Забур 59
59
Четин чӀавуз ийидай дуьа
1-2Манидаррин чӀехидаз. «Цин цуькведи шагьидвалзава» манидин макьам ягъиз. Давудан шиир. Давуда Арам-Нагьарайимдин кефердин рагъэкъечӀдай пата Суьриядихъ галаз ва Цувадин пачагьдихъ галаз дяве ийизвайла, ва Йуафа, хтана, Кьелен дереда цӀикьвед агъзур эдами барбатӀай чӀавуз.
3Вуна чун гадарна, я Аллагь, барбатӀна чун.
Ваз хъел авай – эвелан хьтинбур хъия чун!
4Вуна чил зурзурна, гудна ам;
адан хирер сагъ хъия – ам хъуткьун жезва.
5На Жуван халкьдиз ракъурна четин вахтар;
гана вуна чаз чехир, ада яна чун.
6Амма Вакай кичӀедайбур паталди
Вуна пайдах хкажна,
абур адав кӀватӀ хьана,
чеб чӀемерукдай ягъиз тежервал.
Макьамдин ара
7Хилас хьурай Ви рикӀ алайбур,
хуьх чун жуван эрчӀи гъиливди,
жаваб це чаз.
8Аллагьди гаф гана
Вичин пакханада:
«Шадвал ийиз, Шехем шегьер пайда За,
Сукат дере алцумда За.
9Зиди я Гилеад, Зиди я Манаше,
Ифраим Зи кӀукӀ я ракьун,
Ягьудат пачагьвилин лаш я Зи.
10Магьаб Зун патал
лат я кӀвачер чуьхуьдай.
За вегьида Жуван чекме Эдамдал;
филиштийрин чилел
гъалибвилелди гьарайда кӀевиз».
11Мягькемнавай шегьердиз зун ни гъидай?
Ни гъидай зун Эдамдал кьван?
12Ам Вун тушни, я Аллагь, гадарайди чун?
Чи кьушунрихъ галаз экъечӀ тийизвайдини Вун тушни?
13Чаз куьмек це женгина душмандихъ галаз,
вучиз лагьайтӀа инсанрин куьмек
тапанди я.
14Аллагьдихъ галаз чун
гъалиб жеда дяведа.
Ярхда Ада душманар чи.
© Институт перевода Библии, 2010-2024