Забур 146
146
Тарихдани тӀебиатда Аллагьдин зурбавал
1Тариф ая Реббидин!
Вуч хъсан я манидалди
тариф авун чи Аллагьдин,
вуч хъсан я ширин ва кутугай тариф авунин.
2Ярусалим эхцигзава Реббиди,
кӀватӀ хъийизва Исраилдин суьргуьнар.
3Ада дири хъийизва рикӀер ханвайбур,
абурун хирер кутӀунзава,
4гьисаб ийизва гъетерин кьадар,
тӀварар гузва абуруз вирибуруз.
5Чи Агъа чӀехи я ва къудрат авайди я,
Адан акьулдиз чидач сергьятар.
6Умундаз куьмек гузва Реббиди,
небгет гьалчзава чилел.
7Шукур авуналди мани лагь Реббидиз,
кинур ягъ чи Аллагьдиз.
8Ада цав кӀевзава циферив,
чил патал марф гьазурзава,
дагъларал векьив экъечӀиз тазва,
9недайди гузва гьайванриз
ва гьарайзавай шарагриз кӀвагъран.
10Ам балкӀандин къуватдал туш шад жезвайди,
я аскеррин кӀвачеринни зирингвилел,
11майилзава Реббиди кичӀебуруз Вичикай,
умуд кутазвайбуруз Вичин регьимдик.
© Институт перевода Библии, 2010-2024