Олӧм 34
34
Дина чойысь водзӧс перйӧм
1Ӧтчыд Яковлӧн да Лиялӧн Дина нылыс муніс аддзысьны сикемса нывъяскӧд. 2Динаӧс аддзис Хаморлӧн Сикем пиыс. Хамор вӧлі Ханаан муын олысь хивей войтырлӧн ӧксы. Сикем мырдӧн босьтіс Динаӧс да узис сыкӧд. 3Сикемӧс кутіс кыскыны Яковлӧн Дина нылыс дінӧ. Дина лои муса Сикемлы, и сійӧ зілис бурасьны Динакӧд. 4Хамор батьыслы Сикем шуис: «Корав тайӧ нывсӧ меным гӧтырӧ».
5Яковлы висьталісны, мый Хаморлӧн пиыс янӧдӧма сылысь Дина нывсӧ. Но сійӧ нинӧм эз кут вӧчны, а виччысис, кор пияныс локтасны ыж-мӧс йирсьӧданінысь. 6Сикемлӧн Хамор батьыс локтіс Яков дінӧ сёрнитны. 7Тайӧ кадас видз вылысь локтісны Яковлӧн пияныс. Найӧ кылісны лоӧмтор йылысь да ёна скӧрмисны, ӧд Яковлысь нывсӧ мырдӧналӧмнас – тайӧ шогмытӧмторсӧ вӧчӧмнас – Сикем янӧдіс Израильӧс. 8Хамор кутіс сёрнитны: «Сикем пиӧй радейтӧ нывнытӧ. Сетӧй сійӧс пиӧйлы гӧтырӧ. 9Рӧдвужасьӧй миянкӧд, нывъястӧ миян пиян сайӧ сетӧй, а миянлысь нывъяснымӧс мед тіян пиянныд босьтасны гӧтырӧ. 10Олӧй миян пӧвстын. Тайӧ [паськыд] муыс тіян водзын, ветлӧдлӧй сэті, босьтӧй аслыныд муяс да овмӧдчӧй сэтчӧ». 11Сикем шуис Диналӧн батьыслы да вокъясыслы: «Лоӧй бур сьӧлӧмаӧсь ме дінӧ, и ме сета тіянлы ставсӧ, мый коранныд. 12Урчитӧй медыджыд дон да козинъяс. Ме сета, мый коранныд, сӧмын сетӧй меным гӧтырӧ тайӧ нывсӧ».
13Дина чойнысӧ янӧдӧмысь Яковлӧн пиян наяна вочавидзисны Сикемлы да сылӧн Хамор батьыслы. 14Шуисны [Диналӧн Симеон да Левий вокъясыс, Лиялӧн пияныс]: «Огӧ вермӧй сетны чойнымӧс вундыштчытӧм морт сайӧ, ӧд тайӧ миянӧс янӧдӧ. 15Ті кӧ лоанныд миян кодьӧсь, миян моз вундыштанныд став айуловнытӧ, сэки ми воам ӧти кывйӧ тіянкӧд [да кутам овны тіянкӧд]. 16Сэки кутам сетны тіян сайӧ нывъяснымӧс да ас саяным босьтны тіянлысь нывъяснытӧ. Кутам овны тіянкӧд да лоам ӧти войтырӧн. 17А онӧ кӧ кывзысьӧй да онӧ вундыштчӧй, ми босьтам чойнымӧс да мунам».
18Татшӧм вӧзйӧмыс кажитчис Хаморлы да сылӧн Сикем пиыслы. 19Том зон пырысьтӧм-пыр кӧсйысис, ӧд сылы муса вӧлі Яковлӧн нылыс. Сикем вӧлі бать керкаас медся пыдди пуктанаӧн. 20Хамор батьыскӧд сійӧ муніс карса дзиръя дорӧ. Сэні найӧ сёрнитісны карса олысьяскӧд да шуисны: 21«Тайӧ йӧзыс миянкӧд вӧліны бурӧсь. Мед овмӧдчасны миян муӧ да ветлӧдласны сэті, ӧд муным паськыд. Налысь нывъяссӧ ми кутам босьтны гӧтырӧ, а нывъяснымӧс кутам сетны налӧн пиян сайӧ. 22Найӧ кӧсйысисны овны миян пӧвстын да лоны ӧти войтырӧн, миян кӧ став айуловыс на моз вундыштчас. 23Ми кӧ вӧчам на ног, найӧ кутасны овны миянкӧд. Налӧн ыж-мӧсныс да эмбурныс тшӧтш лоӧ миян». 24Тыр арлыда став айуловыс кывзысисны Хаморлысь да Сикем пиыслысь да вундыштчисны.
25Коймӧд луннас, кор ставныс куйлісны эбӧстӧг, Яковлӧн Симеон да Левий пияныс, Диналӧн вокъясыс, босьтісны шыпуртнысӧ, повтӧг пырисны карас да виалісны став айуловсӧ. 26Хаморӧс да Сикем писӧ бытшкисны шыпуртӧн. Динаӧс босьтісны Сикем керкаысь да петісны карсьыс. 27Сэсся Яковлӧн пияныс бӧр локтісны да петкӧдісны карсьыс став озырлунсӧ. Тадзи найӧ вӧчисны Дина чойнысӧ янӧдӧм вӧсна. 28Найӧ босьтісны ыж-мӧс, осёлъяс да ставсӧ, мый вӧлі карас да видз-му вылас. 29Босьтісны став озырлунсӧ, тшӧтш челядьӧс да аньясӧс. Петкӧдісны-нуисны ставсӧ, мый вӧлі [карас да] керкаясас.
30Яков шуис Симеонлы да Левийлы: «Ті шогӧ уськӧдінныд менӧ. Ті вӧчинныд менӧ мустӧмӧн татчӧс олысьяслы, ханаансаяслы да перезейяслы. Ми ӧд этшаӧнӧсь. Найӧ кӧ чукӧртчасны миянлы паныд, сэки пасьвартасны миянӧс, бырӧдасны менӧ и гортсаӧс». 31Симеон да Левий вочавидзисны: «Мыйла найӧ чойнымкӧд тадзи вӧчисны? Сійӧ ӧд абу асьсӧ вузавлысь ань!»
(c) Institute for Bible Translation, Finland, amp Finnish Bible Society, 2023