Matius 6
6
Ena’ge aphwami logon wogontogwi wene
1 #
Mat. 23:5
Asogo mo’gulentesirik e, mesik disogo mo’gulentesi,
“Allah en,
Disogo togu lomup, oluk egeimu, his en hegitsogo togu legep a’ge ai, aphwami en enil hontogu lemagoluk selakma togup o. Enil hontogu lemagoluk togup holuk e, henaik ’bogorl pam a’ge en o’go wokhontouwa modok erlak o. His henede eberit! 2His logon hena’ge oruak a’ge en, is ena’ge erlak a’ge lerontouwogoluk holuk e,
An disogo taga legi, oluk heniak amitmit supsogo togu lorogup o. Is pema enede ’biren welat enagap pam nak op ’gela’ge welat, o se’ban ogumu ’gwi lagalat emin, ebela pam lagalat emin, is pema en,
Is op o, oluk erligonobuagoluk togwi ai re, his asogo togu lorogup o. Is ai o’go horlo ’gela’ge re, we erligonobogwi aiat o. 3Holuk e, his hena’ge aphwami ena’ge erlak a’ge wogontouwogoluk holuk e,
An disogo wogentaik, oluk, henarilak honorokhwi emin, is pema emin, modok mo’gulentagup o. 4Hisakhoat wogentagupmu re, henaik Allah ’bogorl pam a’ge en aphwami hisakho togwi a’ge il yerentasu ai en o’go wokhontouwa o,” oluk mo’gulentesi.
“Se’ban disogo ogu lomup o,”
oluk mo’gulentesi wene
(Lukas 11:2-4)
5 #
Luk. 18:10-14
Asogo mo’gulentesirik e, mesik disogo mo’gulentesi,
“Holuk e, his se’ban ogulat, aphwami pema enagap pam nak op ’gela’ge welat enede ’biren a’ge en e,
Se’ban eselegi ai aphwami en pobirak nobuak, oluk Allah owi werikmu ’gugulat e, enebe inotluk se’ban ogulat, ebela adugalma inotluk se’ban ogulat, ogwi ai ’gela’ge re, ogu lorogup o. Is ai o’go horlo ’gela’ge re, we, erligonobogwi aiat o, oluk demat mo’gulhentegis o. 6A’geat de, his se’ban uogoluk holuk e, honowi pam ’goduk lasogo ’goluk, henaik Allah ’bogorl pam a’ge ebe enil hogwi erlak a’ge ano en wokhontouwagoluk ’gonu mo’gulogu lemis o. His en hisakho ’gonu mo’gulorogup a’ge ai, at il hisogo a’ge hasumu re, wokhontouwayat o. 7Holuk e, his en se’ban ogulat, is aphwami o’borlma a’ge en ogwi ’gela’ge ogu lorogup o. Is ai se’ban ogulat, onogola en e,
Se’ban yat wiak eselegi ai en e, nenaik ’bogorl pam a’ge esa’go holua o, oluk, litluk-latluk ogwi a’ge ai. 8His e, is enebabut wagup o. Henaik Allah ’bogorl pam a’ge ai owan ’gonu mo’gulom erlak oruakhwe, his henagai a’ge ai, at pageat aluk oruak o. 9-10Holuk e, his en se’ban ogulat, disogo ogu lomup o,
Nenaik ’bogorl pam a’ge
hu’gwarek honuk logo pogu lemagoluk, taknenebi suk o.
Nis nenebe hat heragam welemagoluk nenebi suk o.
Is ’bogorl pam hat hogola epasu legen a’ge hegitsogo togwi ’gela’ge,
nis ’gwiangma asogoat togu lemagoluk, taknenebi suk o.
11Nis nonso’boru yogodak no a’ge elitsogoat woknenta suk o.
12Aphwami en nis wiagapnenebegesa a’ge, nis en erlagapsogo ukpege ai ’gela’ge,
nis wiak tige a’ge hat en erlagapsogo ukpemen o.
13Wiak tuagoluk nenede ’gagalu ago holuk, eba enat, uknonobo pukmu en ’bekhirat woknonoboluk lasu lemen o. [Nenaik ’Gain Honuk Logo harat welat, di a’ge yu a’ge tu nakma re, harat erlikhobogwi modok wolomul o. Demat emak o, u ’gela’ge, Amin,]
oluk se’ban asogo ogu lomup o. 14#Mrk. 11:25,26Aphwami en his wiagap henebigisa a’ge, his en erlagapsogo ukpegep holuk, henaik Allah ’bogorl pam a’ge en his wiak tigep a’ge ai erlagapsogo ukpou wayat o. 15A’geat de, is pema en his wiagap henebigisa a’ge, his en erlagapsogo ukpogwi erlak holuk e, henaik ’bogorl pam a’ge en his wiak tigep a’ge erlagapsogo ukpouwa erlagat o,” oluk mo’gulentesi.
So’boru no’gwi erlak se’banat ogwi modok
welat tugulom wene
16Asogo mo’gulentesirik e, mesik disogo mo’gulentesi,
“His so’boru no’gwi erlak welat se’banat ogwi modok wolomogoluk holuk e, is aphwami pema enagap pam nak op ’gela’ge welat, enede ’biren a’ge en,
Aphwami pema en enagat pobi nonobuak, oluk onorogole ou wokho welagai ’gela’ge, wolom puk o. Is ai o’go horlo ’gela’ge re, we, aphwami en enagat yerontogwi aiat o, oluk, demat mo’gulhentegis o. 17-18A’ge re, his nak e, so’boru no’gwi erlak se’banat ogu lomogoluk holuk e, aphwami en enagat pobi honobuano. Henaik Allah aphwami en enil hogwi erlak a’ge ano ematek en enagat pobi honobuagoluk, ’gume wusogo re, henasu pelogo welat, se’banat ogulom o. Asogo hisakho togup holuk e, henaik Allah aphwami en enil hogwi erlak a’ge ai il hontoluk e, o’go wokhontouwa o,” oluk mo’gulentesi.
Ena’ge odoksogo po wene
(Lukas 12:33-34)
19 #
Yak. 5:2,3 Asogo mo’gulentesirik e, mesik disogo mo’gulentesi,
“Aphwami en di a’ge yu a’ge ’gwiangma yema odoksogo pogwiam e, elaluk a’ge en ’baliselat, morlil tagalat, ap enil ’berege wiak a’ge en yogorlia wa ’gugulat, tugumu yema re, di a’ge yu a’ge odoksogo po re, erlak o. 20A’geat de, ’bogorl pam eba nak e, elaluk a’ge en ’baliselat, morlil tagalat, ap enil ’berege wiak a’ge en yogorlia wa ’gugulat, togwi modok erlak o. Holuk e, ’bogorl pam ebayat op a’ge re, odoksogo pagathwerlailo yo. 21His hena’ge henede hwedik a’ge odoksogo oruakma re, henede ebayat welema ani o,” oluk mo’gulentesi.
Enebe obat o dakharak welagai wene
(Lukas 11:34-36)
22Asogo mo’gulentesirik e, mesik disogo mo’gulentesi,
“Henebe o dakharak esaga ’gwielak ’gela’ge re, henil aiat oruak o. Holuk e, henil op holuk, henebe ebesik ai re, modok dakharagat wolorogup o. 23A’geat de, henil wiak holuk e, henebe ebesigat o hiktak ’gela’ge wolorogup o. A’ge re, honogola o dakharak ’gela’ge ai hik oso holuk e, eige! Modok ebenagaikmu modok hiktak welegep o,” oluk mo’gulentesi.
Ena’ge a’ge paget enede perik welagai wene
(Lukas 16:13; 12:22-31)
24Asogo mo’gulentesirik e, mesik disogo mo’gulentesi,
“Ai ’gela’ge re, ap mesigat a’ge en ap ’gain enebe ’biren eneragam welat eniabuk tugulom modok mia o. Asogo welema holuk e, eneragam a’ge ai en,
Naik op on yu nede. Ye, mesik e, wiakma re, nebit, oluk eselat e, ede hwedik a’ge ai e’birek nak lo’boksogo welat e, mesik ebit on ano re, apserisogo wolom o. Ai ’gela’ge, his en e, Allah eragam a’ge welat, uang eragam a’ge wolom mia o. 25An en asogo mo’gulhentegis ai en, his honogola en e,
Nenelaluk wolomogoluk e, so’boru emin, ik emin, ’geba a’ge nul. Nenebe sum ’geba a’ge ’buktul, oluk henede perik welat wenemennei yat horok eberogupno oluk mo’gulhentegis o. No’gwi a’ge ai re, logo no? Henelaluk welegep ai nak e, logo yo. Sum ’buktogwi a’ge ai logo no? Henebe ai nak e, logo yo. 26Sue ’bogorl o’gwe darak noso a’ge ai henil yethogulat honogola eberit o. Is sue ai di a’ge yu a’ge owi yorogulat, e’gen egesisoam ’balogo ebale pogumu ebano pogulat, togwi erlak a’geat de, henaik ’bogorl pam a’ge en onso’boru wogentasu o. A’ge re, Allah en is sue ai ede hwedigabenebasu no? Erlak o. His henebe aiat ede hwedigaphenebasulat e, honso’boru wokhontouwa erlak no? Wokhontouwayat o. 27Ye, his pema honogola opogulat e,
An nebe wareik eria hegit e, lebeksogo warom erlakma en, il mesik emin ogo nelaluk welle e, oluk, wenemennei yat horok eberogup ai pam, logon emin helaluk wolom no? Mia o. 28His e, sum henagap pam ’buktu a’ge ai paget no oluk henede perik togu legep. E’gen ’gut lek sing lek o lei o’gwe egesiso ano pobi tit o. E’gen ai owan igoluk e, set hoporak til lagalat, herle tualogo sum ’gela’ge egesogulat, togwi modok erlak o. 29#1Raj. 10:4-7; 2Taw. 9:3-6A’geat de, at ap ’gain Salomo welat alli a’ge wogoma erliktogu legesa ai mia epegi. E’gen ai nak e, il amulit op modok ai hemit! 30E’gela herle’gela o lei o’gwe welago a’ge ai re, yogodak ’gela’ge op wolotluk en, loruk o’gwe re, odoukmu narlik pogwi a’geat de, Allah en onosum ’buktak onobo ’gela’ge op a’ge heli’gogo enebasu ai hegitsogo, his henebe henebaget, opsogo ’buktak honobouwa erlak no? ’Buktak honobouwayat o. Henede Allah ebam he’berik po puk yu re! 31Holuk e, his henede perik wenemennei yat horok eberugulat,
Nonso’boru emin, nenegeik emin, no a’ge nul. Nonosum no a’ge ’buktul, ogu legep ai re, modok u puk o. 32Asogo togwi ai ’berlegat e, is aphwami o’borlma a’ge en ai a’ge logo poluk heratil no’gwi a’geat de, his yu nak e, di a’ge yu a’ge erlak en henerlagaik ’gela’ge welegep ai en, at henaik Allah ’bogorl pam a’ge enaluk modok oruak o. 33Holuk e, henaik Allah en eragam welat tugulom ai paget emin, at en,
Disogo tip, asogo tip, oluk mo’gulhentasuam tugulom a’ge ai paget emin, logo pogu lorogup holuk, di a’ge yu a’ge ai pamat ebam louksogo wokhontouwayat o. 34Holuk e, his e, tono paget henede perik welat wenemennei yat horok eberogup o. Yogodak wiak ago a’ge oruak a’geat de, tono wiak om a’ge eberogup erlak ani o,” oluk mo’gulentesi.
