Matius 7
7
“His en wene is pema enebam po erlak,”
oluk, mo’gulentesi wene
(Lukas 6:37-38,41-42)
1Asogo mo’gulentesirik e, mesik disogo mo’gulentesi,
“At Allah en wene henebam poluk wiagaphonobuano oluk e, his en aphwami pema wene enebam poluk wiagabonobogup o. 2#Mrk. 4:24His en wene is pema enebam pogu legep ai ’gela’ge, at Allah en ogo asogoat wene henebam pouwa o. Ye, his en elit a’ge walholuk is pema wogontogu legep ai ’gela’ge, at Allah en elit a’ge ai pam walsogo wokhontouwayat o. 3His honu’gwarek henil pam e ’gong ’belak a’ge walurak on ano re, ’gwelakho erlakma en de, is henarilak honorokhwi pema enil mokmuk wei a’ge ’goluk oruak a’ge ano paget nak e, wokhouwogoluk ningsogo ’gwelagontogu legep ai nopaget. 4Honu’gwarek henile’genma e ’gong lok a’ge walurak welat e, henarilak honorokhwi ai mo’gulontogulat,
Hil mokmuk ’gwegei a’ge ai wokhiaik, oluk ningsogo u no? 5Henagap pam nak op ’gela’ge welat henede ’biren yema re! Honu’gwarek henile’genma e ’gong lok a’ge ai naduk wokholuk en de, henil ano arat dek oso holuk e, pobuk henarilak honorokhwi enil mokmuk oruak a’ge ano elirat wokho yo,” oluk mo’gulentesi.
6Asogo mo’gulentesirik e, mesik disogo mo’gulentesi,
“Allah akhit pogwi a’ge ano mene wogogwiam pobuk lagaksogo iak en ’balhenebisoma no oluk, wogorogup o. Ye, henalli a’ge op o’go a’bik a’ge ai, wam wogogwiam oyuk en lologun-lelagansogo hwikhouwano oluk, wogorogubat o,” oluk mo’gulentesi.
Allah ’gonu ogwiam esa’go hweliso wene
(Lukas 11:9-13)
7-8Asogo mo’gulentesirik e, mesik disogo mo’gulentesi,
“Is aphwami enebe lo’bok en Allah ’gonu mo’gulogwiam e, at en enebe lo’bok wogentasu nak o. Ye, is logon enebe lo’bok en di a’ge yu a’ge at ebam horotogwiam e, enebe lo’bok hwiakhorlogwi nak o. Ye, is nin logon enebe lo’bok en ’goduk puk-puk hogwiam e, at en enebe lo’bok ’goduk hurentasu nagat o. Ai en e, his e, Allah ’gonu mo’gulogu lomup o. Mo’gulummu re, wokhontouwayat o. Op a’ge at ebam heratogu lomup o. Heratogulomma re, hwiakhwerlagubat o. Ye, ’goduk puk pugat hogu lomup o. Puk-puk hogolomma re, at en ’goduk huthontouwayat o. 9His pema heneiyagai en,
So’boru roti a’ge nele o, ogwi holuk, enaiklak en e, helep a’ge wogontogu legep no? 10Ye, at e,
Hiane nele, ogwi holuk, ’gosu a’ge wogontogu legep no? Erlagat o. 11His henebabut wiak togu legep a’geat de, eneiyagai op a’ge wogontogwi ai henalukmu re, op a’geat wogontogu legep o. Ai ’gela’ge re, henaik Allah ’bogorl pam a’ge ai re, ’gonu mo’gulorogup a’ge modok op a’ge wogontouwa erlak no? Wogontouwayat o. 12#Luk. 6:31His honogola en,
Is logon en, disogo taknenebelep e, oluk opogu legep ai ’gela’geat, his en is ai asogoat tagonobogu lomup o. Wene Allah en Musa yo’go poluk nenesa’go weregei wene ai emin, is Allah en yo’go enebasuam iak mo’gulontogu legesa wene ai emin, la’bolik logo re, aiat o,” oluk mo’gulentesi.
“Ebela wei o’gwe ai ’gwi lit o,”
oluk mo’gulentesi wene
(Lukas 13:24)
13Asogo mo’gulentesirik, mesik disogo mo’gulentesi,
“Wiakma nal lai lagai ai, ’goduk emde ’belak ai logat o. Ye, ebela ebe yogo’gwe lagai ai ebe logatma re, aphwami a’bigat ’gogwi o. Ai en e, his ebela wei ’beterak a’ge yogo o’gwe ai pamat ’gwi lit o. 14Ebela op o’gwe lagai a’ge ai re, ’goduk emde ogo weiyat. Ye, ebe lagai ai modok ’bi-’beterakma no oluk e, aphwami a’bik ’gwi lo mia en e, enebe wei nagat ’gogwi o,” oluk mo’gulentesi.
Eniak eseiyat lalonobogwi wene
(Lukas 6:43-44)
15Asogo mo’gulentesirik, mesik disogo mo’gulentesi,
“Is logon en eniak eseiyat, Allah iak mo’gulontogwi a’ge ’gela’ge hene’bek wagalat e, honogola ’gagaluano oluk, henebabut heberlogo welemis o. Is ai onorogole re, wam domba wam ena a’ge orogole ’gela’ge takpoluk en wema a’geat de, enedemu re, mene orlomene anni a’bik a’ge ’gela’ge wema o. 16Di agan yu agan e’gen egesiso ai pam, edip enagat ago ai ’gela’ge, is en takhonobouwa ai pam, enebabut enagat ema o. Molip orlok wiak a’geat de, e’gen e, herle anggur op a’ge e’gen ’gela’ge egeikmu daganogwi no? Ye, at e, herle mul orlok wiak a’geat de, e’gen e, e ara op a’ge e’gen ’gela’ge egeikmu daganogwi no? Erlak o. 17E op a’ge holuk e, e’gen ogo, op a’geat oso yo. Ye, e wiak a’ge holuk e, e’gen ogo wiak a’geat oso yo. 18E op a’geat de, e’gen e, e wiak a’ge en e’gen egesu ’gela’ge mesik egesu re, erlak o. Ye, ai ’gela’ge re, e wiak a’geat de, e’gen e op a’ge e’gen egesu ’gela’ge mesik egesu re, erlak o. 19#Mat. 3:10; Luk. 3:9Di agan yu agan e’gen op a’ge egesiso erlak a’ge ai re, edip mukho re, odoukmu modok hwikhai lagai o. 20#Mat. 12:33Ai ’gela’ge re, is aphwami asogo takhonobouwa ai pam, enebabut enagat ema o,” oluk mo’gulentesi.
“Hegitsogo tu pukmu en de, enemde pam en nak umu re, opma ’gwi louwa erlak o,”
oluk mo’gulentesi wene
(Lukas 13:25-27)
21Asogo mo’gulentesirik, mesik disogo mo’gulentesi,
“His aphwami en, an mo’gulnogulat e,
Nonue, nonue, oluk ogu legep ai pam henebe ’berlegat, an naik ’bogorl pam a’ge eragam enebasumu eba ’gwi lagup erlak o. We, is pema, at Allah ogola epasu a’ge hegitsogo togwi a’ge aiat ’gwi louwa o, 22o ologun pam ema ai erlige re, aphwami a’bik ne’bek wemarik e, disogo mo’gulnema o,
Nonue o. Nis e, hat honuk pam wene op wene mo’gulontogulat, mu’gat ebabut wiak a’ge aphwami onogola ’gwigisarik oruakma henokho lebikpogulat, tu puk a’ge elalinat a’bik tugulat, til denaga lege ebano erlak no? oluk ua a’geat de, 23#Mzm. 6:8an en ’baksogoat disogo mo’gulentaik o,
His henebe an neperlak o. Wiak modok til denaga legep a’ge ai neragam ya wolorogup o. ’Bogolit o, oluk mo’gulentaik o,” oluk mo’gulentesi.
“Ap enebe ’biren en o werigisa,”
oluk ebam elitsogo mo’gulentesi wene
(Lukas 6:47-49)
24Asogo mo’gulentesirik, mesik disogo mo’gulentesi,
“Holuk e, sa en, an niak ai esa’go hwelak poluk, hegitsogo tago holuk e, at en yu ’gela’ge tua o. Ap mesik ede oruak a’ge en o helep pam louksogo weregeimu, 25moru a’bik ’bu agalat, ik ebe a’bik wagalat, yasobu a’bik punhau wagalat, tegei ’gal e, o ano helep pam louksogo weregeimu no oluk e, orlo’buksogo lo erlak mo egei ai ’gela’geat tua o. 26A’ge re, ap sa en an niak ai esa’go hweliselarat de, hegitsogo tago erlak holuk, yu ’gela’ge tua o. Ap mesik ede erlak a’ge en o ik ’berlik pam louksogo werik polukmu, 27moru a’bik ’bu agalat, ik ebe a’bik wagalat, yasobu a’bik punhau wagalat, tagalat, o ano erle’galogo ’bou tegeimu moluk-melaksogo re, wiagaregei ai ’gela’geat o,” oluk mo’gulentesi.
Enesa’go hweligisarik e, erliktigisa wene
(Markus 1:22; Lukas 4:32)
28-29 #
Mrk. 1:22; Luk. 4:32 Yesus en wene asogo il waga lagarik wene ologun wusogo egeimu re, is aphwami a’bik ebano en e,
“Eige! Wene egei ai, is ap Allah iak pelal wogo eiye a’ge en mo’gulnontogwi ’gela’ge oso erlak o. We, at en e, wene ebe eiye a’ge en u ’gela’ge egei ai, nonogorlok e!” oluk erliktigisa.
