Забур 52
52
Небгетрин кӀамашвал
1Манидаррин чӀехидаз. Мугъам ягъиз. Давудан шиир.
2КӀамашри чпин рикӀяй лугьузва:
«Аллагь авач».
Абур рекьяй акъатнава,
мурдар я абурун крар.
Садни авач са хъсанвал ийирди.
3Килигзава цавай Аллагь инсанриз,
акун патал аватӀа
гъавурда аваз кар ийизвайбур,
Аллагь жагъурзавайбур.
4Вирида чин кьулухънава
Аллагьдикай,
вири, сад хьиз, ява хьанва,
хъсанвал ийирди авач,
гьич садни авач.
5Небгетриз яраб акьул къведач жал,
зи халкь, фу хьиз, незвайбуруз,
Аллагьдиз минет тийизвайбуруз?
6Са куьникайни кичӀе тежер чкада
ана абурук акатда кичӀ,
Аллагьди кӀарабар
чукӀурда ви душманрин,
жеда абур беябур,
куьз лагьайтӀа Аллагьди
инкарна абур.
7ХупӀ туширни хиласвал
Сигьандилай Исраилдиз атанайтӀа!
Вичин халкь кӀвачел
ахкьалдарай чӀавуз Аллагьди
шад жеда Якьубан эвледар,
шад жеда Исраил!
© Институт перевода Библии, 2010-2024