen llnebia Asirian wchache'e be'nn egipcios ka' yell, na be'nn etiopes ka', lakse cha nak ake' be'nn gur o bi weo, galnia'akze, na galyid'akze, na laxhajze xhan ake', nench'na zi ake' yelsdo. 5Be'nn ka' cho ake' cheb, na waye akre kan llak ke Etiopían le naken da nxenlall ake', na ke Egipton, le naken da llunxhen le ake'. 6Ka lla'na yoyte be'nn ka' zajzu llwa nista'on ne' ake': Lewiakero akre ke bayull ke nun xhenlallon, gan llajnabllo gukre nench'na wasre'e lliw raw be'nnen llnebia Asirian. ¿Gakre gak warallo na' cha?
